NDËRROI JETË MONS. INJAC DEMA

    Pas dy vjet vuajtjeje nga ana shëndetësore, me datën 19 shkurt 2007, në moshën 82 vjeçare, ndërroi jetë meshtari më i vjetër i Dioqezës së Sapës, Mons. Injac Dema.

    Trupi i pajetë i të ndjerit Mons. Injacit u shoqërua nëpërmjet kortezhit mortor nga famullia e Dajçit - Zadrimë, vendi ku jetoi e shërbeu 13 vitet e fundit, për t’u vendosur në Kishën Katedrale në Vau-Dejës, ku u kremtua Mesha e Dritës, udhëhequr nga Kryetari i Konferencës Ipeshkvnore të Shqipërisë, Imzot Rrok Mirdita.

    Në këtë përcjellje morën pjesë të gjithë Ipeshkvijtë e Shqipërisë, ish - Ipeshkvi i Sapës, Imzot Dodë Gjergji, meshtarë, rregulltarë e rregulltare, të afërmit e tij si dhe besimtarë të dioqezës sonë dhe asaj të Shkodrës. 

“Jemi mbledhur sot për të kremtuar Meshën e Dritës të Mons. Injacit”, tha në fillim Imzot Mirdita. “Ai nuk u shua, nuk iku nga ne, por lindi në dritën e Jezusit! Dhe ne lutemi sot që, Krishti - Meshtari i amshuar ta pranojë në Mbretërinë e tij. 

    Homelinë e rastit e mbajti Imzot Dodë Gjergji, ku veçoi se, “edhe pse jemi pak të trishtuar me vdekjen e Mons.Injacit, forcohemi që jemi të bashkuar për ta përcjellë nga kjo Meshë në pushimin e përjetshëm. Ëngjëjt kanë zbritur për ta marrë shpirtin e tij, dhe ai është i pranishëm në sofrën e Eukaristisë, në Mbretërinë e qiellit.”

    Fjalë ngushëlluese përcolli edhe Ipeshkvi i Sapës, Imzot Lucjan Avgustini. Mes të tjerash, ai e vlerësoi shumë shërbimin e tij në misionin e ungjillëzimit. “Me këtë ndarje të përkohshme, tha Imzot Lucjani, po të njohim si meshtar i Krishtit. Edhe pse Dioqeza jonë është e varfër, ne jemi të pasur me dashurinë e Zotit dhe emri yt është i shkruar në zemrat tona, dhe i përjetshëm qoftë kujtimi yt!”

    Pas Meshës së salikimit, kortezhi mortor u drejtua drej varrezave katolike të qytetit të Shkodrës, vendi ku do të prehet i qetë Mons. Injaci, për t’u vendosur përjetësisht në bashkim me Jezusin, të cilit i shërbeu për 49 vite, si dhe për të pritur ringjalljen e lavdishme në Mbretërinë e Qiellit. Pushoftë në Paqe!

titujt kryesore

webmaster