Të bashkuar në emër të Zotit

Takim me emigrantët në Itali

Prej disa vitesh, me iniciativën e Arqipeshkvit Metropolit Shkodër-Pult, Imzot Angelo Massafra, jemi duke zhvilluar misionin për emigrantët të cilët gjenden në Itali. Gjatë këtyre viteve të fundit janë zhvilluar shtegtime të ndryshme në shenjtëroren e Zojës së Këshillit të Mirë në Gjenacan. Si përgjegjës për emigrantët në dioqezën e Shkodrës për disa javë zhvilluam misionin tonë nëpër dioqeza të ndryshme të Italisë, përgjatë disa ditëve të tetorit 2006.

Savigliano, Torino, 8 tetor

Me këtë  rast, bashkësia e Savaglianos bëri një dëshmi të mrekullueshme me famullitarin e palodhur Dom Sergjon. Për t’i konkretizuar mirë gjërat, çdo të premte, në kripten e Shën Andreut lutet në gjuhën shqipe Rruzarja e Shenjtë. Gjatë qëndrimit tim në këtë vend m’u dha mundësia që të kremtoj Meshën dhe ishin të pranishëm mbi 100 vetë. Në mbarim të kremtimit të gjithë të pranishmit u zhvendosën në sallonin e famullisë për një moment vëllazërimi dhe feste me këngë dhe muzikë shqiptare. Gjatë qëndrimit tim aty kam takuar një numër të madh besimtarësh të dioqezave tona të Shqipërisë. Kam pasur takime me grupin misionar të Shën Andreut dhe me presidentin e Këshillit Komunal të Saviglianos.

Saluzo, 15

Tashmë misioni ynë kishte marrë formën e vërtetë të apostullimit dhe nga me kalimin e kohës ditët bëheshin më shumë impenjative. Të dielën më 15, u gjendëm në Kishën e Vergine Consolata në Saluzo për të kremtuar Meshën e shenjtë. Prania e shumë besimtarëve i dha një gëzim shumë të madh kremtimit eukaristik. Mesha në gjuhën shqipe, leximet dhe këngët edhe një herë bënë një kalim në tokën nënë të origjinës. Në fund të kremtimit një falënderim ia kushtua edhe Dom Antonios dhe Motrave që mundësuan atmosferën e të qenurit në Shqipëri.

Pistona, 18

Duke u mbështetur në vlerat që populli ynë i ruan në kujtesën e tij, ku drejtuam nga një tjetër bashkësi, në atë të Pistoies.  Edhe këtu patëm nderin të ishin mysafirë në bashkësinë e Fraternità Apostolica di Gerusaleme dhe gjithçka ishte e përgatitur pothuajse në mënyrë të përkryer. Shërbimin misionar e ushtruam duke u takuar me shumë familje emigrantësh dhe duke u njohur me problemet e tyre, të cilat kohët e fundit nuk janë të pakta. Në gjirin e shqiptarëve të Pistoies ekziston grupi i lutjes dhe grupi i të rinjve që udhëhiqen nga Fra Ilia Matia dhe takimet e tyre janë të përjavshme. Kurorëzimi i misionit tonë në Pistoia u bë me rrëfimet.

Padova 22

Një numër i madh besimtarësh me qëndrim në Itali morën pjesë në shtegtimin që bënë në Kishën e Shën Antonit në Padova. Në Meshën që kremtova ishte i pranishëm edhe Fra Ilia Matia dhe disa miq italianë të cilët u mrekulluan nga përshpirtëria jonë për Shën Antonin. Shtegtimi ynë në kishën e  tij mbetet një ndër përvojat më të bukura dhe mbresëlënëse, pasi njerëzit ishin të bashkuar nga të katër anët në emër të Zotit dhe duke lënë të kuptohet se shqiptarët kanë një thesar të fshehur të cilin etërit e shpirtit duhet ta zbulojnë.

Në nder e lavdi të të madhit Zot dhe të Shën Antonit, duke marrë hiret dhe bekimet prej tyre, u ndamë me shpresën se do të takohemi përsëri në takime të tilla.

Dom Nikolin Toma

 titujt kryesore

webmaster