VIZITA BARITORE NE  BORIC

Me datën 8 shkurt 2007 në orën 15.00 Imzot Angelo Massafra filloi vizitën e tij baritore në famullinë “Jezusi Dashuria e Mëshirshme” në Boriç - Vrakë, pikërisht në fshatin Grudë - Fushë.

 “Është një gëzim i madh për mua, u shpreh ai, që ndodhem mes jush. Kam ardhur të shoh punën baritore që zhvillojnë meshtarët e motrat, gjendjen shpirtërore dhe jetën e famullisë dhe për të biseduar me ju të  dashur besimtarë e për t’ju lënë disa porosi”.

Një i ri, duke i uruar mirëseardhjen, ndër të tjera tha:

“Për ne sot është një ditë e gëzueshme që ndodhet në mesin tonë Arqipeshkvi shumë i nderuar Imzot Angelo Massafra. Ne ju jemi mirënjohës dhe ju falënderojmë nga zemra për dhuratën më të madhe që na keni bërë për ndërtimin e Kishës. Ju jemi mirënjohës sepse tani mund të themi që e diela për ne është ditë feste dhe gëzimi, ditë kjo ku dëgjojmë Fjalën e Zotit të mishëruar. Faleminderit juve dhe priftërinjve, në mënyrë të veçantë Atë Antonios, e motrave.  Edhe një herë ju uroj Zoti ju bekoftë dhe ju ndihmoftë në punën tuaj të përditshme”.

Duke e  falënderuar të riun për fjalët e ngrohta Ipeshkvi i tha:

“Është hera e dytë që bëj vizitë baritore; kam ardhur t’ju nxis në fe. Dua t’ju jap katër porosi:

1. mbi pagëzimin, pasi dera kryesore është Krishti dhe nga pagëzimi kemi hirin e fesë. Feja mësohet me anë të katekizmit, feja trashëgohet nga gjyshërit, prindërit e dalëngadalë njeriu, fëmija, i riu e përvetëson atë  e kështu bëhet diçka personale;

2. mbi dashurinë, sipas fjalëve të Jezusit: “nëse më doni mua, doni të afërmin”. Me veprat e përditshme duhet ta tregojmë dashurinë e Zotit. Urdhërimet e Tenzot nuk janë pengesë por “udhëzime” që na drejtojnë dhe na tregojnë rrugën e dashurisë së Zotit;

3. mbi dashurinë për njëri-tjetrin: “duajeni njëri tjetrin sikur Unë iu desha juve”. Nuk duhet të flasim keq apo edhe të merremi me thashetheme për njeri-tjetrin; 4. Duke folur për familjen që është bërthama kryesore Imzoti iu besimtareve me fjalë të forta. “Ju o prindër kur fejoni vajzat mos ia jepni të parit që vjen, pa shqyrtuar mirë!”. Ndaluni, mendohuni, unë nuk jam kundër martesës me të huajt; “por ai djalë a di ta flasë gjuhën tonë? Nuk është mirë që të fejohen vajza e mitur dhe pa pëlqimin e saj, ajo është ende e vogël ka akoma nevojë për të luajtur me lodra. Nuk është mirë që një djalë 35 vjeç që është në emigrim të marrë një vajzë 14 -17 vjeçe. Mos i bëni gjërat me ngutësi.”

Pas Meshës  Arqipeshkvi bëri një takim me të gjithë besimtarët  duke u dhënë mundësi të gjithëve të bënin pyetje e të shprehnin ankesat e veta, dhe më pas bekoi varrezat e fshatit.

Duke e përshëndetur dhe falënderuar Arqipeshkvin, besimtaret u larguan  me gëzim dhe në të njëjtën kohë me një impenjim të madh që porositë e tija mos jenë vetëm një entuziazëm por një detyrë për ta venë në praktikë.

Në ditën e dytë  më 9 shkurt, në orën 09.00 Arqipeshkvi e vazhdoi vizitën e tij në shkollën 8 vjeçare të  Vrakës dhe në shkollën e mesme Gruemirë ku është pritur nga drejtori i shkollës Reshit Kurtulaj . Arqipeshkvi zhvilloi një bisedë shoqërore me drejtorin e kësaj shkolle, i cili  foli ndër të tjera për raportin e mirë që ka kisha katolike me institucionet shtetërore. Por gjatë bisedës u vunë në dukje edhe problemet që ka vetë shkolla e mesme Gruemirë;

Pastaj ipeshkvi e zhvilloi vizitën e tij edhe në komunën e Gruemirë ku është pritur nga kryetari i komunës Asim Burgaj dhe këshilli i tij. Ndër të tjera është diskutuar për raportin e mirë që ka kisha katolike me komunën.

Në orën 15.00 vizita vazhdoi në fshatin Hotnaj.

