AKTIVITETET VERORE NË SHIROKË, ANA E MALIT DHE BARDHAJ

Për zonë tonë baritore aktivitetet verore kanë filluar në javën e parë të muajit korrik. Në fillim duam të falënderojmë Zotin Jezus për ndihmën dhe kurajon e derdhur në zemrat tona për kryerjen e këtyre aktiviteteve.

Si çdo vit së bashku me ministrantët e fshatrave Bardhaj, Bardhanjor e Oblikë shkuam në Razëm për një kamp formimi tre ditor. Në këto dy treditësha, të ndarë në dy grupmosha, ministrantët e lanë veten të udhëhiqen nga figura dhe shembulli i shën Palit. Atë Giuseppe e Atë Rolando, së bashku me disa animatorë të Bardhajve dhe të Oblikës udhëhoqën dhe shoqëruan ministrantët e vegjël e të mëdhenj në këtë javë formimi nga data 6 deri me 12 korrik.

Në javën e dytë, nga data 13 deri 18 korrik, u zhvillua kampi tjetër i formimit në Razëm për katekistët e animatorët e fshatrave të Bardhajve, të Oblikës e të Obotit. Tema kryesore që u trajtua ishte: “Të krishterë me stil”. Nëntemat që e ndiqnin shtjellonin rëndësinë e të krishterit të sotëm për të qenë dëshmitar koherent dhe besnik thirrjes së marrë me pagëzim. Edhe në këtë javë dëshmitari që na përcolli ishte shën Pali Apostull, ekspert dëshmie e besnikërie. Në këtë kamp morën pjesë 30 të rinj e pesë animatorë. Kampi u drejtua nga Atë Dorian Mjeshtri, Motër Elisa Gevasi e animatorët Nikolin Alia e Ana Marku. Duhet të themi se kjo përvojë solli shumë fryte vëllazërie, qetësie, bashkëpunimi dhe gëzimi. Me ndihmën e Zotit Jezus, shpresojmë t'i kultivojmë dhe t'i ruajmë këto fryte që e zbukurojnë jetën tonë të krishterë.

Nga data 3 deri më 14 gusht në fshatin Bardhaj u zhvillua kampi veror për fëmijë nga mosha 7 deri në 14 vjeç. Fëmijët e regjistruar, 130 vetë, vinin për të marrë pjesë për dy javë rresht nga e hëna e deri të premten me këtë orar 8.30 - 12.30. Tema që na udhëhoqi ishte: “Si vëllezër, në kërkim të Jezusit”. Animatorët, rreth 30 vetë, ishin të gjithë nga fshati Bardhaj. Në javën e dytë kampi u pasurua akoma më shumë me praninë e miqve tanë nga Milano. Janë me të vërtetë miq, sepse është i dhjeti vjet rresht që bashkëndajnë me fëmijët dhe të rinjtë e Bardhajve gëzim, qetësi dhe vëllazëri. Këtu vlen për t'u theksuar puna e madhe parapërgatitore e animatorëve të Bardhajve për zhvillimin e këtij kampi sa angazhues aq edhe argëtues. Kampi u mbyll, me festën e datës 14 gusht. Në këtë pasdite u kremtua Mesha e Shenjtë me pjesëmarrësit e familjarët e tyre. Pas Meshës fëmijët pjesëmarrës, me në krye animatorët, i paraqitën – në një moment gëzimi dhe hareje – prindërve të tyre të gjitha momentet e jetuara gjatë kampit.

Edhe fëmijët e Oblikës patën mundësinë të përjetonin disa ditë gëzimi dhe vëllazërie në Shirokë, nën drejtimin e Atë Rolandos, motrave Vinçenciane. Këta të fundit, së bashku me animatorët e Oblikës, zhvilluan një kamp një javor.

Pas këtyre aktiviteteve vëmendja e etërve orioninë u përqendrua në Shirokë. Atë Rolando Reda udhëhoqi bashkësinë e krishterë të Shirokës në treditëshin e përgatitjes së Festës së Shën Rrokut. Me datën 15 gusht, ditën e të Ngjiturit e Zojës në Qiell, në vigjiljen e festës së shën Rrokut, mbas meshë u shfaq recitali muzikor e teatral: “Shën Pali, Apostulli i njerëzve”. Në ditën e festës së shën Rrokut u zhvillua procesioni tradicional i shenjtit, i udhëhequr nga Dom Gjovalin Simoni. Më pas, në orën 11.00 u kremtua Mesha e Shenjtë e drejtuar nga Imzot Angelo Massafra, Arqipeshkëv Metropolit i Shkodër-Pult dhe e gjallëruar nga Motrat Stigmatine dhe besimtarët e Shirokës.

Etërit Orioninë

titujt kryesore

webmaster