VIZITA BARITORE NË BARBULLUSH - KUKËL

E Enjte 4 Dhjetor 2008, ora 9.00: Një ditë krejt e veçantë nga ditët e tjera. Porsi grigja që ka nevojë ta shohë dhe ta dëgjojë zërin e Bariut të vet, ashtu i gjithë populli i Barbullushit po priste me gëzim të madh ardhjen e Imzot Angelo Massafrës. Ishte një ditë me shi dhe erë, por kjo nuk e ndali dot vërshimin e këtyre njerëzve. Që nga Barbullushi qendër e deri në Bushat turma-turma njerëzish ishin mbledhur për të pritur këtë person të dërguar nga Zoti.

Edhe vetë Shkëlqesia e Tij e respektoi shumë këtë pritje, zbriti nga makina, ashtu nëpër shi, duke u përshëndetur me të gjithë në kryqëzim të Bushatit, i shoqëruar nga vetë kryetari i komunës  zoti Zef Hila. Kjo ishte ndalesa e parë. Ajo që të bën më shumë përshtypje ishte ndalesa e tij në qëndër të Barbullushit, ndërkohë që shiu vazhdonte të binte edhe më furishëm. Imzot Angelo Massafra u ndal pikërisht aty në qendër, ku populli kishte dalë për ta pritur. Imzoti u ndal nën strehën e ballkonit të një dyqani, pronar i të cilit ishte një individ i fesë myslimane, dhe njerëzit aty i përshëndeti përzemërsisht. “Ky fakt tregon se në mes këtij  populli ka mirëkuptim e bashkëpunim, flasim për paqe e vëllazërim - tha Imzot Angelo Massafra, - kjo falë marrëdhënieve të mira që ka krijuar edhe Komuna Bushat me komunitetet fetare, çfarëdo lloj feje qofshin ato. Pasi na falënderoi për pjesëmarrjen edhe pse në kohë me shi, në shenje paqeje, qetësie dhe bekimi Imzot Angelo Massafra lëshoi dy pëllumba të bardhë.

Pastaj, ashtu siç ishim të bashkuar, vazhduam rrugën për tek ndërtesa e Zotit - Kisha. Gjatë rrugës kishin dalë turma-turma njerëzish për të na pritur, e bashkoheshin me ne.

Hymë në Kishë, e cila menjëherë u mbush me një atmosferë festive dhe fëmijët e kopshtit të motrave me zërin e ëmbël  të tyre i dhanë një përshëndetje të kënaqshme Imzotit. Pastaj të gjithë ashtu të mbledhur së bashku si për një festë krejt familjare, i kënduam Zotit një këngë të cilën na e mësoi vetë Shkëlqesia.

Pas dreke, po të njëjtën ditë u zhvillua takimi me të rinjtë, një kënaqësi e vërtetë. Imzot Massafra e sheh këtë rini të mrekullueshme tek po rritet çdo ditë e më shumë në grigjën e madhe të Zotit. Kjo rini, i drejton Shkëlqesisë shumë pyetje, për të ditur sa më shumë gjëra në lidhje me Zotin, pyetje të cilave Imzoti iu përgjigj me një kënaqësi të madhe dhe me fjalë të ëmbla  tamam ashtu si di t'i drejtohet Bariu grigjës së vet.

Në orare të ndryshme Imzot Angelo Massafra vazhdoi serish vizitën e tij në Hoten dhe në Kukel, ku u prit me një gëzim të madh, nga bashkësitë fetare si nga shkollat e shtetit, dhe gjithçka shkoi mirë. Me të vërtetë një mbresë që s'ka përshkrim.

E Premten 5 Dhjetor ora 9.30: vizita Baritore vazhdoi në fshatin Hotën në shkollën katërvjeçare, ku fëmijët e pritën Imzotin me disa këngë dhe poezi të veçanta. Shkëlqesia u dha kurajë të gjithë nxënësve që të jenë sa më të mirë, inteligjentë dhe të dëgjueshëm ndaj mësuesve dhe prindërve, dhe shtoi – “kur truri pushon kalbet, por sa më shumë që punon truri jonë aq më shumë zhvillohet”-.

Gjithë populli i fshatit Hoten ka mbetur shumë i kënaqur për vizitën dhe për ndërtimin e kishës së Hotnit, dhe e falënderon Imzotin për të gjitha premtimet që i ka realizuar.

