Ceremonia e mireseardhjes

FJALIMI I ATIT TË SHENJTË BENEDIKTI XVI

Aeroporti ndërkombëtar Queen Alia i Amanit

E premte, 8 maj 2009

Madhëri,

Shkëlqësi,

Të dashur Vëllezër Ipeshkvij,

Të dashur Miq,

    me gëzim të madh ju përshëndes të gjithëve ju këtu të pranishëm, ndërsa filloj vizitën time të parë në Lindjen e Mesme që nga zgjedhja ime në Selinë Apostolike, dhe jam i nderuar që vë këmbët në vendlindjen e Mbretërisë Ashemite të Jordanisë, një tokë shumë e pasur me histori, vendlindja e shumë qytetërime të lashta, dhe thellësisht e pasur me domethënie fetare për Hebrenjtë, të Krishterët dhe Myslimanët. Falënderoj Madhërinë e Tij mbretin Abdullah II për fjalët e Tij të mirëseardhjes dhe i bëj urimet e mia në këtë vit që shënon dhjetëvjetorin e marrjes së tij të fronit. Duke përshëndetur Madhërinë e Tij, i bëj urimet e mia të përzemërta  të gjithë pjesëtarëve të Familjes Mbretërore dhe të Qeverisë, dhe mbarë popullit të Mbretërisë. Përshëndes Hirësinë e Tij Fouad Twal dhe Hirësinë e Tij Theophilo III dhe Patriarkët e Ipeshkvijtë e tjerë të pranishëm, veçanërisht ata që kanë përgjegjësi baritore në Jordani. Po përgatitem me gëzim të kremtoj liturgjinë në Katedralen e Shën Gjergjit nesër mbrëma dhe në Stadiumin Ndërkombëtar të dielën së bashku me Ju, të dashur Ipeshkvij, dhe me kaq shumë besimtarë që janë nën kujdesin tuaj baritor.

 Kam ardhur në Jordani si shtegtar, për të nderuar vendet e shenjta që kanë luajtur një rol kaq të rëndësishëm në disa ngjarje kyqe të historisë Biblike. Mbi Malin Nebo, Moisiu i udhëhoqi njerëzit e tij për ta hedhur shikimin e tyre drejt tokës që do të bëhej shtëpia e tyre, dhe këtu vdiq dhe u varros. Në Betaninë nga ana tjetër e Jordanit, Gjon Pagëzuesi predikoi dhe dëshmoi Jezusin, që ai vetë pagëzoi në ujërat e lumit që i jep emrin kësaj toke. Në ditët në vazhdim do të vizitoj të dy këto vende të shenjta dhe do të kem gëzimin të bekoj gurët e parë të kishave që do të ndërtohen në vendin tradicional të Pagëzimit të Zotit. Gjasat që komuniteti i krishterë i Jordanisë të mund të ndërtojë vende publike kulti është një shenjë respekti i këtij Vendi për besimin dhe në emër të Katolikëve dëshiroj të shpreh se sa vlerësohet kjo hapje.

Liria e fesë është padyshim një e drejtë themelore dhe është shpresa dhe lutja ime e zjarrtë që respekti për të gjitha të drejtat e patjetërsueshme dhe dinjiteti i çdo burri dhe i çdo gruaje të jetë gjithmonë e më shumë i njohur dhe i mbrojtur, jo vetëm në Lindjen e Mesme, por kudo në botë.

Vizita ime në Jordani ofron mundësinë e mirëpritur për të shprehur respektin tim të thellë për komunitetin Mysliman dhe të nderoj rolin udhëheqës të Madhërisë së Tij Mbretit për të nxitur një kuptim më të mirë të virtyteve të Islamit. Tani që kanë kaluar disa vite nga botimi i Mesazhit të Amanit dhe i Mesazhit Ndërfetar të Amanit, mund të themi se këto përpjekje fisnike ishin të suksesshme në nxitjen e një aleance civilizimi mes botës Perëndimore dhe asaj Myslimane, duke përgënjeshtruar parashikimet e atyre që e konsiderojnë të pashmangshme dhunën dhe konfliktet. Në fakt, Mbretëria e Jordanisë ka kohë që ka qenë në krye të përpjekjeve për të nxitur paqen në Lindjen e Mesme dhe në mbarë botën, duke nxitur dialogun ndër-fetar, duke mbështetur përpjekjet për të gjetur një zgjidhje të drejtë të konfliktit Izraelito-Palestinez, mbajtjen e refugjatëve nga Iraku fqinj, si dhe është përpjekur ta mbajë nën kontroll ekstremizmin. Nuk mund të mos e përmend këtë mundësi pa iu referuar përpjekjeve pararojëse në favor të paqes në rajon të bëra nga Mbreti i mëparshëm Husein. Siç është i përshtatshëm takimi im nesër me udhëheqësit fetarë myslimanë, me trupin diplomatik dhe me rektorët e Universitetit, takim ky që do të zhvillohet në xhaminë që mban emrin e tij. Angazhimi i tij për zgjidhjen e konflikteve në rajon shpresojmë të mund të vazhdojë të japë fryte në përpjekjet për të nxitur një paqe dhe një drejtësi të vërtetë për të gjithë ata që jetojnë në Lindjen e Mesme.

 Të dashur Miq, në seminarin e mbajtur në Romë vjeshtën e vitit të kaluar në Forumin Katoliko-Mysliman, pjesëmarrësit kanë diskutuar për rolin qendror që ka luajtur, në traditat tona fetare, urdhri i dashurisë. Unë sinqerisht shpresoj se kjo vizitë dhe të gjitha nismat e planifikuara për të nxitur marrëdhënie të mira mes të Krishterëve dhe Myslimanëve, të mund të na ndihmojnë të rritemi në dashurinë drejt Hyjit të Plotfuqishëm dhe të Mëshirshëm, si dhe në dashurinë vëllazërore të ndërsjellë. Faleminderit për mikpritjen tuaj, faleminderit për mirësjelljen tuaj. Hyji u dhashtë Madhërive të tyre lumturi dhe jetë të gjatë! Ai e bekoftë Jordaninë me begati dhe paqe!

titujt kryesorë

webmaster