SHKOLLA “ZEMRA E KRISHTIT” FESTON 10-VJETORIN E HAPJES

Me rastin e 10-vjetorit të hapjes së shkollës 9-vjeçare “Zemra e Krishtit” në Shkodër, u organizua një mbrëmje festive-jubilare në teatrin “Migjeni” të Shkodrës. Morën pjesë autoritet fetare dhe civile Imzot Angelo Massafra, Drejtoresha e drejtorisë arsimore Shkodër Znj. Atrida Ferketi dhe inspektorë të kësaj drejtorie, Drejtueset e Motrave te Kraharorit te Shenjtë Nëna Superiore M. Fides Sebis, të gjithë projektuesit dhe zbatuesit e kësaj vepre.

Për 10 vite kjo shkollë ka ecur me hap të sigurt duke u rritur çdo vit. Stafi pedagogjik i kësaj shkolle - më në krye drejtoreshën e tyre Motër Vitalba është e mjaft përgatitur dhe mban në gjirin e saj mbi 700 nxënës e fëmijë kopshti.

Spektakli - i përbërë nga këngë, kërcime, të ndërthurura këto me kujtime të sjellura nga nxënës e mësues të kësaj shkolle - u përgatit nga vetë nxënësit e kësaj shkolle të ndihmuar nga i gjithë stafi i mësuesve.

Në fund mësuesit e kësaj shkolle me M. Vitalben, të bashkuar me nxënësit, kënduan këngën përshëndetëse si një himn, për të uruar edhe 100 vite të tjera.

Falënderime

Më kujtohet në këtë 10 vjetor të shkollës një ëndërr e viteve më parë. Atëherë, kur u rihapën kishat në vitin 1991, ëndërroja që në Shkodër të rihapen shkollat që drejtohen nga njerëzit e përkushtuar të fesë. Ishte e nevojshme ndryshimi i njeriut, të edukuarit ndryshe i shpirtit të tij të shpërfytyruar në regjimin diktatorial. Dhe ishte pikërisht M. Vitalba Motolese, e karakterizuar nga gjallëria, e cila arriti të hapte të parën herë parashkolloren, duke vijuar vit pas viti në shkollën 9-vjeçare.

Në këtë moment do t'i drejtohemi me mirënjohje dhe falënderim atyre që dhuruan për ne shkollën, për Shkodrën, për fëmijët tanë: për ish-Nënën eprore të Motrave të Kraharorit të Shenjtë, Nënë Pjerfranca Crobe, për M. Immacolata, e cila e ka ndjekur lindjen e këtij ndërtimi, për inxhinierin Giovanni Silvestri, i cili e ka projektuar këtë vepër të madhe e që sot e kemi mes nesh, për zbatuesit e këtij projekti, vëllezërit inxhinierë, Alfred, Aleksandër e Ilir Bushati. Alfredi, i ndarë nga jeta disa muaj më parë, ka mbetur në kujtimin tonë të përhershëm. Kanë bashkëpunuar me përkushtim inxhinier Sokol Prendushi e Mimoza Aliku. Inxhinier Marko Currin duhet ta falënderojmë për kompletimin e shkëlqyer të shkollës 9-vjeçare. E për të gjithë të tjerët që punuan, që bashkëpunuan në mënyra të ndryshme në këtë ndërtim, për çdo punëtor, del falënderimi i përzemërt.

Viti shkollor 2005-2006 shënon përfundimin e ciklit të plotë 8-vjeçar të brezit të parë. Përfundim me sukses, nderohet dhe shpërblehet puna e përkushtimi i këtij stafi të kompletuar pedagogjik me në krye M. Vitalben. Janë rezultatet e mrekullueshme që arrihen me një mesatare 8,6. Në klasat e teta, rreth 50% e nxënësve paraqiten me 9 dhe 10 në provimet e lirimit.

Shumë domethënëse janë arritjet e nxënësve tanë në olimpiadat e matematikës lokale e kombëtare. Gerti Dajti, Mario Banushi e Klaudia Marku, janë fitues të çmimeve të para dhe të tre kanë përfaqësuar Shkodrën e shkollën tonë në olimpiadën kombëtare, ku zunë përsëri vende nderi.

Në konkursin shkencor kombëtar organizuar nga Kolegji Turk në Tiranë, nxënësit tanë kanë fituar pikët që e kanë renditur shkollën tonë të parën ndër rreth 115 shkolla të Republikës. Kështu ka vazhduar edhe brezi i dytë i vitit 2006-2007 me Elton Dajtin e Jozef Lulin, fitues të olimpiadave dhe me një përqindje të lartë përsëri të nxënësve që vlerësohen shumë mirë në fund të vitit.

Gjithnjë i referohemi edhe ballafaqimit me shkollat e tjera, duke krahasuar nivelin e arritjeve pikërisht në konkurset e organizuara për hyrjen në shkollën e mesme Pjetër Meshkalla. Vitin e parë kanë fituar 70% e nxënësve pjesëmarrës dhe në vitin pasardhës 67% e nxënësve. 100% e nxënësve tanë vazhdojnë shkollat e mesme. I kemi ndjekur nxënësit tanë edhe në shkollat e tjera të mesme dhe dëgjojmë fjalë të mira për formimin e përgjithshëm të tyre.

Shpresojmë se rrugën e nisur, të ndriçuar nga mësimet dritëdhënëse të Jezusit që na shikon, na ndihmon e na jep forcën, mendjen e dijen, të ecim gjithmonë përpara për fëmijët e brezave që vijnë.

Urojmë përzemërsisht: Edhe për shumë vjet të tjera në rrugë të mbarë!

Loreta Prela

 titujt kryesore

webmaster