SHUGURIMI I KISHËS SHËN TEREZA E AVILËS – KOTËRR

Ditën e të Ngjiturit të Zojës në qiell, më 15 gusht 2009, bashkësia e famullisë Zoja Rruzare, në fshatin Kotërr të Zadrimës, gëzoi në festën e Shugurimit të Kishës kushtuar Shën Terezës së Avilës. Në këtë kremtim solemn morën pjesë meshtarët, motrat e kongregatave të ndryshme që veprojnë në dioqezën tonë, miq meshtarë nga Spanja, të cilët kontribuan më së mirë për ndërtimin e kësaj kishe, autoritete civile të pushtetit lokal, si dhe populli i Zotit.

Mesha dhe liturgjia e bekimit u udhëhoq nga Ipeshkvi i Sapës, Imzot Lucjan Avgustini, në bashkëkremtim me famullitarin Dom Kastriot Gjoka e meshtarë të tjerë. Pas marrjes pjesë me zell në ritet e shenjta të bekimit, në një dëgjim me fe të fjalës së Hyjit, Ipeshkvi në homelinë e tij e falënderoi Zotin që edhe në këtë fshat tashmë u ndërtua kisha e re. Është shtëpia ku mblidhemi rreth tryezës hyjnore që është altari në të cilën kremtohet Mesha e shenjtë, që na bën t'i shmangim përçarjet, grindjet, armiqësitë dhe inatet.

Ceremonia e Shugurimit vazhdoi më pas me ritet e tjera, si lyerja e altarit, e mureve dhe vendosja e relikeve të Shën Terezës së Avilës. Të gjithë uruan: “E gëzofshim kishën e re”. Falë bamirësve, donatorëve, dhe angazhimit personal të Ipeshkvit dhe famullitarit, Kisha e Shën Terezës së Avilës pati fatin të ndërtohet brenda një afati të shkurtër, rreth një vit, e në maj të vitit të kaluar u bë bekimi i gurit të parë. Ashtu si në fshatrat Dragushë dhe Gjegjan, edhe këtu në Kotërr është hera e parë që ndërtohet një kishë.

 Violeta Marashi

 titujt kryesore

webmaster