PËRKUJTOHET 60 - VJETORI I PUSHKATIMIT

TË IMZOT GJERGJ VOLAJ

Në ditën e Shën Vlashit, më 3 shkurt 2007, u përkujtua 60 - vjetori i pushkatimit të ish - ipeshkvit të Sapës, Imzot Gjergj Volaj.

Me këtë rast, në kishën Katedrale të Sapës në Vau - Dejës, u kremtua Mesha e Shenjtë, të cilën e udhëhoqi një nga pasardhësit e tij, ipeshkvi i ri Imzot Lucjan Avgustini në bashkëkremtim me vëllezërit meshtarë, Dom Karlo Fantini, Dom Antonio Sciara, Dom Simon Kulli, Dom Mark Shtjefni dhe Atë Sergio La Fogia. I pranishëm në Meshë ishte edhe populli i Zotit bashkë me grupet e lutjeve që tashmë janë mirëorganizuar brenda dioqezës sonë.

Në fjalën e rastit, Imzot Lucjan Avgustini shpalosi vlerat e Imzot Gjergj Volajt. “Kur vuajtja dhe sakrifica e një njeriu tha ai, arrijnë që të kalojnë edhe cakun e jetës, duke e bërë këtë për fe e për Atdhe, atëherë ai ka arritur të bëjë atë që ndoshta nuk e bëjnë gjenerata të tëra të një populli. I tillë ishte edhe Imzot Gjergj Volaj, i cili rreshtohet në Elterin e atdhetarëve të këtij kombi. Nderimi dhe lavdia për të është e përjetshme, kur vendosja në këtë piedestal është e merituar dhe e pakundërshtuar.” Imzot Lucjani theksoi gjithashtu se, “yjet e heronjve të Atdheut nuk shuhen me ujë e as nuk mbulohen me baltë. Ata qëndrojnë lart, madje shumë lart, e gjithmonë pas kthjellimit të kohës, ata shndrisin e vezullojnë duke u bërë udhërrëfyesit e brezave të ardhshëm për dashuri e flijim ndaj Atdheut.

Kush ishte Imzot Gjergj Volaj? Si u pushkatua ai?      

Imzot Gjergj Volaj, u lind më 21 shtator 1904, në Shirokë të Shkodrës. Që i vogël e dëgjoi Zërin e Zotit, dhe duke iu përgjigjur, në vitin 1916 hyri në seminarin e Shkodrës. Më pas, në vitin 1926 vazhdoi studimet e larta në Padova të Italisë. Dhe në vitin 1930 u shugurua meshtar nga Arqipeshkvi i Shkodrës në atë kohë, Imzot Lazer Mjeda. U angazhua në aktivitetet apostolike brenda kësaj arqipeshkvie. Në vitin 1940, në moshën 36 vjeçare u emërua Ipeshkëv i Sapës, duke u radhitur kështu Ipeshkvi më i ri në botë. Ndërsa sipas kronologjisë së Ipeshkvijve të Sapës, ishte pasardhës i Imzot Vinçenc Prendushi.

Kur Shqipëria ra nën kthetrat e sistemit komunist, Imzot Gjergj Volaj u arrestua në janar të vitit 1947. Pasi kaloi një periudhë të tmerrshme torturash, mjerisht u dënua me vdekje dhe u pushkatua në ditën e Shën Vlashit, më 3 shkurt 1947, duke shënuar kështu fundin e jetës së tij në moshën 43 - vjeçare. Por një ditë para vdekjes Imzot Gjergjit iu dha leja që të takohej me nënën e tij. Në momentin e takimit ai u prek shumë nga lotët e saj, dhe me dinjitet i tha:

“Nënë, mos qaj për çka po sheh tani në mue... por qaj për çka do të vijë pas”!

Dioqeza e Sapës është krenare që pati një Bari të tillë, i cili sipas shembullit të Jezu Krishtit e flijoi jetën për grigjën e vet. Le të jetë Imzot Gjergj Volaj udhërrëfyes për ne si dhe për brezat e ardhshëm në angazhimin dhe ecjen tonë drejt rrugës së Zotit.

titujt kryesore

webmaster