Rruzarja e Papa Benediktit XVI me universitaret e Evropes dhe te Azise

DASHURIA INTELEKTUALE eSHTe URTIA E KRYQIT

“Po jua besoj Kryqin e Krishtit: pranojeni, përqafojeni, ndiqeni atë”. Me këto fjalë Papa Benedikti XVI shoqëroi dorëzimin e kryqit studentëve universitarë evropianë dhe aziatikë, mbrëmjen e datës 10 mars 2007, në Sallën Pali VI. Në lidhje radio - televizive kanë marrë pjesë në lutjen drejtuar Marisë bashkësitë universitare të Bolonjës, Kalkutës, Koimbrës, Krakovisë, Hong Kongut, Mançesterit, Manilës, Pragës, Tiranës, Torinos dhe të Islamabadit. Ati i Shenjtë ka dashur ta lexojë temën e takimit “Dashuria intelektuale, rrugë për një bashkëveprim të ri Evropë-Azi” në dritën e Misterit të Kryqit, sepse - siç ka shpjeguar Ai - “urtia e krishterë është urtia e Kryqit”.

Ky është teksti i fjalimit të Papa Benediktit XVI:

Të dashur të rinj universitarë!

Jam shumë i gëzuar që po jua drejtoj juve përshëndetjen time të përzemërt në përfundim të Lutjes drejtuar Marisë, që Vikariati i Romës ka nxitur me rastin e Ditës Evropiane të Universitarëve. Falënderoj Kardinal Camillo Ruini e Imzot Lorenzo Leuzzi, si edhe të gjithë ata që kanë bashkëvepruar për këtë nismë: institucionet akademike, Konservatorët e Muzikës, Ministrinë e Universitetit dhe të Kërkimeve, Ministrinë e Komunikacionit. Përgëzoj Maestrot e orkestrës dhe të korit të madh dhe ju, të dashur muzikantë dhe këngëtarë. Ndërsa ju mirëpres ju, o miq të Romës, mendimi im shkon, me të njëjtën dashuri, tek bashkëmoshatarët tuaj, të cilët, falë lidhjeve radio -televizive, kanë pasur mundësi të marrin pjesë në këtë moment lutjeje dhe reflektimi nga disa qytete të Evropës dhe të Azisë: nga Praga, Kalkuta, Hong Kongu, Bolonja, Krakovia, Torinoja, Mançesteri, Manila, Koimbra, Tirana dhe Islamabad-Ravalpindi. Është me të vërtetë një shenjë e kohëve, një shenjë shprese ky “rrjet”, i realizuar me bashkëpunimin e Qendrës Televizive të Vatikanit, të Radio Vatikanit dhe të Telespacios.

 Është një rrjet që e shpreh krejt vlerën e vet nëse marrim parasysh temën e lutjes së sotme: “Dashuria intelektuale, rrugë për një bashkëveprim të ri Evropë-Azi”. Është magjepsëse ta mendosh dashurinë intelektuale si forcë të shpirtit njerëzor, të aftë për të bashkuar itineraret formative të brezave të rinj. Në mënyrë më globale, dashuria intelektuale mund të bashkojë ecjen ekzistenciale të të rinjve që, edhe pse jetojnë larg njëri-tjetrit, arrijnë të ndihen të lidhur në planin e kërkimit të brendshëm  dhe të dëshmisë. Sonte po realizojmë një urë ideale mes Evropës dhe Azisë, kontinent shumë i pasur me tradita shpirtërore, ku janë zhvilluar disa prej traditave më të lashta dhe më të fisshme kulturore të njerëzimit. Sa domethënës është ky takim! Të rinjtë universitarë të Romës bëhen nxitës vëllazërie në shenjën e dashurisë intelektuale, kërkojnë të arrijnë një solidaritet që nuk i merr shtytjet nga plani i interesave ekonomike apo politike, por nga ai i studimit dhe i kërkimit të së vërtetës. Jemi, me një fjalë, në perspektivën e vërtetë “universitare”, domethënë në atë bashkësi të të diturit, që ka qenë njëri prej elementeve përbërës të Evropës. Faleminderit, të dashur të rinj!

Po u drejtohem tani të gjithë atyre që janë lidhur me ne nga qytete dhe shtete të ndryshme.

 Universitarëve të gjuhës çeke u ka thënë:

Të dashur të rinj që jeni mbledhur në Pragë! Miqësia me Krishtin e ndriçoftë gjithmonë studimin tuaj dhe rritjen tuaj personale.

 Pasi ka falënderuar në gjuhën angleze të gjithë universitarët e Kalkutës, Hong Kongut, Islamabad-Ravalpindit, Mançesterit dhe të Manilës, Papa iu drejtua kështu studentëve polakë:

Të dashur miq të Krakovisë! Mbajini në zemër si thesar të çmuar mësimet që Papa Gjon Pali II u ka lënë të rinjve dhe, në mënyrë të veçantë, universitarëve.

 Pasi përshëndeti të rinjtë e mbledhur në Koimbra, Portugali, Papa, në shqip, kështu iu drejtua të rinjve shqiptarë:

Miq të dashur të Tiranës! Angazhohuni për të ndërtuar si protagonistë Shqipërinë e re, duke marrë nga rrënjët e krishtera të Evropës.

 Dhe në fund kështu tha në italisht:

Të dashur miq të Universitetit të Bolonjës dhe të Torinos! Merrni pjesë në ndërtimin e një humanizmi të ri, të bazuar në dialogun e frytshëm mes besimit dhe arsyes, duke dhënë ndihmesën tuaj origjinale dhe krijuese.

 Të dashur miq, jemi duke jetuar kohën e Kreshmëve, dhe liturgjia na nxit vazhdimisht për ta bërë më të qëndrueshme ndjekjen e Krishtit. Edhe kjo Lutje, sipas traditës së Ditëve Botërore të Rinisë, mund të konsiderohet si një etapë shtegtimi shpirtëror të udhëhequr nga Kryqi. Dhe misteri i Kryqit nuk është i shkëputur nga tema e dashurisë intelektuale, madje, e ndriçon atë. Urtia e krishterë është urtia e Kryqit: studentët dhe, për më shumë arsye, mësimdhënësit e krishterë, e interpretojnë çdo realitet në dritën e misterit të dashurisë së Hyjit, që në Kryq arrin zbulimin më të lartë dhe përmbushjen e saj. Edhe një herë, të dashur të rinj, po jua besoj Kryqin e Krishtit: pranojeni, përqafojeni, ndiqeni atë. Është pema e jetës! Tek këmbët e tij do të gjeni gjithmonë Marinë, Nënën e Jezusit. Së bashku me Të, Selinë e Urtisë, drejtojeni shikimin kah Ai që për ne është shporuar (krh. Gjn 19, 37), sodisni burimin e pashtershëm të dashurisë dhe të së vërtetës, dhe kështu mund të bëheni edhe ju nxënës dhe dëshmitarë të mbushur plot për plot me gëzim. Është urimi që ia drejtoj secilit prej jush. E shoqëroj me lutje dhe me Bekimin tim, të cilin ia shtrij me gjithë zemër të gjithë njerëzve tuaj të dashur.

Nga “Osservatore Romano”

titujt kryesore

webmaster