SHUGURIMI I KISHËS “MËSHIRA HYJNORE” – DRAGUSHË

ë në vitin 2000, nga Papa Gjon Pali II, besimtarët e famullisë “Shën Panteleoni” në Dragushë të Zadrimës gëzuan në festën e Shugurimit të Kishës kushtuar “Mëshirës Hyjnore”, kësaj zemre të dashur dhe të mëshirshme për ne, aq sa derdhi edhe pikën e fundit të gjakut për shëlbimin tonë.

Bashkë me popullin e Zotit në këtë kremtim morën pjesë Ipeshkvi i Sapës, Imzot Lucian Avgustini, Vikari Gjeneral Dom Carlo Fantini, famullitari Dom Kastriot Gjoka, meshtarë e motra të Dioqezës, autoritete civile të pushtetit lokal, si dhe deputeti i zonës, ish Ministri i Drejtësisë Z. Aldo Bumçi.

Mesha e Shugurimit u udhëhoq nga Imzot Luciani, i cili shprehu gëzimin e kësaj dite të dhuruar prej Zotit dhe bamirësve që e mundësuan ndërtimin e kësaj Kishe. Në fillim të kremtimit Ipeshkvi  i dorëzoi famullitarit çelësin e Kishës së re, dhe të gjithë së bashku hynë me gëzim në shtëpinë e Zotit, dhe vazhduan me ritin e bekimit të tempullit të ri. Gjatë homelisë së tij, Imzot Luciani tha se “Kisha është vatha që ka si derë të vetme dhe të domosdoshme Krishtin. Është gjithashtu grigja, për të cilën vetë Zoti ka paralajmëruar se do ishte bariu, dhe delet e tij, edhe pse të qeverisura nga barinj njerëzorë, megjithatë çohen në kullotje dhe ushqehen vazhdimisht nga vetë Krishti, nga Bariu i mirë, që dha jetën për delet e veta. Kisha para së gjithash është një bashkësi besimtarësh, që do të thotë bashkim zemrash dhe mendjesh, do të thotë solidaritet dhe dashuri të ndërsjellë”. Gjithashtu ai i ftoi besimtarët që të gëzojnë në këto ditë Pashkësh në pritje të Rrëshajëve. Janë këto 50 ditë të kësaj kohe të posaçme shpirtërore në të cilat Krishti në mënyrë të veçantë është i pranishëm në mesin tonë.

Pas homelisë Imzot Luciani vazhdoi kremtimin e riteve të tjera, kushtimin e altarit dhe të krejt Kishës.

Në fund, famullitari Dom Kastriot Gjoka falënderoi të gjithë të pranishmit dhe bamirësit që kontribuan në ndërtimin e kësaj kishe. Punimet për ndërtimin e kishës filluan në vitin 2006, me iniciativën e Ipeshkvit të asaj kohe Imzot Dodë Gjergjit. Pas marrjes së detyrës si Ipeshkëv i Dioqezës së Sapës, nga Imzot Lucian Avgustini, kjo iniciativë mori përmasa të gjëra, ku falë bamirësve dhe përkujdesjes së tij të veçantë, u bë i mundur ndërtimi i Kishës, që historikisht njihet si e para Kishë e ndërtuar në këtë fshat. 

Vjoleta Marashi 

titujt kryesore

webmaster