IMZOT LUCIAN AVGUSTINI SHUGUROHET

IPESHKËV I DIOQEZËS SË SAPËS  

Pas emërimit të ish-Ipeshkvit të Sapës, Imzot Dodë Gjergji, si Administrator Apostolik i Prizrenit, Ati i Shenjtë Papa Benedikti XVI, emëroi më 12 dhjetor 2006 Ipeshkëv të Sapës Imzot Lucian Avgustini, ish Vikar i Përgjithshëm dhe Famullitar i Katedrales në Shkodër.

Për nder të emërimit të tij në dinjitetin ipeshkvnor, me datën 5 janar 2007, në Katedralen e Dioqezës së Sapës, kushtuar së Lumes Nënë Tereza në Vau-Dejës, u zhvillua ceremonia e Shugurimit Ipeshkvnor. Të bashkuar me gëzimin e kësaj dite, mijëra besimtarë rendën drejt Katedrales për të marrë pjesë në këtë ceremoni.

Nderonin me pjesëmarrjen e tyre, krerët më të lartë të Kishës në Shqipëri, Imzot Angelo Massafra, Imzot Rrok Mirdita, Ipeshkvi i ri i Kosovës Imzot Dodë Gjergji, Ipeshkvi i Tivarit Imzot Zef Gashi, ipeshkvij të tjerë, meshtarë e motra të Sapës, autoritete fetare e civile të Shkodrës, Shqipërisë, Kosovës, Malit të Zi etj.

LITURGJIA E SHUGURIMIT

Ceremonia e Shugurimit filloi me këngën e hyrjes “Bekuar qofsh Betlehem”. I shoqëruar nga Vikari i Përgjithshëm Dom Karlo Fantini dhe Kancelari Dom Simon Kulli, i zgjedhuri është paraqitur para Shuguruesit Sh.Tij Imzot Angelo Massafra. Në fillim të ceremonialit ka përshëndetur ish-Ipeshkvi i Sapës, tashmë Ipeshkvi i Kosovës Imzot Dodë Gjergji. Pasi shprehu gëzimin dhe kënaqësinë në emër të Administraturës Apostolike që i është besuar, uroi  Imzot Lucianin që, në trashëgiminë e Selisë së Sapës, shpirti i Zotit të jetë frymëzuesi themeltar për të gjitha ditët e shërbimit të tij në këtë Dioqezë.

Pas riteve të fillimit të Meshës dhe leximeve, ka vazhduar me homelinë e rastit Shuguruesi Imzot Angelo Massafra. Gjatë homelisë së tij, ai vuri në dukje rëndësinë e të qenurit Ipeshkëv. “Për këtë popull të veçantë mesianik që është Kisha tha ai, ti, Imzot Lucian, sot bëhesh Bari nëpërmjet Shugurimit Ipeshkvnor. Krishti të bën mbarështues të vetin dhe të thërret të jesh misionar i Ungjillit të tij. Kush është Ipeshkëvi? Cilat janë detyrat?” Nisur nga disa reflektime të marra nga teologu Bruno Forte dhe nga Papa Gjon Pali II, Imzot Massafra tha se, “Ipeshkëvi është krijesë e fjalës së Hyjit, është kumtues i fjalës së jetës, njeri i dëgjimit të bindur dhe besnik të Fjalës që vjen prej heshtjes. Ipeshkvi është mësues i fesë dhe Atë i Dashurisë, njëkohësisht është dhe dëshmitar i shpresës. Të qenurit Ipeshkëv, ka në vetvete diçka prej kryqit, prandaj Kisha e vë Kryqin në kraharorin e Ipeshkvit. Mos i druaj errësirat e botës, Imzot Lucian, sepse, Ai që të dërgoi është Jezusi, “drita e botës”, ka përfunduar Imzot Massafra.

Menjëherë pas homelisë së Presidentit të Asamblesë, sipas traditës antike të etërve të shenjtë, i zgjedhuri, pas zotimeve të tij, është pyetur në prani të popullit mbi ruajtjen e fesë dhe mbi ushtrimin e ministerit të vet. “Po” kanë qenë përgjigjet e tij, duke u zotuar që të predikojë me besnikëri e ngulm Ungjillin e Krishtit, dhe duke ruajtur të pastër e të plotë fenë sipas traditës së ruajtur gjithmonë e kudo në Kishë që nga kohët e apostujve. Shoqëruar nga këndimi i litanive, për disa minuta Imzot Avgustini  ka qëndruar i shtrirë duke lënë të nënkuptohej se ishte i gatshëm deri në vdekje për të zbatuar shërbimin që i është besuar. Me lutjen drejtuar Hyjit, Shuguruesi ka lutur që Hyji i Gjithëpushtetshëm dhe i mëshirshëm, t’i mundësojë këtij të zgjedhuri të ri pasurinë e hirit të tij për të mirën e kishës. Imzot Luciani është gjunjëzuar para shuguruesit Massafra, i cili i ka vënë duart mbi kokë duke i dhënë bekimin e Zotit. E të njëjtin rit kanë kryer edhe ipeshkvijtë e tjerë. Ndërsa vendosja e librit të Ungjijve  të hapur mbi kokën e të zgjedhurit deri në fund të lutjes së Shugurimit, dëshmoi si shenjë e detyrës që bie mbi të në shpalljen e Ungjillit nëpër botë. Gjithashtu, Ipeshkvi i ri, i gjunjëzuar para shuguruesit, mori lyerjen me vajin e krizmës nëpërmjet formulës: “Hyji që të ka bërë pjesëmarrës të meshtarisë më të lartë të Krishtit, përhaptë mbi ty lyerjen e tij mistike dhe me begatinë e bekimit të Tij i dhëntë frytshmëri ministerit tënd.

Rituali ka vazhduar me shenjat e tjera si unazën, mitrën dhe shkopin baritor. Dhe me marrjen e këtyre shenjave, Ipeshkvi i ri Imzot Luciani u ftua të ulet në katedrën e re si shenjë e pranimit dhe marrjes së detyrës: Ipeshkëv i Dioqezës së Sapës.

Një përshëndetje të veçantë bëri edhe Imzot Rrok Mirdita, i cili vlerësoi punën e bërë të Imzot Lucianit, për 12 vjet në Arqipeshkvinë Shkodër-Pult. “E pikërisht, këtu, në trashëgiminë historike të Sapës, Hyji ju ka thirrur për të shpallur lajmin e Tij të mirë”, tha Imzot Mirdita. Ai gjithashtu, i siguroi se si ipeshkëv i ri gjen një mirëseardhje të ngrohtë në Konferencën Ipeshkvore dhe një mbështetje të sinqertë vëllazërore.

Në fund të kësaj shërbese eukaristike, Imzot Lucian Avgustini, falënderoi Zotin për nderin që i bëri, “dhe më jep fuqinë e urtinë tha ai, në mënyrë që të mund të punoj në këtë tokë martire, në këtë Dioqezë që ma besove po me të njëjtën dashuri dhe flijim sipas shembullit të paraardhësve të mi si: Budit, Bardhit, Mjedës, Serreqit, Kolecit, Thaqit, Prennushit, Volaj dhe së fundmi Imzot Dodë Gjergjit, të cilin posaçërisht e falënderoj për punën e bërë deri më sot; për çdo djersë të ballit të derdhur; për çdo mësim, këshillë dhe fjalë që ia ka dhuruar kësaj Dioqeze në rimëkëmbjen e saj.

Violeta Marashi

 titujt kryesore

webmaster