VIZITA E PARË E NUNCIT APOSTOLIK IMZOT RAMIRO MOLINAR INGLES

Në prag të Krishtlindjes, në të dielën e katërt të Ardhjes, Nunci Apostolik në Shqipëri, Imzot Ramiro Molinar Ingles, vizitoi për herë të parë dioqezën e Sapës. Ceremonia e rastit u organizua në Katedralen e Lumja Nënë Tereza në Vau-Dejës, me një pjesëmarrje të madhe nga ana e  besimtarëve. Nunci apostolik që në hyrje të qytetit u prit nga bariu i Sapës, Imzot Lucjan Avgustini i shoqëruar nga famullitari i Katedrales, meshtarë të tjerë, si dhe Kryetari i Bashkisë Vau-Dejës me autoritete të tjera të pushtetit lokal. Në fillim ai u përshëndet me një këngë kushtuar Nënë Terezes, kënduar nga vëllezërit Paloka, ndërsa në kremtimin eukaristik të udhëhequr nga vetë Shk.Tij Imzot Ingles, në emër të bashkësisë së besimtarëve, ipeshkvi I vendit i ka uruar mirëseardhjen Nuncit të ri me fjalët e psalmistit: “Bekuar qoftë ai që vjen në emër të Zotit”. Duke vazhduar më tej, Imzot Lucjani theksoi se kjo vizitë para Krishtlindjes, na jep sigurinë se Papa nëpërmjet përfaqësuesit të tij, na do dhe na mbart në zemër, sikurse ka ditur edhe ky popull ta dojë Krishtin, duke i qëndruar besnik deri në derdhjen e gjakut, martirizimin.

Edhe Imzot Ramiro Molinar Ingles, në homelinë e rastit e falënderoi Imzot Lucjanin dhe dioqezën e tij për arritjet e deritanishme. Si përfaqësues i Selisë së Shenjtë, ai shprehu gatishmërinë dhe mbështetjen e kësaj selie në rrugën e paqes dhe drejtësisë. Në përfundim të kremtimit Nunci Apostolik përcolli bekimin e Atit të Shenjtë, Benediktit XVI, duke uruar edhe festën e Krishtlindjes.

Që prej 15 viteve, Imzot Ramiro Molinar Ingles është titullar i arqipeshkvisë së Sardës, e cila ndodhet në territorin e Dioqezës së Sapës. Për herë të parë Nunci bashkë me Imzot Lucjanin, vizitoi territorin e Sardës, ku tashmë gjenden disa themele të eltereve, dëshmi e gjallë e kësaj dioqeze, e cila ekzistoi si dioqezë më vete deri në vitin 1444, ku më pas u bashkua me dioqezën e Dejës. Ndërsa në vitin 1491, në kohën e Prosdoçimit, Ipeshkëv të Sapës, të dyja këto dioqeza i bashkohen Dioqezës së Sapës.

Violeta Marashi

titujt kryesore

webmaster