Ceremonia e mireseardhjes

FJALIMI I ATIT TË SHENJTË BENEDIKTI XVI

Sheshi përballë Pallatit Presidencial - Betlehem

E mërkurë, 13 maj 2009

Zoti President,

Miq të dashur,

     ju përshëndes të gjithëve nga thellësia e zemrës dhe falënderoj shumë Presidentin Zotin Mahmoud Abbas, për fjalët e tij të mirëseardhjes. Udhëtimi im në tokat e Biblës nuk do të ishte i plotë pa vizituar Betlehemin, Qytetin e Davidit dhe vendin e lindjes së Jezu Krishtit. As nuk do të kisha mundur të vija në Tokën e Shenjtë pa pranuar ftesën e sjellshme të Presidentit Abbas për t’i vizituar këto Vende dhe për të përshëndetur popullin Palestinez. E di sa keni vuajtur dhe vazhdoni të vuani për shkak të trazirave që kanë përfshirë këtë tokë për dhjetra vjet. Zemra ime kthehet kah të gjitha ato familje që kanë mbetur pa shtëpi. Këtë pasdite do të bëj një vizitë në Aida Refugee Camp për të shprehur solidaritetin tim me popullin që ka humbur kaq shumë. Atyre mes jush që qajnë për humbjen e familjarëve dhe të dashurve të tyre në vështirësi, veçanërisht në konfliktin e fundit të Gazës, i siguroj për pjesëmarrjen më të thellë dhe të kujtimit të shpeshtë në lutje. Në fakt, ju mbaj me vete të gjithëve ju në lutjet e mia të përditshme dhe i përgjërohem të Tejlartit për paqen, për një paqe të drejtë dhe të qëndrueshme, në Territoret Palestineze dhe në mbarë rajonin.

 Zoti President, Selia e Shenjtë mbështet të drejtën e populli Tuaj për një atdhe Palestinez sovran në tokën e të parëve tuaj, të sigurt dhe në paqe me fqinjtë e saj, brenda kufijve ndërkombëtalisht të njohur. Edhe pse tani ky realizimi i këtij objektivi duket i largët, unë ju inkurajoj Ju dhe të gjithë popullin Tuaj ta mbani gjallë flakën e shpresës, të shpresës që të mund të gjendet një rrugë takimi mes aspiratave legjitime të Izraelianëve dhe Palestinezëve për paqen dhe stabilitetin. Po kujtoj këtu fjalët e paraardhësit tim Papa Gjon Pali II, nuk mund të ketë “paqe pa drejtësi, e as drejtësi pa paqe” (Mesazhi për Ditën Botërore të Paqes të vitit 2002). I lutem të gjitha palëve të përfshira në këtë konflikt të hershëm që të lënë mënjanë zemërimin dhe ndryshimin që akoma pengon rrugën e pajtimit, për të arritur tek të gjithë njëlloj me bujari dhe mëshirë, pa diskriminim. Një bashkëjetesë e drejtë dhe paqësore mes popujve të Lindjes së Mesme mund të realizohet vetëm me një shpirt bashkëpunimi dhe respekti të ndërsjellë, në të cilin të drejtat dhe dinjiteti i të gjithëve të njihet dhe të respektohet. Ju kërkoj të gjithëve ju, i kërkoj krerëve tuaj, të marrin me angazhim të plotë të veprojnë për këto objektiva. Në veçanti, i kërkoj Bashkësisë ndërkombëtare të përdorë ndikimin e saj në favor të një zgjidhjeje. Besoj dhe jam i bindur që nëpërmjet një dialogu të ndershëm dhe këmbëngulës, duke respektuar në mënyrë të plotë pritshmëritë e drejtësisë, mund të arrihet në këto toka një paqe e qëndrueshme.

 Është shpresa ime e zjarrtë që problemet e mëdha në lidhje me sigurinë në Izrael dhe në Territoret Palestineze të lehtësohen së shpejti kështu që të mund të lejojnë një liri më të madhe në lëvizje, me vëmendje të veçantë për kontaktet mes familjarëve dhe për hyrjen në vendet e shenjta. Palestinezët, ashtu si çdo person tjetër, kanë një të drejtë natyrale për t’u martuar, për të formuar një familje dhe të kenë të drejtë të punësohen, të edukohen dhe të kenë asistencë sanitare. Lutem edhe që, me ndihmën e Bashkësisë ndërkombëtare, puna e rindërtimit të vazhdojë shpejt kudo ku shtëpitë, shkollat ose spitalet të jenë dëmtuar ose shkatërruar, sidomos gjatë konfliktit të kohëve të fundit në Gaza. Kjo është themelore me qëllim që populli i kësaj toke të mund të jetojë në kushte që favorizojnë paqen e qëndrueshme dhe mirëqenien. Një infrastrukturë e qëndrueshme do t’i ofrojë të rinjve tuaj mundësi më të mira për të marrë specializime të duhura dhe për të pasur punë fitimprurëse, duke i bërë të mundur të luajnë rolin e tyre në nxitjen e jetës së bashkësive tuaja. Ua drejtoj këtë apel shumë të rinjve të pranishëm sot në Territoret Palestineze: mos lejoni që humbjet e jetëve dhe shkatërrimet, e të cilave keni qenë dëshmitarë, të ngjallin zemërim ose pakënaqësi në zemrat tuaja. Kini guximin t’i rezistoni çdo tundimi që mund të provoni për të përdorur dhunën ose terrorizmin. Përkundrazi, bëni të mundur që çfarë keni provuar të përtrijë vendosmërinë tuaj për të ndërtuar paqen. Bëni të mundur që kjo t’ju mbushë me një dëshirë të thellë për të ofruar një kontribut të qëndrueshëm për të ardhmën e Palestinës, kështu që ajo të ketë vendin e saj të drejtë në skenarin e botës. Kjo frymëzoftë në ju ndjenja mëshire për të gjithë ato që vuajnë, angazhim për pajtim dhe një besim të madh në mundësinë e një të ardhmjeje më të ndritshme.

 Zoti President, të dashur miq të mbledhur këtu në Betlehem, thërras mbi të gjithë popullin Palestinez bekimet dhe mbrojtjen e Atit tonë qiellor, dhe lartësoj lutjen e zjarrtë që kënga e engjëjve e luajtur në këtë vend të përmbushet: “paqe mbi tokë njerëzve vullnetmirë”. Faleminderit. Dhe Hyji qoftë me ju.

titujt kryesorë

webmaster