VIZITA “JEZUSIT FËMIJË TË PRAGËS”

PËRSHËNDETJA E ATIT TË SHENJTË

Kisha e Shenjtes Mari të Fitores në Pragë

E shtunë, 26 shtator 2009

Zotërinj Kardinalë,

Zotëri Kryetar i Bashkisë dhe Autoritete të nderuara,

të dashur vëllezër e motra,

të dashur fëmijë,

 jua drejtoj të gjithëve ju përshëndetjen time të përzemërt dhe shpreh gëzimin tim se po vizitoj këtë Kishë, të kushtuar Shenjtes Mari të Fitores, ku nderohet figura e Jezusit Fëmijë, e njohur ngado si “Fëmija i Pragës”. Falënderoj Imzot Jan Graubner, President i Konferencës Episkopale, për fjalët e tij të mirëseardhjes në emër të të gjithë Ipeshkvinjve. U drejtoj një përshëndetje plot respekt Kryetarit të Bashkisë dhe Autoriteteve të tjera civile e fetare, që kanë dashur të jenë të pranishëm në këtë takim. Ju përshëndes ju, të dashura familje, që keni ardhur të më takoni në një numër kaq të madh.

 Figura e Jezusit Fëmijë të bën menjëherë të mendosh për misterin e Mishërimit, për Hyjin e Gjithëpushtetshëm që është bërë njeri dhe ka jetuar për 30 vjet në familjen e përvuajtur të Nazaretit, të cilin Provania ia pati besuar mbrojtjes së kujdesshme të Marisë e të Jozefit. Mendimi shkon te familjet tuaja dhe te të gjitha familjet e botës, te gëzimet e tyre dhe vështirësitë e tyre. Reflektimit i bashkojmë lutjen, duke kërkuar prej Jezusit Fëmijë dhuratën e bashkimit dhe të harmonisë për të gjitha familjet. Mendojmë veçanërisht për familjet e reja, që duhet të bëjnë shumë përpjekje për t’u dhënë bijve të tyre sigurinë dhe një të ardhme dinjitoze. Lutemi për familjet në vështirësi, të vëna në provë prej sëmundjes e prej dhimbjes, për ato që janë në krizë, të ndara apo të përçara prej mosmarrëveshjes e prej pabesnikërisë. Të gjitha ia besojmë Fëmijës së Shenjtë të Pragës, duke e ditur se sa e rëndësishme është qëndrueshmëria e tyre dhe harmonia e tyre për përparimin e vërtetë të shoqërisë dhe për të ardhmen e njerëzimit.

 Figura e Jezusit Fëmijë, me ëmbëlsinë e fëmijërisë së tij, na bën të perceptojmë edhe afërsinë e Hyjit dhe dashurinë e tij. Kuptojmë se sa të çmueshëm jemi para syve të tij sepse, pikërisht falë Tij, jemi bërë edhe ne bij të Hyjit. Çdo qenie njerëzore është bir i Hyjit dhe prandaj vëlla i yni dhe, si i tillë, duhet pranuar e respektuar. Shoqëria jonë e kuptoftë këtë realitet! Kështu çdo person njerëzor do të marrë vlerë jo për atë që ka, por për atë që është, sepse në fytyrën e çdo qenieje njerëzore, pa dallim race e kulture, shkëlqen shëmbëlltyra e Hyjit.

 Kjo vlen sidomos për fëmijët. Në Fëmijën e Shenjtë të Pragës sodisim bukurinë e fëmijërisë dhe parapëlqimin që Jezu Krishti ka shfaqur gjithmonë ndaj të vegjëlve, sikurse lexojmë në Ungjill (krh. Mk 10,13-16). Ndërsa, sa shumë fëmijë nuk duhen, nuk pranohen, nuk respektohen! Sa prej tyre janë viktima të dhunës e të çdo forme të shfrytëzimit nga ana e personave pa skrupuj! Të miturve iu rezervoftë ai respekt dhe ajo vëmendje që meritojnë: fëmijët janë e ardhmja dhe shpresa e njerëzimit.

 Tani do të doja t’ju drejtoj një fjalë të veçantë juve, të dashur fëmijë, si dhe familjeve tuaja. Keni ardhur në numër të madh që të më takkoni dhe për këtë ju falënderoj prej zemrës. Ju, që jeni të parapëlqyerit e zemrës së Jezusit Fëmijë, të dini t’i përgjigjeni me dashuri dashurisë së tij, dhe, duke ndjekur shembullin e tij, të jeni të bindur, të sjellshëm e bamirës. Mësoni të jeni, sikurse Ai, ngushëllimi i prindërve tuaj. Jini miqtë e vërtetë të Jezusit dhe drejtojuni Atij gjithmonë me besim. Luteni për veten tuaj, për prindërit, të afërmit, mësuesit e miqtë tuaj, dhe luteni edhe për mua. Faleminderit përsëri për mikpritjen tuajd he me zemër ju bekoj, ndërsa mbi ju thërras mbrojtjen e Fëmijës së Shenjtë Jezus, të Nënës së Tij të Papërlyer dhe të shën Jozefit.

titujt kryesorë

webmaster