KARITASI I SHKODËR-PULT

NDIHMON DHE GËZON ME SHTËPITË-FAMILJE

Karitasi Dioqezan Shkodër-Pult ka vite që nëpërmjet projekteve të ndryshme  i është gjendur pranë popullsisë së Dioqezës duke kryer mjaft shërbime ndaj personave me probleme të ndryshme sociale e shëndetësore, gjithmonë brenda mundësive që ka pasur dhe konform rregullave të projekteve, të vendosura nga donatorët, që falë bamirësisë së tyre kanë shpëtuar shumë jetë njerëzore e kanë zvogëluar vuajtjet e shumë personave të varfër, të sëmurë, të pastrehë e me shumë probleme të tjera të krijuara për shkak të fatkeqësive të ndryshme.

Në vazhdën e këtyre veprimtarive gjatë muajve të verës Karitasi Dioqezan Shkodër-Pult i  propozoi një grupi të rinjsh këngëtarë, humoristë e valltare, që të jepnin koncerte në kampingun e “Projektit Shpresa” në plazhin e Velipojës, që drejtohet nga Zj. Silvana Vignali.

Në këtë kamp i cili financohet nga Karitasi Spanjoll dhe disa Institute Bamirëse Italiane  ishin  të përfshirë 120 persona për çdo turn (1 korrik-15 gusht) të cilët ishin të sëmurë handikap jo vetëm të Shtëpi-familjeve të “Projektit Shpresa” por edhe nga Shtëpi-familjet e “Madonnina del Grappa”, M. Nënë Tereza, nga institutet e ndryshme shtetërore dhe fëmijë të cilët jetojnë në zonat malore të dioqezës.

Falë angazhimit vullnetar të këtyre të rinjve dhe bashkëpunimit me Provincën Franceskane në Shkodër si dhe me qendrën “Mbretëresha e Paqes“ drejtuar nga M. Ravasko, Karitasi Dioqezan Shkodër-Pult organizoi tre koncerte për pjesëmarrësit  në tre turnet e kampit.

Vullnetarëve  italianë, spanjollë dhe shqiptarë të pranishëm gjatë gjithë periudhës në këtë kamp në shërbim të personave handikap iu bashkëngjitën edhe pjesëmarrësit e këtij grupi artistik, të cilët jo vetëm i dhuruan mjaft kënaqësi pjesëtarëve të kampit, por mbi të gjitha dhanë një shembull mjaft të mirë solidarizimi dhe vëmendjeje ndaj personave në nevojë.

Jolanda Marena

 titujt kryesore

webmaster