Beselidhja e Lezhes: 2 Mars 1444 - 2 Mars 2010

Më 2 mars, si zakonisht, u bë kujtimi i Besëlidhjes së Lezhës, në Sheshin dhe në Memorialin. U çua flamuri me Këngën kombëtare dhe me vallëzime të adoleshentëve. Kryetari i Bashkisë, Z. Viktor Tusha mori fjalën e tha:

“Të nderuar pjesëmarrës, sot është një ditë e shënuar, jo vetëm apër qytetin e Lezhës dhe qytetarët e tij, por dhe për mbarë kombin shqiptar. Festojmë 566 vjetorin e Kuvendit të princave shqiptar, të cilët të udhëhequr nga Gjergj Kastrioti – Skënderbeu, bashkuan mendjet dhe energjitë, forcat, financat dhe çdo gjë në luftë kundër hordhive otomane.

Para 566 viteve, qyteti ynë pati një vëmendje epokale. Ai hyri në historinë e lavdishme të këtij kombi, si vendi i bashkimit të të gjithëve kundër armikut të përbashkët, si vendi ku mblidhen njerëzit e mençur dhe të urtë për të kuvenduar dhe për të marrë vendime të rëndësime për të ardhmen e vendit. Në këtë vend dhe nga ky vend shkroi historinë më të lavdishme të kombit tonë, histori e cila jeton e gjallë me gjithë lavdinë e saj në kujtesën e shqiptarëve. Lavdia e saj u gdhend falë aftësive strategjike të udhëheqësit të shqiptarëve, falë gjakut të derdhur dhe sakrificave të mundimshme.

E gjithë kjo në emër jo të urrejtjes për një popull  tjetër, por të dashurisë për vendin e tij dhe popullin e vet. Dhe në emër të kësaj dashurie, për 25 vjet me radhë, u bë tmerri i pushtuesve otomanë  dhe sulltanëve të tij.

Ai zgjodhi Lezhën si një vend i garantuar dhe i besës, si vend bujar dhe mikpritës, si një vend strategjik për të ndërtuar perandorinë e tij të suksesit dhe të fitoreve. Por ai i dha Lezhës shumë më tepër se i mori. I dha krenari e lavd, e lartësoi emrin e këtij qyteti në piedestalet më të larta dhe të nderuara të kombit. Kjo është dhe arsyeja që përsëri zgjodhi Lezhën  e pikërisht këtë vend, ku do të prehej i qetë për të kaluar në të jetën e përtejme.

Një kishë shumë e thjeshtë, por që është dëshmitare e asaj historie epope, një varr ndër më të thjeshtit në Shqipëri, por që ka mbajtur brenda njeriun më të fuqishëm, heroin e vetëm kombëtar të shqiptarëve, një vend që ka merituar pak më tepër vëmendje nga autoritetet për shkak të madhështisë që mbart në vetvete.

Meriton heroi ynë kombëtar shumë më tepër se kaq sa i kemi dhënë, kjo jo vetëm për ta nderuar Gjergj Kastriotin dhe kuvendin e tij historik, por se kështu nderojmë veten dhe lartësojmë historinë e kombit tonë.

Lavdi kësaj date historike që e pagëzoi Lezhën me emrin e Besëlidhjes dhe i dha Shqipërisë emër të nderuar në Evropë dhe më gjerë. Lavdi figurave të nderuara të këtij kombi. Rroftë Shqipëria!”

Pas mori fjalën Arqieshkëv Metropolit i Shkodër-Pult, Imzot Angelo Massafra, i cili dha këtë mesazh: “Shumë të nderuara Autoritete Të nderuara Zonja dhe Zotërinj,

Sa herë që vij në këtë Memorial jam thellë i prekur në shpirt dhe ndiej gëzimin e takimit shpirtëror me një pasuri të paçmueshme të kombit tonë e të popullit tonë sepse këtu pushon Heroi ynë Kombëtar – Gjergj Kastrioti. Ky Memorial tregon heroizmin e Gjergj Kastriotit – pra, dashurinë e tij për kombin si dhe angazhimin e Tij për të bashkuar Princat e fiseve shqiptare.

Sot kujtojmë, pikërisht, përvjetorin e Kuvendit të Lezhës.Gjergj Kastrioti njëmend pushon në këtë Memorial, por nuk hesht. Edhe sot na flet. Si Arqipeshkëv Metropolit i Shkodër-Pult, sa do të doja që ata, të cilët sot kanë në dorë fatet e popullit tonë, të punonin më shumë me idealet e të parëve.

Sa do të doja që Politikanët tonë të kuptonin se Shqipëria nuk është produkti i tyre, por është ëndrra e brezave të Arbrit që këtë tokë e kanë dashur më shumë se jetën dhe fëmijët e tyre.

Dhe si ipeshkëv i Kishës Katolike, i lutem Zotit dhe Pajtorëve tanë, Martirëve dhe Shenjtërve shqiptarë që Shqipëria të përparojë në çdo aspekt.

Që t'u kthehet kuptimi i së mirës së përbashkët: dhe urgjentisht Burrat dhe Gratë e Shtetit të ndërtojnë dialogun e sinqertë dhe frytdhënës; dhe që të gjithë të angazhohemi për mirëkuptimin dhe përparimin e Shqipërisë, për të tejkaluar sa më shpejt krizën aktuale politike dhe ekonomike.

Urime dhe faleminderit të gjithëve”.

titujt kryesore

webmaster