RREGULLTARË DHE LAIKË

SË BASHKU THARM PËR MBRETËRINË E ZOTIT

Kjo ishte tema e asamblesë III kombëtare që u zhvillua në Fshatin e Paqes nga datat 7-9 shtator. Temë e përzgjedhur me mjaft finesë nga organizatorët dhe që ka ngjallur një interesim të madh, për nga numri i pjesëmarrësve, qoftë meshtarë, rregulltarë e rregulltare por edhe të laikëve. Rregulltarë e laikë nga e gjithë Shqipëria për 3 ditë me radhë në praninë e ipeshkvijve të tyre, diskutuan dhe shkëmbyen përvojat e tyre së bashku.

Fjalën e hapjes së asamblesë e mbajti Imz. Ottavio Vitale, i cili bëri një përmbledhje historike të jetës fetare në Shqipëri. Nuk mund të mungonte edhe përshëndetja e Arqipeshkvit tonë  Imz. Angelo Massafra, i cili e përgëzoi asamblenë dhe tërhoqi vëmendjen në formimin dhe angazhimin e sa më shumë laikëve në dobi të mbarë shoqërisë. Në ditën në vijim Atë Gazmend Tinaj, në relacionin e tij të mbajtur me këtë rast, foli mbi situatën politike dhe shoqërore në Shqipëri, gjendjen rregulltare dhe të Kishës, për besimtarët e krishterë laikë, bashkëpunimin rregulltarë-besimtarë të krishterë laikë dhe përfundoi mbi disa mundësi konkrete se çfarë po bën Kisha për edukimin e brezave të ardhshëm, mbi formimin e klasës drejtuese të krishterë me vlera të krishtera.

Meqë asambleja i kushtohej rregulltarëve dhe laikëve, marrëdhënies dhe bashkëpunimit midis tyre, kanë qenë disa laikë nga zona të ndryshme të Shqipërisë të cilët kanë folur mbi përvojat e tyre me rregulltarë, mbi mënyrën se si punohen me ta dhe mbi perspektivat që ata vetë u vënë përpara. Ishte mjaft interesante të dëgjoje prej vetë atyre se si ata i perceptojnë rregulltarët dhe se çfarë presin prej tyre. Por, nga ana tjetër, edhe rregulltarët kanë folur dhe diskutuar për laikët, bashkëpunëtorë të cilët ata i takojnë në angazhimet e ndryshme, dhe si konkluzion mund të themi që aktualisht laikët në Shqipëri kanë nevojë për një formim më të gjatë, më konstant sepse nuk janë të guximshëm të veprojnë e të shfaqin vlerat e krishtera në shoqërinë e sotme moderne, e cila i ka nxjerrë jashtë mode vlerat e vërteta. Laikët duhet të jenë më kërkues në procesin e formimit, të kërkojnë prej meshtarëve e motrave, të këshillohen për situata apo probleme të cilat ata mund të gjenden në jetë, kështu që ata të jenë një tharm për shenjtërinë e botës. Shqipëria ka nevojë për këtë tharm të vërtetë që me sa duket i mungon akoma. Akoma gjenden mes nesh besimtarë të krishterë, të cilët janë të mirë për veten e tyre por jo për shoqëri, në realitet janë të padobishëm. Nga kjo asamble në punët në grupe kanë dalë shumë sugjerime konkrete të cilat shpresojmë që në të ardhmen të marrin formë dhe të konkretizohen, mos të mbesin të shkruara në letër.  Por në të vërtetë çfarë pret kisha nga laikët?

Përgjigjen e gjejmë në dokumentin e Kishës Besimtarët laikë të Krishtit i cili thotë “... prandaj me anë të dinjitetit të përbashkët pagëzimor Besimtarët e krishterë laik janë bashkëpërgjegjës, së bashku me meshtarët, rregulltarët dhe rregulltaret, të misionit të Kishës, për këtë arsye bota bëhet sfera dhe mjeti i thirrjes së krishterë të besimtarëve laik sepse ajo vetë është e adresuar të lavdërojë Hyjin Atë në Krishtin. Ata janë drita e botës dhe kripa e tokës, sepse të gjithë janë të thirrur të jenë të shenjtë në saje të pagëzimit.

Motër Luiza Milani

titujt kryesore

webmaster