LAJME NGA DIOQEZA E SAPËS

SHTEGTIMI NË SHËN MARK

Në ditën e Shën Markut Ungjilltar, mijëra besimtarë nga zonat e ndryshme të Dioqezës së Sapës dhe të Shkodrës, shtegtuan në Kalanë e Dejës, drejt shenjtërores së Shën Markut, drejt kësaj Kishe të lashtë, që dikur ka qenë Kishë Katedrale e Dioqezës së Dejës. Në nderim e përkujtim të këtij shenjti, besimtarët përcollën njetin e përshpirtërinë e tyre duke kërkuar ndërmjetësinë e Shën Markut, përmes lutjes dhe përjetimit të Meshës shoqëruar me këngët nga kori i katedrales “Nënë Tereza”. Ky shtegtim, që tashmë është bërë tradicional, nga ana e besimtarëve, vit për vit po tregon përshpirtërinë dhe gjallërinë e fesë dhe të besimit, si dhe zgjon në kujtesën e më të moshuarve, traditën e bukur që e stoliste këtë ditë.

Në qendër të këtij shtegtimi ishte kremtimi solemn i Meshës Shenjte udhëhequr nga Ipeshkvi i vendit, Shkëlqesia e tij, Imzot Lucjan Avgustini në bashkëkremtim me 10 meshtarë të tjerë. Pas liturgjisë hyrëse, pasoi homelia e Imzot Lucianit, i cili mes të tjerash theksoi se “në këtë mijëvjeçar të tretë Kisha nuk lodhet së shpalluri Ungjillin që dhuron shpëtimin dhe lumturinë e vërtetë. Secili prej nesh duhet të jemi lajmëtarë dhe dëshmitarë të Krishtit. Shpallja e Ungjillit nuk është detyrë vetëm e meshtarëve, por e gjithë bashkësisë së krishterë. Dhe në këtë detyrë të madhe të misionit ungjillëzues të Kishës, askush nuk mund të bëjë rolin e spektatorit”.

Duke porositur, Shkëlqesia theksoi se “i krishteri, pavarësisht nga pengesat apo kundërshtimet, duhet të vazhdojë të jetë lajmëtar i Ungjillit dhe i mësimeve të Krishtit, të jetë njeri i shpresës duke e mbështetur besimin e vet jo në mjetet e veta njerëzore, por në dashurinë e pafundme dhe besnike të Hyjit”. Duke ndjekur gjurmët e traditës, dhe për ta ngjallur edhe një herë këtë traditë të lashtë, në ditën e Shën Markut, u shfaq panairi  i përgjithshëm me vlera të mëdha kulturore, historike, turistike e tregtare. Në këtë panair u paraqiten punime artizanale, vegla bujqësore të hershme, prodhime blegtorale, punime nga fusha e artit, si dhe veshje popullore kombëtare krahinore, të cilat ia shtuan së tepërmi vlerat e këtij panairi dhe festës. Për ta bërë sa më të larmishme këtë ditë feste, qendra e kulturës Vau-Dejës, në bashkëpunim me të rinjtë e famullisë “Shën Nikolli” shfaqën edhe një koncert me këngë, recitime e melodi të luajtur me vegla të ndryshme muzikore.

titujt kryesore

webmaster