ArqipeshkviaFamulliteInstitutet rregulltareZyra per martiretCaritasShtypi dioqezanFshati i paqesArkiv

KARITAS: 10-VJETORI I THEMELIMIT

 

 

 

Në Vigjiljen e festës së ditës së Karitasit, 11 dhjetor 2010, që me vendim të Konferencës Ipeshkvnore të Shqipërisë, çdo vit kremtohet të Dielën e tretë të Ardhjes, Dioqeza e Sapës kremtoi 10-vjetorin e themelimit të Caritas-it Dioqezan të saj, me pjesëmarrjen e një numri të konsiderueshëm të besimtarëve, Meshtarëve, Motrave, Vullnetarëve dhe miqve të Karitasit. Kjo ditë filloi me kremtimin e Meshës së Shenjtë në Katedralen Nënë Tereza në Vau-Dejës, udhëhequr nga Ipeshkvi i vendit Imzot Lucjan Avgustini. Të ftuarit specialë të kësaj dite ishin personat me aftësi të kufizuar, të quajtur ndryshe miqtë e Nënë Terezës. Duke u kujdesur për ata që kanë nevojë, për të varfrit, të sëmurët dhe të nëpërkëmburit, Kisha e kryen misionin e saj të shpalljes së Ungjillit, por edhe i vërteton njeriut në emër të Krishtit, dinjitetin e tij. Ky mision i Kishës buron prej Fesë për Shëlbimin e të gjithëve, prej Shpresës në një drejtësi të plotë, prej Dashurisë që i bën të gjithë njerëzit vërtetë vëllezër e motra në Krishtin. Zoti është bërë një me të uriturin, me të sëmurët, me të zhveshurit dhe me të pastrehët. Këto ishin fjalët e Imzot Lucjanit mbajtur në predikimin e rastit.

Organizuar nga stafi i Karitasit dhe drejtori i këtij institucioni Dom Simon Kulli, pas Meshës u mbajt edhe konferenca me titull “10 vite Karitas”. Në punimet e kësaj konference ishin të ftuar të referonin Ipeshkvi i Sapës, Meshtarët dhe Kryetari i Bashkisë së Qytetit Vau-Dejës. Të bashkuar në këtë takim vëllazëror për të reflektuar mbi Karitasin, ndryshe të quajtur Dashuri dhe bamirësi, por dhe zëri i Ungjillit në zemrat e secilit, Konferenca u hap me fjalën e Drejtorit të Karitasit Dom Simoni, i cili bëri një përshkrim të të gjithë veprimtarisë së kësaj organizme kishtare gjatë 10 viteve të jetës së saj. Ai tha se “që nga themelimi dhe organizimi i Karitasit në dioqezën tonë është munduar me të gjitha forcat që të realizohen objektivat dhe projektet e miratuara në çdo fushë të jetës shoqërore, sociale dhe kulturore”.

Mbi “Rëndësinë e Karitasit në Kishë” - konkretisht në Dioqezën e Sapës, Imzot Avgustini theksoi disa mendime, ku së pari u ndal në shpjegimin e fjalës Karitas, e cila buron prej fjalës latine që do të thotë Dashuri ose vepër prej dashurisë. Karitasi Shqiptar apo Dioqezan punon për përmirësimin e kushteve të jetesës së njerëzve më të varfër dhe më në nevojë në Shqipëri, në mënyrë që edhe ata të mund të jetojnë një jetë më të denjë njerëzore. Si bari dioqezan, duke përfunduar, Imzot Avgustini theksoi se ndoshta kontributet tona janë si një pikë e vogël, por na mëson ajo, e cila është munduar ta tregojë dashurinë në vepër, e Lumja Nënë Tereza, se pa këtë pikë, oqeani i mjerimit kishte me qenë më i varfër.

Pas referimit të të gjithë të ftuarve, menjëherë në sallën e pritjes u hap një ekspozitë fotografike ku tregonin më së miri punën, misionin dhe veprën e Karitasit ndër vite.

Violeta Marashi

 

titujt kryesore

 
 
> Kisha Katolike Shkoder <

webmaster