Pas Meshe, Arqipeshkvi është ndalur dhe ka biseduar me besimtarët, dhe u ka dhënë rastin që t’i drejtojnë ndonjë pyetje lidhur me argumentet e trajtuara. Më pas ka bekuar edhe varrezat.

Ditën e shtune më 10 shkurt, në orën 9.00 Arqipeshkvi ka takuar fëmijët e katekizmit me të cilët është ndalur dhe ka biseduar. Fëmijët ishin shumë të gëzuar, madje për disa prej tyre ishte hera e parë që takoheshin me Ipeshkvin. Pas katekizmit ipeshkvi u ka mësuar fëmijëve edhe këngë.

Takimi me të rinjtë e famullisë ka qenë mjaftë domethënës. Ipeshkvi është ndalur me të rinjtë duke diskutuar mbi problemet që ata kanë, që ata takojnë gjatë rritjes së tyre së pari si njerëz e më pas si të krishterë.

Në pasditen e së shtunës në orën 15.00, ipeshkvi ka kremtuar Meshën e Shenjtë në Gril, në kishën kushtuar të Lumit Jakob nga Biteto. Gjatë predikimit ka theksuar shumë gjëra që fatkeqësisht kanë prekur shoqërinë tonë; pas Meshe edhe aty ka folur me besimtarët mbi rolin e madh që ka familja, rëndësinë e madhe që kanë prindërit, dhe raportin prindër fëmijë.

Të dielën më 11 ishte kulmi i vizitës baritore. Para Meshës Arqipeshkvi u ka dhënë mundësi besimtarëve të afrohen tek sakramenti i pajtimit me Zotin, ku ai vetë është vënë për të rrëfyer. Në orën 9.30 ka kremtuar Meshën e Shenjtë. Atë ditë kisha ishte e mbushur plot e përplot si asnjë herë tjetër. Të rinj, fëmijë, të moshuar, burra e gra, të gjithë shprehnin kënaqësinë, buzëqeshjen, gëzimin e tyre që në mesin e tyre ishte Arqipeshkvi Angelo Masafra. Në emër të famullisë mirëseardhjen ia uroi përfaqësuesi Nikollë Gjinaj. Ipeshkvin e ka përshëndetur edhe famullitari Atë Mario Bosio.

Pas Meshe, ndërhyrjet nga ana e besimtarëve kanë qenë të shumta, por ipeshkvi u ka dhënë të gjithëve përgjigjen e duhur. Nder të tjera ai u tha: “Të punojmë më shumë me fëmijët  e të rinjtë, mjafton që një vajzë o një djalë gabon, e bëhet një skandal. Gabimi i njërit bëhet pengesë për të tjerët për sa i përket ardhjes në katekizëm e në Meshë. Një gjë që është vënë në dukje shpesh, është mospjesëmarrja e burrave në Meshën e së dielës.”

Një universitare e pyeti Imzot Angelon se sa është e rëndësishme është shkolla dhe a është e drejtë fëmijët dhe të rinjtë që të mbeten pa shkollë. Dhe përgjigja ishte kjo: “Shkolla ka një rëndësi të madhe si për fëmijët dhe të rinjtë. Marr shkas nga kjo pyetje që t’i nxis fëmijët ta frekuentojnë shkollën. Të rinj të përgatitur, një e ardhme më e mirë.”

Të hënën më 12 shkurt,  ipeshkvi ka shkuar në Rrjoll. Vizita baritore në këtë vend malor ka pasur gëzimin e dyfishtë; kënaqësinë për praninë e ipeshkvit, bariut të kishës për t’i takuar këto dele e qengja të lodhur dhe të vuajtur, me problemet e vështirësitë e tyre të përditshme. Gëzimi i dytë ka qenë bekimi i kishës pas riparimit të saj.

Pasditen e të hënës në orën 14.30, Imzot Massafra ka kremtuar Meshën e Shenjtë në Egç tek kisha kushtuar Sh. Elisë. Edhe aty ai ka ndeshur problemin e madh që ka ky fshat duke filluar nga rruga që është e shkatërruar dhe kur bie shi është, si thotë populli, si do Zoti.

Pasi është kthyer nga Rrjolli, pa marrë parasysh lodhjen e një ditë të tërë të kaluar në atë zonë malore edhe pse ora shënonte 17.30, ipeshkvi u ka kushtuar kohë për të bekuar një shtëpi në Boriç dhe për të bërë vizitë tek një i sëmurë.

Shpresojmë që kjo vizitë baritore të mbesë e paharruar në zemrat e të gjithë besimtarëve, dhe të japë frytin e saj, duke e ndërtuar njeriun e ri dhe duke i dhënë hov për të ecur përpara në dashuri të Zotit.  

titujt kryesore

webmaster