Takimi me Lumturine e tij Krizostomi II, Kryepeshkop i Qipros

Pershendetja e Atit te Shenjte Benedikti XVI

Kryepeshkopata Ortodokse e Nikozisë, e shtunë, 5 qershor 2010

Lumturia juaj,

 Σε χαιρετώ με αδελφική αγάπη εν τω Αναστημένω Κυρίω. Σε ευχαριστώ για την θερμή σου υποδοχή. [Ju përshëndes me dashuri vëllazërore në Krishtin e Ngjallur dhe Ju falënderoj për përshendetjen tuaj të sjellshme të mirëseardhjes].

 E kujtoj me mirënjohje vizitën tuaj në Romë tre vjet më parë, dhe gëzohem që sot takohemi përsëri në tokën tuaj të dashur. Nëpërmjet jush përshëndes Sinodin e Shenjtë dhe të gjithë Meshtarët, diakonët, murgjërit dhe murgjëreshat si dhe besimtarët laikë të Kishës së Qipros.

 Para së gjithash dëshiroj të shpreh mirënjohjen time për mikpritjen që Kisha e Qipros i ka dhënë kaq bujarisht Komisionit Ndërkombëar për Dialogun Teologjik me rastin e takimit të vitit të kaluar në Pafos. Po ashtu jam mirënjohës për mbështetjen që Kisha e Qipros, me qartësinë dhe hapjen e ndihmesave të saj, i ka dhënë gjithmonë angazhimit të dialogut. Shpirti Shenjt e udhëheqtë dhe e përforcoftë këtë nismë të madhe kishtare, që synon të ribëjë bashkimin e plotë e të dukshëm mes Kishave të Lindjes e të Perëndimit, një bashkim që duhet të jetohet në besnikëri ndaj Ungjillit dhe ndaj traditës apostolike, në mënyrë që t’i vlerësojë traditat e ligjshme të Lindjes e të Perëndimit, dhe që të jetë e hapur ndaj larmisë së dhuratave nëpërmjet të cilave Shpirti ndërton Kishën në njësi, në shenjtëri dhe në paqe.

 Ky shpirt vëllazërie e bashkimi ka gjetur shprehje edhe në ndihmesën zemërgjerë që Lumturia Juaj ka dërguar, në emër të Kishës së Qipros, për ata që, vitin e kaluar, në Akuila, afër Romës, kanë vuajtur për shkak të tërmetit, dhe nevojat e të cilëve i kam përzemër. Në këtë shpirt, bashkohem me Ju, duke u lutur që të gjithë banorët e Qipros, me ndihmën e Zotit, të gjejnë urtinë dhe forcën për të punuar së bashku për një zgjidhje të drejtë të problemeve që duhen zgjidhur ende, duke u angazhuar për paqen e pajtimin dhe duke ndërtuar për brezat e ardhshëm një shoqëri që të dallohet për respektimin e të drejtave të të gjithëve, përfshirë edhe të drejtat e patjetërsueshme për lirinë e ndërgjegjes dhe lirinë e kultit.

Qiproja konsiderohet tradicionalisht si pjesë e Tokës së Shenjtë, dhe situata e konfliktit të vazhdueshëm në Lindjen e Mesme duhet të jetë një arsye reflektimi për të gjithë besimtarët e krishterë. Askush nuk mund të mbetet mospërfillës ndaj nevojës për t’u dhënë mbështetje në çdo mënyrë të mundshme të krishterëve të asaj krahine të munduar, me qëllim që Kishat e saj të lashta të mund të jetojnë në paqe e begati. Bashkësitë e krishtera të Qipros gjetshin një fushë shumë të frytshme për bashkëpunimin ekumenik, duke u lutur e duke punuar së bashku për paqen, pajtimin dhe stabilitetin në tokat e bekuara prej pranisë tokësore të Princit të Paqes.

 Me këto ndjenja, Lumturia Juaj, ju falënderoj edhe një herë për mirëseardhjen tuaj vëllazërore dhe dua t’ju siguroj për lutjet e mia për Ju dhe për gjithë klerin e besimtarët e Kishës së Qipros.

 H χαρά και η ειρήνη του αναστημένου Χριστού ας είναι πάντοτε μαζί σου. [Gëzimi i Zotit të ngjallur qoftë gjithmonë me ju!].

titujt kryesorë

webmaster