LEGJIONARËT E MARISË RIPËRTËRIJNË PREMTIMIN

Jemi në vazhdimin e atmosferës së festës së Pashkëve, në përjetimin e gëzimit të Ngjalljes së Jezu Krishtit, Zotit tonë. Legjionarët e Marisë në dioqezën Shkodër-Pult me datën 2 prill 2008 u mblodhën së bashku në katedralen e Shkodrës për të ripërtërirë premtimin e tyre ndaj Zojës së Bekuar, premtim ky që përsëritet çdo vit.

Meshën e shenjte e kryesoi Dom Dritan Ndoci, në bashkëkremtim me Dom Rozario, meshtar i ardhur nga Malta së bashku me Joseph Micallef, anëtar i Legjionit të Marisë Maltë - për të vizituar Legjionin e Marisë në Shqipëri, duke qenë se ky i fundit i është besuar mbikëqyrjes së Legjionit të Maltës.

Pas predikimit secili anëtar i Legjionit u afrua tek truporja e Zojës së Hireve dhe shqiptoi fjalët e kushtimit ndaj Saj duke thënë: “Unë jam i (e) yti (jotja), Mbretëresha ime, Nëna ime, dhe gjithçka që unë kam është e jotja”.

Pas premtimit personal të secilit dhe pas premtimit të përbashkët Mesha vazhdoi si normalisht.

Pasditen e kësaj date miqtë tanë maltezë patën një takim me Sh. T. Imzot Angelo Massafra, për t'i paraqitur atij përshtypjet dhe planet që ata kishin rreth Legjionit të Marisë në këtë dioqezë, dhe për të pranuar udhëzimet e tija.

Në datat 4 dhe 5 prill u zhvillua në ambientet e Fshatit të Paqes një seminar kombëtar për formimin e legjionarëve, të cilin e drejtuan Dom Rozario dhe vëlla Jozefi duke ftuar këtu edhe meshtarë të tjerë për të mbajtur disa ligjërata. Ishin ditë mjaft të këndshme ku ndërthureshin lutja, Mesha e Shenjtë, meditimi, ligjëratat ndërhyrjet dhe pyetjet e të pranishmëve si edhe momentet e çlodhjes.

Emocione gëzimi solli sidomos prania e Imzot Angelo Massafrës në ditën e dytë të këtij seminari, i cili përshëndeti dhe falënderoi miqtë tanë nga Malta, por edhe të gjithë legjionarët për angazhimin e tyre të sinqertë në këtë ecje brenda Kishës së Hyjit.

Seminari u mbyll me një moment të shkurtër adhurimi ku pati një pjesëmarrje të fortë nga ana e të pranishmëve, e kjo dallohej nga heshtja e plotë që ato mbanin përballë Jezusit në Eukaristi.

Pastaj të rinjtë e famullisë së Bardhajve na emocionuan shumë më vënien në skenë të dramës “Në vorbullën e martirit” me regji të prof. Gjovalin Stefës, ku paraqiteshin fillimet e përndjekjes komuniste ndaj klerit katolik në Shqipëri.

Të gjithë të pranishmit shprehën gëzimin e tyre për ushqimin e mirë shpirtëror që morën gjatë këtyre dy ditëve të formimit.

Gjithashtu edhe në dioqezën e Sapës në këto ditë u zhvillua ACIES në praninë e vetë Imzot Lucian Avgustinit.

Edhe në dioqezën e Lezhës u bë ripërtëritja e premtimit nga legjionarët e kësaj dioqeze, në Meshën e kryesuar nga Dom Emanuele e  Imzot Ottavio Vitale, ipeshkëv i kësaj dioqeze.

Luçie Preçi

titujt kryesore

webmaster