E Diel 7 Dhjetor ora 10.00:  Kisha plot e përplot e mbushur si asnjë herë. Populli i Barbullushit mblidhet për të kremtuar Meshën e Shenjtë me  Bariun e vet të dashur Imzot Angelo Massafra. Pasi u lexuan Fjalën e Zotit, Imzoti, shtjelloi më mirë letrën e Shën Pjetrit Apostull, i cili kërkonte vazhdimisht paqe e bashkim për njerëzimin. Këtu Imzoti theksoi disa pika më të rëndësishme dhe tha: “ Ligjet e Zotit janë për ne si shinat për trenin, në qoftë se treni del jashtë shinave mund të rrezikoje. Kështu ndodh edhe në jetën tonë shpirtërore, nëse nuk i zbatojmë urdhërimet e Zotit”. Ai shtoi përsëri: “ Të dashur besimtarë, jeta jonë dhe e ardhmja e jonë m'varen vetëm nga Zoti dhe jo nga robi, në këtë rast mund të jenë fallxhorët, të cilët mundohen t'i tregojnë të tjerëve të ardhmen e tyre, por në fakt i mashtrojnë njerëzit, prandaj nuk janë për t'u besuar”. Shkëlqesia e Tij theksoi edhe se jeta e njeriut i përket vetëm Zotit, prandaj askush nuk ka të drejtë të vrasë dhe të hakmarrë.“Tani po afrohen edhe festat – tha Shkëlqesia e Tij – në festa priten edhe miq – vazhdoi ai-, edhe ne, atëherë kështu duhet të jemi, të bashkuar gjithmonë si një familje e madhe që grumbullohet rreth Sofrës së Zotit me miq e dashamir.

Mbas kremtimit të Meshës u bë një takim i shkëlqyeshëm me të gjithë besimtarët  të cilëve Imzot Massafra shpjegoi shumë mirë disa gjëra të nevojshme  mbi familjen dhe kurore e martesë.

Imzot Angelo Massafra kremtoi meshën në Kukël në orën 12.00 me dom Nikë Ukgjinin dhe në orë n 15.00 pati takim me fëmijët. Të nesërmen vizitoi disa të sëmurë dhe fëmijët e shkollës fillore.

E Merkurë 10 Dhjetor ora 9.00: vazhdoi Vizita Baritore tek të sëmurët dhe tek ato familje që tash kohet e fundit kanë patur tragjedi vdekjeje. Të gjithë mbetën jashtëzakonisht të kënaqur për ardhjen e Imzotit në vatrat e Barbullushit sepse kemi nevojë gjithmonë ta dëgjojmë zërin dhe këshillat e atij që flet në Emër të Zotit.

Po të njëjtën ditë në orën 11.00 Imzot Angelo Massafra u ndal tek shkolla e Barbullushit, ku një turmë e madhe nxënësish, pa dallim feje, të udhëhequr nga drejtori dhe edukatorët e tyre, e priten ardhjen e tij me një koncert të bukur.

Pastaj u bë edhe një takim vetëm me drejtorin dhe profesorët e  kësaj shkolle, ku Imzoti e vendosi më shumë theksin mbi një formim të duhur dhe të përshtatshëm për fëmijët dhe të rinjtë.

Me rastin e bekimeve të varreve në Barbullush, u bekua edhe guri i parë për ndërtimin e një kapele të vogël brenda varreve. Pastaj, mbasdite u zhvillua mbyllja e vizitës Baritore, tek kisha e vjetër, ku fëmijët dhe të rinjtë e Barbullushit kishin përgatitur, shfaqje, këngë, kërcime dhe recitime, dhe kisha ishte e mbushur plot e përplot si gjithmonë. Pas shfaqjes Imzoti i falënderoi të gjithë pjesëmarrësit dhe falënderoi edhe punën e mrekullueshme të motrave të kësaj famullie. Festa mbaroj  me një këngë të bukur “ Gëzoj në Zotin” të kënduar nga të gjithë së bashku me  Ipeshkvin tonë.

“Të paçim me jetë e shëndet Imzot Angelo Massafra dhe mirë se të vish sa më shpesh në famullinë tonë” – ishin fjalët e njerëzve. Dhe kështu përfundoi Vizita Baritore, një rast tepër i veçantë dhe i paharruar për famullinë  e Barbullushit.

Rregjina Shelqetja

titujt kryesore

webmaster