KAMP VEROR NË SHTOJ I RI, KIRAS DHE BARDHAJ

Për motrat e Nënë Terezës, edhe kjo verë solli shumë aktivitete, veçanërisht kampe verore të organizuara për fëmijë e të rinj në zonat ku ato mbajnë katekizëm gjatë periudhës së vitit shkollor.

Për rreth një muaj, nga data 17 korrik deri më 13 qershor, ato kanë organizuar kampe verore në Shtoj të Ri, Kiras dhe Bardhaj. Gjatë kësaj kohe, motrat janë ndihmuar edhe nga famullitarët: në Shtoj të Ri nga Atë Giovanni Colombi, në Kiras nga Don Juan Martinez. Ndërsa në Bardhaj ato kanë marrë fëmijët me autobus për në Gur të Zi, së bashku me Don Raffaele Gagliardi dhe seminaristë nga Italia e Spanja e Don Bruno nga Franca me grupin e tij dhe i kanë përfshirë pjesëmarrësit në aktivitete të ndryshme.

Në Shtoj dhe Kiras, në këtë kamp veror kanë qenë të pranishëm për të dhënë ndihmesën e tyre edhe Don Sebastiani së bashku me grupin e tij të të rinjve vullnetarë nga Malta. Nuk kanë munguar edhe të rinjtë vullnetarë nga zonat ku motrat veprojnë, të cilët kanë ndihmuar në mbarëvajtjen e kampit veror.

Në çdo kamp kanë marrë pjesë një numër mjaft i mirë i fëmijëve dhe i të rinjve nga zonat e Shtojit të Ri, Kirasit dhe Bardhajve. Janë zhvilluar shumë aktivitete të ndryshme si, lojëra, drama me pjesë të marra nga ungjijtë, gara, vizatime, lojëra sportive etj.

Në mbarim të kampit, çdo grup në ditë të caktuara ka kaluar disa orë të këndshme në plazhin e Velipojës.

Në ditën e fundit, në çdo zonë është organizuar një festë e vogël, në praninë edhe të prindërve të kampistëve, për të falënderuar çdo të pranishëm për kohën e kaluar së bashku e për gëzimin e miqësinë që kanë bashkëndarë gjatë atyre ditëve. Fëmijët kanë shfaqur para të gjithëve punime të ndryshme të bëra nga vetë ata gjatë aktiviteteve të kampit veror dhe u kanë dhuruar meshtarëve famullitarë, të rinjve vullnetarë dhe meshtarit të ardhur nga Malta, punime modeste të bëra nga dora e tyre.

Gjatë këtij kampi, fëmijët e të rinjtë, jo vetëm kanë kaluar një pjesë të ditës së tyre në shoqërinë e njëri-tjetrit, por ata kanë mësuar se si mund të bashkëndajnë e të mësojnë nga njëri-tjetri.

Motrat e Nënë Terezës

titujt kryesore

webmaster