Mesazhi i Benediktit XVI per Kreshmet 2010

Me kënaqësi ju prezantojmë një përmbledhje të mesazhit të Atit të Shenjtë Benedikti XVI  për Kreshmet 2010.

“Drejtësia e Hyjit u dëftua me anë të fesë në Krishtin (krh. Rm 3,21-22)” – këto fjalë të Shën Palit janë edhe thelbi e mesazhit që Ati i Shenjtë i ka dërguar mbarë Kishës me rastin e Kreshmës së sivjetshme.

Para së gjithash Papa ndalet në domethënien e termit “drejtësi” që në gjuhën e përgjithshme do të thotë “t'i japësh secilit atë çka i takon – dare cuiquque suum”, sipas shprehjes së njohur të Ulpianit, jurist romak i shekullit III. Por ky përkufizim klasik nuk saktëson se çka është ajo “që i takon” për t'ia siguruar gjithkujt. Çka njeriu ka më shumë nevojë nuk mund t'i garantohet me anë të ligjit. Por ligji rrezikon të mos mendojë t'ia japë njeriun kryesoren: Hyjin. Papa vazhdon: Njeriu «më shumë se për bukën ai ka nevojë për Hyjin. Vë re shën Augustini: nëse “drejtësia është virtyti që i jep secilit atë çka i takon…nuk është drejtësi e njeriut  ajo që shkul njeriun nga Zoti i vërtetë” (De civitate Dei, XIX, 21)».

Duke dashur të gjejmë rrënjët e padrejtësisë Ati i Shenjtë na sjell ndër mend fjalët  Jezusit: “S'ka asgjë përjashta njeriut që mund ta bëjë atë të papastër duke hyrë në të, por çka del prej njeriut -ajo e bën të papastër.... Çka del prej njeriut ajo e bën të papastër, sepse prej brendisë -prej zemrës së njeriut rrjedhin: mendimet e këqija” (Mk 7,14-15.20-21).

Këto fjalë të Jezusit tregojnë se sa të gabuara janë përpjekjet e atyre që mendojnë se birimi i padrejtësisë ka shkaqe të jashtme dhe që përpiqen të zhvendosin shkaqet e jashtme që pengojnë realizimin e drejtësisë. Por «padrejtësia, fryt i së keqes, nuk i ka rrënjët vetëm të jashtme; e ka zanafillën në zemrën e njeriut  ku ndodhen farat e një bashkëfajësie të mistershme me të keqen». Kjo bashkëfajësi e mistershme me të keqen bën që ne të mos e realizojmë natyrën tonë, e cila në fakt duhej të ishte e gatshme për të dhuruar, por që egoizmi e çon të dëshirojë të dalë mbi të tjerët dhe kundër të tjerëve.

Po si mund të shërohet egoizmi i njeriut? Si mund t'i shmangemi bashkëfajësisë së mistershme me të keqen?

Papa vazhdon duke kujtuar se Izraeli e kishte kuptuar se dashuria e Hyjit për mëkatarin, e fton edhe atë për dashurinë ndaj të varfrit.

Krishti do të na mësojë se padrejtësia mposhtet duke dhuruar vetveten, jo thjesht duke i dhënë tjetrit atë që i takon. Ai, Krishti, u bë flija pajtuese mes Hyjit dhe të gjithë njerëzve: “Tani veç, pavarësisht nga Ligji, u dëftua vepra shëlbimtare (drejtësia) e Hyjit, e dëshmuar prej Ligjit dhe prej Profetëve, vepra shëlbimtare (drejtësia) e Hyjit me anë të fesë në Jezu Krishtin për të gjithë ata që besojnë -pa farë dallimi, sepse të gjithë mëkatuan dhe u përjashtuan nga lumturia e Hyjit -dhe me hirin e tij, të gjithë e fituan falas drejtësinë, në saje të shpërblimit që bëri Jezu Krishti. Atë Hyji e caktoi të jetë, në sajë të fesë, fli pajtuese me anë të gjakut të vet” (Rom 3,21-25).

Sikur të mos ishte ky dhurim i dhimbshëm i Jezusit, ne nuk do ta fitonim drejtësinë para Hyjit: nuk do të na takonte, por ai na e dhuroi falas. Kështu njeriu është i ftuar të bëjë. Edhe ne ftohemi të japim nga vetja jonë. Përse? Papa e thotë shumë bukur: «Falë veprës së Krishtit, ne mund të bëhemi pjesë e drejtësisë “më të madhe” që është ajo e dashurisë (krh. Rm 13,8-10), drejtësia e atij që në çdo rast e ndien veten më shumë debitor se sa kreditor, pasi ka marrë më shumë se sa mund të mendojë. I fortë me këtë përvojë i krishteri është i nxitur të kontribuojë në formimin e një shoqërie të drejtë, ku të gjithë të marrin çka është e nevojshme për të jetuar me dinjitetin që i takon njeriut dhe ku drejtësia merr jetë nga dashuria».

E në mbyllje, duke na uruar Kreshme të mbara, përfundon: «Ju përcjell të gjithëve bekimin Apostolik».

Vatikan më 30 tetor 2009

Papa Benedikti XVI

  titujt kryesore

webmaster