LAJME NGA DIOQEZA E SAPËS

VIZITA BARITORE E IPESHKVIT NË  DEJË, SHELQET, GRASH

Nga data 17-23 janar 2009, Ipeshkvi i vendit, Imzot Lucjan Avgustini zhvilloi vizitën baritore në famullitë Lindja e Zojës – Dejë, Shën Gjon Bosko – Shelqet dhe Shën Nikolli në Grash. I pritur nga famullitari Dom Genc Tuku, motrat e Zojës së Papërlyer, dhe motrat Dorote, Ipeshkvi e filloi vizitën e tij, me kremtimin eukaristik të ditës së Shtune (17 janar) në famullinë e Shën Nikollit në Grash, dhe të Dieles (18 janar) në famullitë Dejë dhe Shelqet. Në emër të të gjitha bashkësive, famullitari Dom Genc Tuku i uroi mirëseardhjen Imzot Lucjan Avgustinit dhe e falenderoi që gjendet në mesin e këtyre besimtarëve, duke u ndjerë kështu si një familje që takohet me Atin dhe Bariun e shpirtrave. Ndërsa në predikimin e rastit që Ipeshkvi mbajti gjatë kremtimeve në të tria famullitë, theksoi mbi të gjitha rëndësinë e të qenit i krishterë. Sa më tepër i afrohemi Zotit, aq më shumë e imitojmë me mënyrën e të jetuarit, aq më tepër do ta realizojmë njerëzimin tonë. Njeriu është i krijuar prej Hyjit në modelin e Birit të vet, Jezu Krishtit. Prandaj, thirrja e njeriut është që, të jetojë si ka jetuar Jezusi. Vetëm të mbështetur në themelet e Krishtit dhe mësimet e tij, ne mundemi të ndërtojmë një jetë më të mirë.

Menjëherë pas meshëve, Ipeshkvi është ndalur të bisedonte me mbarë popullin e Zotit. Ndërkohë që, gjatë ditëve të tjera, sipas programit të përgatitur nga famullitari, ka zhvilluar takime me grupe të ndryshme si kryefamiljarët, katekistat, të rinjtë, bashkëpunëtorët, grupet e lutjeve, me stafet pedagogjike të shkollave, me përfaqësues të pushtetit lokal si dhe me përfaqësuesit e institucioneve të ndryshme që veprojnë në këto famulli. Në takimin me kryefamiljarët ku u diskutua gjendja aktuale e familjes, Imzot Lucjani porositi që të gjithë si prindër të kenë një kujdes tepër të madh dhe respekt ndaj fëmijëve, të krijohet një dialog i mirëfilltë mes dy palëve, në mënyrë që çdo gjë të rrjedhë ashtu siç duhet. Edhe në takimin me të rinjtë, ipeshkvi ka dialoguar me ta duke iu dhënë mesazhin që ta ndërtojnë jetën mbi Krishtin, ta pranojnë me gëzim fjalën e tij dhe t'i vënë në jetë mësimet e tij.

titujt kryesore

webmaster