LAJME NGA DIOQEZA E SAPËS

KUSHTIMI I KISHËS KATEDRALE  NË LAÇ VAU-DEJËS

Ngjarje e madhe historike është shënuar me 6 shtator 2008, për Dioqezën e Sapës, e cila gëzoi në shugurimin e Kishës nënë, Katedrales së re, kushtuar bijës së popullit shqiptar, të Lumes Nënë Tereza. Qindra besimtarë shtegtuan drejt Katedrales për të marrë pjesë në kremtimin e kësaj dite, që na e dhuroi Zoti, duke kënduar e galduar së bashku. Nderuan me pjesëmarrjen e tyre e gjithë hierarkia e Kishës Katolike në Shqipëri, meshtarë e motra, përfaqësues të komuniteteve fetare, përfaqësues të Ambasadave diplomatike, Deputetë, autoritetet e larta civile vendore dhe lokale, si dhe miq të ardhur nga Italia, Kosova, Mali i Zi  etj.

Mesha e Shenjtë  u udhëhoq nga ipeshkvi i Kosovës, Imzot Dodë Gjergji, ish-ipeshkëv i Sapës, në bashkëkremtim me gjithë vëllezërit meshtarë të pranishëm. Në fillim të meshës, ipeshkvi i Sapës, Imzot Lucjan Avgustini iu uroj mirëseardhjen të gjithëve dhe e falenderoi Zotin për këtë tempull të ri që për ndërmjetësuese ka zgjedhur të Lumen Nënë Tereza.

Duke iu drejtuar Imzot Dodës, ai tha “ Veprën të cilën ti vetë e fillove vite më parë për ndërtimin e kësaj katedrale ne mbi të mbimuruam, sot arritëm ta përfundojmë, ju lutem që ta shuguroni. E menjëherë Imzot Doda bekoi ujin me të cilin bekoi muret e Katedrales. Ndërsa në homelinë e rastit imzot Dodë Gjergji falenderoi Zotin që u arrit të ndërtohet kjo vepër. “Është vullnesa e tij, dashuria dhe kujdesi i bamirësve që kanë ndihmuar në realizimin e këtij tempulli madhështor në të cilin jemi mbledhur, dhe marrshim nga ky vend i shenjtë bekime të shumta e mbi të gjitha e bartshim dhe e zbatofshim në jetë porosinë dhe shembullin e dashurisë së Nënë Terezës”. Riti i shugurimit vazhdoi me lyerjen e elterit dhe kushtimin e tij, i cili mbi të gjitha është shenjë e atij elteri të gjallë që është Krishti.

Ndërkohë, po në këtë elter Ipeshkvi i Sapës, vendosi me duart e tij reliket e së Lumes Nënë Tereza, Shën Crisante e Daria, Shën Paola Frasineti, e Lumtura Giovana Scopelli, e në bazë të dëshmive që i kemi tha Ipeshkvi, dëshmoi se janë autentike. Reliket u vendosën në krahun e majtë të elterit.

Historia e kësaj dioqeze është e lashtë dhe me plot vuajtje. Kur kujtojmë se kjo dioqezë është toka e katedraleve, siç janë ajo e Sapës që dikur kishte katedralen e Shën Mëhillit, sot e rrënuar në majen e malit të Shën Mëhillit; Katedralja e Shën Gjergjit, e cila qëndron si një bukuroshe në majen e malit të Nënshatit, ku kanë shërbyer të mëdhenjtë e këtij kombi si Imzot Pjetër Budi, Imzot Frang Bardhi, Imzot Lazer Mjeda, Imzot Vinçenc Prendushi, Imzot Gjergj Volaj, këta dy të fundit të pushkatuar nga regjimi komunist; katedralja e Dioqezës së Dagnum (Deja), katedralja e Shën Markut dhe Sarda, katedralja Të Ngjiturit e Virgjëres Mari në qiell në ishullin e Shurdhahut.

Është e rëndësishme se tashmë në Katedralen e Lumja Nënë Tereza në Vau-Dejës, pajtorët e këtyre katedraleve janë të paraqitura në vetratat shumëngjyrëshe të punuar me mjeshtëri nga dora e njeriut.

Violeta Marashi

  titujt kryesore

webmaster