Formimi i Junioreve

Njeriu është gjithmonë në ecje, i krishteri është i vetëdijshëm që duhet të mos ndalet kurrë dhe është i vetëdijshëm drejt kujt ecën. Të njëjtën dëshirë për të ecur e kemi edhe ne rregulltaret; nuk ndalemi kurrë, sepse sytë tanë janë të fiksuar drejt pikëmbërritjes, drejt qëllimit që është Krishti, dhëndri ynë Hyjnor. Edhe këtë vit Kisha na ka ofruar një itinerar formimi shpirtëror e njerëzor dhe ne i jemi përgjigjur kësaj dhurate me gatishmëri. Jemi të bindura që bukurinë e përkushtimit tonë dhe Personin të cilit i kemi dhuruar jetën, nuk do të arrijmë ta njohim plotësisht, por jemi të sigurta që çdo moment që na ofrohet është një rast për ta njohur, është një “shans” për ta dashur, për ta falënderuar për besnikërinë e tij të amshueshme dhe për të ripërtërirë “po-në” tonë.

Prandaj më 13 nëntor kemi bërë takimin e parë në seminarin ndërdioqezan në Shkodër. Ishim rreth 37 motra. Ishte një moment i bukur kur nga kongregata të ndryshme jemi gjetur të gjitha së bashku, jemi takuar, kemi bashkëndarë me pasion te veçantë misionin tonë, kemi gëzuar për njëra-tjetrën, kemi bashkëndarë shqetësimet tona, kemi dëgjuar njëra-tjetrën, kemi shikuar në sy njëra- tjetrën e kemi takuar dashurinë e Krishtit. Kemi mirëpritur me gëzim motrat e reja dhe me to e kemi falënderuar Zotin që vazhdon ta bekojë popullin shqiptar dhe secilin prej nesh me dhuratën e thirrjes. Ditën e shtunë kemi pasur në mesin tonë don Lorenzo Rossetti-n, i cili ka trajtuar temën:”Ky është Biri im i dashur, dëgjojeni” dhe na ka folur për njerëzimin e Jezusit, misterin e Jezusit, dhe për Jezusin si shpëtimtar. Na ka dhënë mundësinë të rizbulojmë edhe një herë Jezusin si njeri, i cili bëhet i tillë për të ecur me ne dhe kërkon që ta njohim si Hyjin e jetës sonë, i cili do dhe merr dashuri si njeri, por thotë që Ai është dashuria e vërtetë. Shqetësohet me ne si njeri, por na thotë unë e kam shpëtuar botën dhe jam Hyj. Pastaj si gjithmonë kemi jetuar disa momente bashkëndarjeje dhe reflektimi në grupe. Kemi mbyllur pasditen tonë me meshën e shenjte duke e falënderuar Zotin për këto momente dhe duke vendosur në duart e tija jetën tonë të kushtuar atij dhe misionit që Ai vetë na e ka besuar që Ai ta shenjtërojë dhe ta plotësojë atë që ne nuk arrijmë ta bëjmë. Pas darke secila prej  nesh ka kërkuar të animojë grupin me lojëra, këngë e barceleta. Ky ka qenë takimi I parë.

Ndërsa me datë 23 jemi mbledhur edhe një herë të gjitha. Këtë herë takimi është udhëhequr nga atë Mario Imperatore i cili ka trajtuar këto tema: ''Katekumenati dhe jeta e Kushtuar, Jeta e Kushtuar dhe Këshillat Ungjillore (Kushtet), Kushtet dhe Bashkësia, Bashkësia dhe Misioni'', me anë të të cilave na ka ndihmuar të rizbulojmë thirrjen në jetën e Kushtuar si përmbushje të thirrjes Pagëzimore. Si gjithmonë kemi pasur mundësinë të bashkëndajmë së bashku momente lutjeje, bashkëndarjeje dhe argëtimi. Ditën e diele jemi përshëndetur e secila prej nesh është kthyer në bashkësinë dhe misionin e saj me sigurinë që jemi gjithmonë të bashkuara shpirtërisht!

Motër Violeta Tushaj dhe motër Alma Zogu

 titujt kryesore

webmaster