Vizite ne Caritas Baby Hospital

FJALET E ATIT TË SHENJTË BENEDIKTI XVI

Betlehem

E mërkurë, 13 maj 2009

Të dashur miq,

    ju përshëndes ngrohtësisht në emër të Zotit tonë Jezu Krishtit, “që ka vdekur, dhe është ngjallur dhe qëndron në të djathtë të Hyjit dhe ndërhyn për ne” (krh. Rom 8,34). Që besimi juaj në ngjalljen dhe në premtimin e tij për një jetë të re nëpërmjet Pagëzimit të mund të mbushë zemrat tuaja me gëzim në këtë kohë pashkore!

 Ju jam mirënjohës për mirëseardhjen e ngrohtë që më keni drejtuar në emër të Atë Michael Scheiger, President i Shoqatës Kinderhilfe, Zotit Ernest Langensand, i cili po përfundon mandatin e tij si Kryeadministrator i Caritas Baby Hospital, dhe Nënë Erika Nobs, Nëna Eprore e këtij komuniteti lokal të Motrave Elizabetine Françeskane të Padovës. Përshëndes përzemërsisht edhe Arqipeshkvin Robert Zollisch dhe Ipeshkvin Kurt Koch, që përfaqësojnë respektivisht Konferencat Ipeshkvnore gjermane dhe zviceriane, që kanë bërë të eci përpara misoni i Caritas Baby Hospital nëpërmjet ndihmës së tyre financiare.

 Hyji më ka bekuar me këtë mundësi t’i shpreh administratorëve, mjekëve, infermierëve dhe personelit të Caritas Baby Hospital vlerësimin tim për shërbimin e paçmuar që u kanë ofruar-dhe vazhdojnë t‘u ofrojnë-fëmijëve të rajonit të Betlehemit dhe të mbarë Palestinës për më shumë se pesëdhjetë vjet. Atë Ernst Schnydrig e themeloi këtë strukturë në bindjen se fëmijët e pafajshëm meritojnë një vend të sigurt nga çdo gjë që mund t’u bëjë atyre keq në kohë dhe në vende konfliktesh. Falë përkushtimit të Children’s Relief Bethlehem, ky institucion ka qenë një oaz i qetë për më të pambrojturit dhe ka ndriçuar si një fener shprese rreth mundësisë që dashuria ka për të mbizotëruar mbi urrejtjen dhe paqja mbi dhunën.

 Të rinjve të pranishëm dhe anëtarëve të familjeve të tyre që marrin të mira nga ndihma juaj, dua thjeshtë t’ju them: “Papa është me ju”! Sot ai është me ju personalisht, por çdo ditë ai shoqëron shpirtërisht secilin nga ju në mendimet dhe në lutjet e tija, duke i kërkuar të Gjithëpushtetshmit të ruaj mbi ju me vëmendjen e tij të kujdesshme.

 Atë Schnydrig e përshkroi këtë vend si “një nga urat më të vogla të ndërtuara për paqen”. Tani, që është rritur nga katërmbëdhjetë shtretër portativ në tetëdhjetë shtretër, dhe duke u kujdesur për nevojat e miliona fëmijëve çdo vit, kjo nuk është më një urë e vogël! Ajo mirëpret së bashku persona të origjinave, gjuhëve dhe besimeve të ndryshme, në emër të Mbretërisë së Hyjit, Mretërisë së Paqes (krh. Rom 14,17). Ju inkurajoj nga zemra që të vazhdoni në misionin tuaj për të treguar dashuri për të gjithë të sëmurët, të varfrit dhe të dobëtit.

 Në këtë Festë të Zojës Sonë të Fatimës, dëshiroj ta mbyll duke thirrur ndërmjetësimin e Marisë ndërkohë që i jap Bekimin Apostolik fëmijëve dhe të gjithëve ju. Të lutemi:

 Maria, Shëndeti i të Sëmurëve, Strehë e Mëkatarëve, Nëna e Jezu Krishtit: ne i bashkohemi shumë brezave që të kanë thirrur të “Bekuar”. Dëgjoji bijët e tu ndërkohë që e thërrasin emrin tënd. Ti u ke premtuar tre fëmijëve të Fatimës: “Në fund, Zemra ime e Papërlyer do të fitojë”. Kështu ndodhtë! Që dashuria të fitojë mbi urrejtjen, solidariteti mbi ndarjen dhe paqja mbi çdo formë dhune! Dashuria që ke pasur për Birin tënd na mësoftë ta duam Hyjin me gjithë zemër, me të gjitha forcat dhe me gjithë shpirt. I Gjithëpushtetshmi na e tregoftë mëshirën e Vet, na forcoftë me fuqinë e Vet, dhe na mbushtë me çdo të mirë (krh. Lk 1,46-56). Ne i kërkojmë Birit tënd Jezus t‘i bekojë këto fëmijë dhe të gjithë fëmijët që vuajnë në mbarë botën. Të mund të kenë shëndetin e trupit, forcën e mendjes dhe paqen e shpirtit. Por mbi të gjitha, që të dinë që duhen me një dashuri që nuk njeh kufizime dhe kufij: me dashurinë e Krishtit që kalon çdo kuptim (krh. Ef 3,19). Amen!

titujt kryesorë

webmaster