JUNIORATI  NDËRKONGREGACIONAL

Më 9-11 mars 2007 në kuvendin e Motrave të Bijave të Dashurisë Hyjnore në Shkodër është mbajtur takimi i Junioreve të viteve IV, V, VI,  në të cilin morën pjesë 36 motra nga 12 kongregata të ndryshme.

Në këtë takim referoi m. Maria Renata Chiossi s.d.c, e cila zhvilloi  temën me titull:

“Jeta shpirtërore dhe karizmat specifike të jetës rregulltare dhe ndjenja e përkatësisë”

Tema u zbërthye në disa pika:

 Çfarë kuptojmë me jetën shpirtërore? Çfarë është përshpirtëria?

Jeta shpirtërore, përshpirtëria është ajo veprimtari e brendshme jetësore që e bën njeriun të mendojë, të meditojë… është zgjuarsi, aftësi për të lexuar brenda ngjarjeve që ndodhin. Është vetëdija për të lexuar brenda vetes me anë të pyetjeve: kush jam unë? Nga e kam prejardhjen? Cili është kuptimi i jetës sime? Çfarë më mban në shpresë? Me anë të jetës shpirtërore njeriu kërkon përgjigje si fëmijët që kanë gjithmonë pyetje për prindërit…Jo më kot Jezusi na fton ta thërrasim Hyjin “Atë” sepse ne mund të presim përgjigje nga një prind.

Kemi reflektuar gjithashtu edhe mbi pyetjen: A ka vend sot për jetën shpirtërore?

Sigurisht! Pasi jeta shpirtërore i përket personit, atë e gjejmë në të gjitha përmasat, në të gjitha aspektet e jetës njerëzore, pasi siç pohon edhe psikologu Viktor Frankl, njeriu është i përbërë nga tre dimensione: trupor, psikik  dhe shpirtëror.

Njeriu nuk mund të jetojë vetëm me dy dimensionet e para, pasi do të ishte si një aeroplan që gjendet në aeroport me motor të ndezur por që qëndron në vend pa lëvizur. Aeroplani e ka maksimumin e vet kur fluturon në qiell, kështu edhe njeriu e  përmbush plotësinë e tij kur i ka të tre dimensionet.

Karizma : çfarë do të thotë  fjala karizëm?

“ Karizma  është një dhuratë e Shpirtit Shenjt me qëllim që t’i shërbejë një bashkësie dhe ndërtimit të saj” (1 Kor 12,7.11)

Kemi diskutuar edhe mbi karizmën si dhuratë e institutit që përfshin dhe çon përpara përmbajtjen shpirtërore, apostolike dhe strukturore të frymëzimit që themeluesi(ja) mori prej Shpirtit Shenjt. Pra, karizma është një dhuratë dhe një identitet i ri për secilën prej nesh.

Çfarë është përkatësia?

Përkatësia është ndjesia e pjesëmarrjes dhe e të qenurit e pranuar nga një grup në një klimë ndërvarësie, intimiteti, dhe ndërsjelltësie. T’i përkasësh një bashkësie do të thotë të dish që ajo na përket dhe që ne i përkasim asaj, pra ndjenja e përkatësisë është e vërtetë kur ajo është e ndërsjellë....

Në mbrëmjen e 10 marsit gëzimi ynë u shtua nga prania e Imzot Angelo Massafra i cili mori pjesë në lutjen e mbrëmësores, dhe ne e falënderojmë për gatishmërinë dhe kujdesin e tij që tregon për ne.

Në fund e falënderojmë Zotin që na e dha mundësinë për të qenë të bashkuara në Emër të Tij, gjithashtu i falënderojmë edhe të gjithë ata që na ndihmojnë në formimin tonë si edhe m. Renatën Chiossi që pranoi ta drejtojë këtë takim.

                                                                         Junioret Shkoder

titujt kryesore

webmaster