JUBILEU I KATEDRALES

150 VJETORI I BEKIMIT TË GURIT TË PARË TË KATEDRALES

Nuk mund të mos falënderojmë Zotin për fenë dhe lirinë e fesë që Ai na ka dhuruar. Mund ta themi me plot gojë këtë gjë, pasi shijuam hirin dhe faljen e Zotit gjatë Jubileut të jashtëzakonshëm që na fali Papa Benedikti XVI për të kremtuar me dinjitet 150 vjetorin e bekimit të gurit të parë të Katedrales së shtrenjtë të Shkodrës. Ky Jubile zgjati nga tetori i 2007 deri më 25 prill të 2008: kohë që në bashkim me Kishën fiksuam Atë, Jezusin dhe nga fjala e sakramentet e tij u ndriçuam me urtinë se dyert e ferrit nuk mund të ngadhënjejnë mbi dashurinë e Zotit, Kishën.

Gjatë kësaj kohe u zhvilluan kremtime liturgjike: eukaristi e adhurime; vigjilje lutjeje e shtegtime, të gjitha kulmuan në kremtimin e datës 12 janar 2008 kur i ftuar nga Sh. T. Imzot Angelo Massafra  arqipeshkëv i Shkodër-Pult, Hirësia e Tij, Franc Kardinal RODÉ udhëhoqi Liturgjinë e Kushtimit të Katedrales së Shën Shtjefnit Shkodër, pasi ajo qe dhunuar nga regjimi komunist. Atë ditë ishim të gjithë së bashku: ipeshkvijtë e Shqipërisë dhe meshtarë të ardhur nga të katër anët, besimtarë laikë të Krishtit dhe njerëz të kushtuar në heshtje dhe uratë fiksonim gjestet e pranisë së Tejet të Shenjtit. Shkodra nuk do ta harrojë këtë datë.

Një tjetër datë është ajo e kremtimit për mbylljen e Jubileut, në kujtimin liturgjik të Shën Markut, më 25 prill 2008. Një datë kjo që është plot me domethënie për popullin tonë

shqiptar, pasi po në këtë datë, Shërbëtori i Hyjit, Papa Gjon Pali II erdhi në Shqipëri dhe në Katedralen e Shkodrës shuguroi 4 ipeshkvijtë e parë të Shqipërisë pas komunizmit e ndër ta Sh. T. Imzot Rrok Mirdita dhe Sh. T. Imzot Zef Simoni. Po në këtë datë në vitin 1998 mori misionin e Ipeshkvit të Shkodrës Sh. T. Imzot Angelo Massafra, dhe po në këtë datë u bë dhe mbyllja e Jubileut për 150 vjetorin e bekimit të gurit të parë të Kishës Katedrale.

Por nuk mund të mos përmenden të gjitha ato shtegtime që u bënë nga besimtarët në Kishën Katedrale gjatë këtij Jubileu. Të udhëhequr nga famullitarët e tyre të dashur e të nderuar, së bashku me motrat e kushtuara dhe me animatorët e jetës së krishterë, besimtarët përjetuan në shtegtime hirin e Zotit dhe unitetin e Kishës që në një mënyrë shprehet edhe nga prania e Kishës nënë në dioqezë që është Katedralja. Do të veçoja këtu shtegtimet që bënë 4 Zonat Baritore të Dioqezës si dhe atë që bëri Legjioni i Marisë, Rinia Dioqezane, jubileun e të sëmurëve dhe atë të disa shkollave katolike.

Zoti ua shpërbleftë të gjithëve çdo hap që hodhën për ta takuar Atë edhe në këtë Kishë.

Gjithashtu një sërë aktivitetesh kulturore janë zhvilluar gjatë atmosferës së Jubileut të përvjetorit të Katedrales. Nuk mund të mos falënderoj në Zotin të gjithë ata burra e gra, të rinj e të reja që janë angazhuar për një kremtim solemn të kësaj kohe. Por në rrallë të parë dua të falënderoj Sh. T. Imzot Angelo Massafrën për çdo nxitje, këshillë dhe ndihmë ekonomike si dhe të Nderuarin dom Gjovalin Simonin për gatishmërinë dhe bashkëpunimin e mrekullueshëm.

E shumë e shumë laikë që po t'iu përmend emrat do t'u donin po aq faqe se janë vitet e kësaj Katedrale. Por i mbaj në zemër dhe bekoj Zotin që përkrah meshtarësh vendos njerëz me virtyte e dije dhe na bën të ndihemi krenarë për ta. Ndër aktivitetet e zhvilluara do të veçoja Koncertin e Korit të Kapelës Muzikore Sistina i ardhur nga Vatikani; përkujtimin e 70 vjetorit të Melodramës “Ruba e Kuqe”, montazhin dramatik “Nana e të gjithëve” me regji të Z. Gjovalin Stefës; takimin studimor që ishte i një niveli të lartë mbi faktet historike dhe kujtimet e ndërtimit të Kishës Katedrale të Shkodrës; ardhjen dhe koncertin e Bandës frymore nga Aradeo Lecce Itali dhe koncertin e grupit “Arte Giovane” nga Trieste Itali.

Shumë takime të tjera dhe aktivitete u zhvilluan në kuadër të kremtimit të 150 vjetorit të gurit të parë të Katedrales së Shkodrës, por jam i bindur se nesër kur të kremtohet 250 vjetori, do të na kopjojnë diçka e ndoshta do të festojnë më mirë se ne. Por për diçka jam krejt i sigurt: shumë shkodranë që kremtuan 150 vjetorin ishin dëshmitarë okularë dhe pjesë e asaj që quhet HISTORIA E KISHËS KATEDRALE.

Dom Gjovalin Sukaj

titujt kryesore

webmaster