EDITORIAL

FJALA E PAQES - 10 VJET

Dhjetë vjet më parë, në shtatorin e vitit 1999, shtypit katolik shqiptar iu shtua një organ i ri: “Fjala e Paqes”, lajmëtar fetaro-kulturor i Arqipeshkvisë Metropolitane të Shkodrës.

Arsyen e botimit të këtij organi na e bën të qartë artikulli i editorialit, i përgatitur nga Sh. T. Imzot Angelo Massafra, që në atë kohë ishte Arqipeshkëv Metropolit i Shkodrës dhe Administrator Apostolik i Sapës: «...Krijimi i këtij buletini koincidon me fundin e mijëvjeçarit të dytë dhe me kremtimin e Jubileut të madh, të shpallur nga Papa Gjon Pali II në kremtim të dymijëvjetorit të lindjes së Jezu Krishtit». E më poshtë vazhdon: «“Fjala e Paqes” është titulli i zgjedhur për botim». Dhe e mbyll artikullin me fjalët: «Me gëzim të madh po e fillojmë këtë shërbim me shpresë se do të ngjallë interes më të madh për sa i përket jetës së Kishës dhe i uroj redaksisë e të gjithë bashkëpunëtorëve “Punë të mbarë”...».

Po cila është rruga e një dekade të kësaj reviste?

Për mbarëvajtjen e punës u ngarkua një redaksi e drejtuar nga Imzot Angelo Massafra, duke patur në fillim si kryeredaktor Dom Nikë Ukgjinin dhe një redaksi, në përbërjen e së cilës ishin katër meshtarë. Në fillim ishte korrektor Z. Kolec Çefa, pastaj Z. Luigjino Gajtani dhe aktualisht është Znj. Teola Shkodra. Pas datës 01. 09. 2000, deri në nëntor të vitit 2004, si kryeredaktor u caktua Dom Lucian Avgustini (sot ipeshkëv i Sapës), dhe Dom Nikë Ukgjini kaloi si kryeredaktor i revistës“Kumbona e së Diellës”. Nga dhjetor 2004 kryeredaktor është Imzot Angelo Massafra.

Tek “Fjala e Paqes” kanë pasqyruar veprimtaritë e tyre kronistë, bashkëpunëtorë të jashtëm, ipeshkvij, meshtarë, motra rregulltare etj., të dioqezës së Shkodrës, Pultit, Sapës, Lezhës dhe Mirditës, deri pas shkrirjes së dioqezës së Pultit me atë të Shkodrës, dioqeza e Mirditës në varësinë e Arqipeshkvisë së Tiranë-Durrësit. Tani për tani në të botohen lajme nga dioqeza Shkodër-Pult dhe një faqe e kushtuar dioqezës së Sapës.

Nga fillimi i botimit deri në shkurt-mars 2003, lajmëtari ka dalë një herë në muaj, ndërsa nga kjo datë e deri tani del një herë në dy muaj, duke u alternuar me “Kumbonën e së Diellës”.

Që nga fillimi e deri në muajin jubilar të botimit kanë dalë nga shtypi dhe janë marrë për lexim nga besimtarët 88-89 numra. Tirazhi i botimit në 3000 kopje. Është një fat i madh fakti që revista nuk e ndërpreu asnjëherë botimin e saj, duke trajtuar për dhjetë vjet ngjarjet më të rëndësishme të dioqezës, shugurimin e Ipeshkvijve, meshtarëve dhe diakonëve, kushtet e bëra nga shumë motra, kushtimin e shumë kishave, vizitat baritore, festimet e ndryshme jubilare, takimet e rinisë me Atin e Shenjtë, veprimtaritë e ndryshme fetaro-kulturore nga tri dioqezat etj. Edhe fotot e shumta e zbukurojnë përmbajtjen e kësaj gazete.

Nga takimet me lexues të ndryshëm, vërehet se gazeta lexohet me ëndje dhe mirëpritet sa herë botohet numri i ri. Kjo gazetë, së bashku me lajmëtarin e Radio Marisë Shqiprare (që e ka filluar botimin e vet këtë vit) kanë kërkuar që t'i kenë në duart e tyre. Kështu ata mund të vihen në dijeni për veprimtaritë e shumta që zhvillohen në dioqezë, por jo vetëm.

Puna e mirë e bërë nga punonjësit e shtypshkronjës “Atë Gjergj Fishta”-Lezhë, ia shton bukurinë dhe rëndësinë e saj. Shpresojmë që botimi i saj të jetë edhe në të ardhmen një ndihmesë e mirë që besimtarët ta kenë më të qartë atë që bëhet në dioqezë, për t'u ndjerë gjithnjë e më shumë Kishë, pra një trup i vetëm që vepron për Lavdinë e Zotit dhe për të mirën e shoqërisë.

Lec Zadeja

    titujt kryesore

webmaster