VIZITA BARITORE NË VELIPOJË

Gjatë ditëve 18-25 të janarit të këtij viti, Ipeshkvi ynë Imzot Angelo Massafra zhvilloi vizitën tij baritore në Famullinë e Shën Nikollit - Velipojë.

Kjo vizitë filloi në kishën e “Shën Markut” Gomsiqe e Re që mbledh edhe fshatrat Baks i Ri, Baks i Vjeter dhe  Ças.

Menjëherë pas kësaj meshe pasoi një tjetër në fshatin Reç, në Kishën e “Zemrës se Krishtit” dhe pasdite në Mal të Kolajve.

Vizita e Ipeshkvit me këtë rast përveç se ishte e një rëndësie të veçantë kanonike, siç janë vizitat baritore, por, për famullinë tonë kishte një rëndësi ende më të madhe pas problemeve dhe keqkuptimeve të shkaktuara sidomos gjatë dy viteve të fundit. Në sytë e njerëzve shihej qartë dëshira për sqarim, pajtim dhe bashkim me Ipeshkvin, Papën e Shenjtë dhe, nëpërmjet tyre, me mbarë Kishën Universale të Krishtit. Ipeshkvi në fillim të çdo meshe ftoi besimtarët për pajtimim dhe falje, në mënyrë që, të liruar nga e keqja, të gjithë të mund të vihemi, sipas funksioneve të ndryshme, në shërbim të Kishës së Krishtit. Pastaj pasuan prositë e Tija të bëra si në çdo famulli tjetër.

Dita e hënë e kësaj vizite pasoi më vizita e besimtarëve të sëmurë dhe të të varfër.

Të enjten u zhvilluan takime në dy kopshtet e fëmijve nën përgjegjësinë e Famullisë; takim me pushtetin lokal në Komunën e Velipojës, si dhe me nxënësit e Shkollës së Mesme.

Të një entusiazmi të veçantë ishin takimet me grupet rinore dhe të katekizmit të zhvilluara në fshatin Reç dhe Velipojë. Ipeshkvi me këtë rast iu drejtua atyre lidhur me rëndësinë e përgatitjes ndaj sfidave të jetës ku roli i edukimit fetarë është parësor, pasi lidhet ngushtë me pjesën me të brendshme të botës njerëzore. Takime të tjera personale u zhvilluan edhe me disa nga burrat e fshatrave, të cilët shprehën opinionet e tyre lidhur me problemet dhe mirëvajtjen e jetës së famullisë.

Çdo gjë u zhvillua në një klime miqësore dhe mirënjohjeje të ndërsjellët mes Ipeshkvit dhe besimtarëve.

Kjo vizitë u mbyll me dy meshë të kremtuara në fshatin Velipojë dhe Rrjoll. 

Në emër të të gjithë besimtarëve e falënderojmë Ipeshkvin për praninë dhe mesazhin e tij baritor.

Don Vlash Palaj

titujt kryesore

webmaster