Angelus

 Nikozi – E diel, 6 qershor 2010

Të dashur vëllezër e motra në Krishtin,

 është traditë e Kishës që në mesditë t’i drejtohet në lutje të Lumes Virgjër Mari, duke kujtuar me gëzim miratimin e saj të gatshëm për t’u bërë nënë e Hyjit. Ka qenë një ftesë që e ka mbushur me drithërimë dhe që mezi do të kuptonte. Ishte një shenjë se Hyji kishte zgjedhur atë, shërbëtoren e tij të përvuajtur, për të bashkëpunuar me të në veprën e shëlbimit. Si të mos galdojmë për zemërgjerësinë e përgjigjes së saj! Nëpërmjet “po”-së së saj shpresa e historisë është bërë realitet, i Vetmi që Izraeli e kishte pritur prej kohësh erdhi në botë, brenda historisë sonë. Për të engjëlli kumtoi se mbretëria e tij nuk do të kishte kurrë fund (Lk 1,33).

 Rreth tridhjetë vjet më pas, kur Maria po qante te këmbët e kryqit, duhet të ketë qenë e vështirë ta mbante të gjallë këtë shpresë. Forcat e errësirës dukej se kishin fituar. Dhe në brendësinë e saj ajo do të kujtonte fjalët e engjëllit. Por edhe në trishtimin e Të Shtunës së Madhe siguria e shpresës e mbështeti deri në gëzimin e mëngjesit të Pashkëve. Edhe ne, bijtë e saj, jetojmë në të njëjtën shpresë plot besim se Fjala e bërë njeri në kraharorin e Marisë, nuk do të na braktisë kurrë. Ai, Biri i Hyjit dhe Biri i Marisë, e forcon bashkimin që na lidh së bashku kështu që të mund të bëhemi dëshmitarë të tij dhe të pushtetit të dashurisë së tij që shëron dhe pajton.

 Tani dëshiroj të them disa fjalë në gjuhën polake me rastin e rastit fatlum të lumturimit të sotëm të Jerzy Popiełuszko, meshtar dhe martir.

  [I drejtoj një përshëndetje të përzemërt Kishës në Poloni, që sot gëzon për lartësimin në nderet e altarit të atë Jerzy Popiełszko. Shërbimi i tij i zellshëm dhe martirizimi i tij janë shenjë e veçantë e fitores së të mirës mbi të keqen. Shembulli i tij dhe ndërmjetësimi i tij e shtofshin zellin e meshtarëve dhe e ndezshin dashurinë e besimtarëve laikë.]

 Le t’i lutemi tani Virgjërës Mari, Nënës sonë, që të ndërmjetësojë për të gjithë ne, për popullin e Qipros dhe për Kishën e Lindjes së Mesme, me Krishtin Birin e saj, Princin e Paqes.

titujt kryesorë

webmaster