TAKIMI I JUNIOREVE

Më 14 - 16 dhjetor, në seminarin Ndërdioqezan Shkodër, është bërë takimi i Junioreve. Në këtë takim ishin të pranishme rreth 20 veta. Takimi këtë rrallë u mbajt nga atë Gjovanni Salustri C.S.I. si dhe nuk na mungoi prania e Shkëlqesisë së tij Imzot Angelo Massafra, i cili erdhi të shtunën në mbrëmje për t'u lutur me ne, në lutjen e Mbrëmësores dhe më pas bashkëndamë darkën. E falënderojmë Ipeshkvin që gjithmonë na shoqëron me lutjen e Tij.

Tema ishte, “Ndërgjegjja dhe e mira morale”. Atë Gjovanni theksoi se si ne duhet ta jetojmë jetën tonë rregulltare me një “ndërgjegje” të formuar e të prirë me vlerat morale, që janë baza e një zhvillimi shpirtëror dhe njerëzor. Mes të tjerash ai theksoi fjalët e shën Buonaventurës, që e quan: “Ndërgjegjja është Lajmi i Zotit, është zëri që thërret fortësisht dhe butësisht”; ndërsa murgjit Cisterçensë thonë se: “Është lidhja jonë martesore me Zotin, është mbretëresha e stolisur në pritje të Dhëndrit”; shën Augustini thoshte: “Është humnera në të cilën banon Zoti që është i vetmi dëshmitar i saj”. Për ne ishte një shtytje më e madhe për të qenë gjithnjë e më të vëmendshme ndaj këtij zëri që flet në brendësinë tonë. E mira morale theksoi se është ajo që lind me të vërtetën. Dhe e Vërteta është Dashuri, pikërisht ajo Dashuri që është mishëruar në trupin Virgjëror (Krishti). Takimi i ynë u mbyll të dielën në mëngjes me Meshën e Shenjtë në Kishën Katedrale. Shpresojmë që çdo gjë e thënë të rritet e të bëhet vlerë për jetën tonë rregulltare, që të mundemi t'ua shfaqim të gjithëve bukurinë e jetës së Krishterë.

Motër Mimoza Jaku

  titujt kryesore

webmaster