SHKOLLA COR JEZU - NË 10 VJETORIN E SAJ

IMrekulli të mëdha ka bërë Zemra e Shenjtë e Jezusit në lagjen “Mark Lulaj”,  veçanërisht në këto dhjetë vite të ngritjes së institucionit shkollor kushtuar pikërisht Zemrës së Shenjtë të Jezusit e quajtur në gjuhën latine “Cor Jesu”. Prandaj motrat Apostulle, stafi pedagogjik dhe vetë nxënësit u angazhuan për realizimin e një feste të madhe për të gëzuar për punën dhe rezultatet e arritura deri më sot.

Kjo festë u organizua më 15 maj 2009 me angazhimin e palodhur të shumë bashkëpunëtorëve, nën drejtimin e regjisorit Gjon Kola. Ky program mbante titullin “Pranverë në Mark Lulaj”, titull i cili simbolizon objektivin që ka shkolla: të realizojë pranverë në zemrat e brezave të rinj nëpërmjet edukimit të fëmijëve në të gjitha nivelet e personit dhe u paraqit në Teatrin “Migjeni”.

Fillimisht vijoi me një dokumentar ku paraqitej qartë fillimi i ndërtesës së kësaj shkolle, vënia e gurit të parë dhe ngritja e ndërtesës. Gjithashtu shihen disa nga motrat Apostulle, të parat në fillimin e kësaj veprimtarie. Nuk mund të mungonte prania e Imzot Angelo Massafrës i cili e bekon këtë institucion. Pastaj vërehen aktivitetet didaktike dhe veprimtaritë kulturore të ndryshme që janë zhvilluar në këtë dekadë për fëmijët.

Menjëherë pas këtij dokumentari radha vazhdon me Fjalën poetike e cila përmbante karakter patriotik si dhe paraqitjen e vlerave të ndryshme. Poetët e zgjedhur ishin:

Atë Gj. Fishta, Dom N. Mjeda, G. Copporoccio, M. Camaj, I. Badare, Z. Staku.

Programi vazhdoi me interpretime të tjera nga nxënësit, të cilët nëpërmjet poezive shprehën bukurinë e natyrës, të stinës së pranverës, stinë që fëmijët tashmë po përjetonin. I veçantë ishte edhe  interpretimi i vëlla-vrasjes, i cili vuri në dukje devijimin e njeriut që i shtyrë nga vesi për të vjedhur vret vëllain pa ditur se kush ishte. Theksojmë se në këtë program janë përfshirë të gjitha nivelet e moshave të fëmijëve duke filluar që nga arsimi para-arsimor deri tek nxënësit e klasës së nëntë.

Përveç interpretimeve u kënduan këngë të ndryshme nga vetë kori i shkollës, i përbërë nga nxënës të klasave të ndryshme si dhe nga nxënës solistë, të përgatitur nga mësuesja: Anjeza Gjeluci.

Vallet e gërshetuara me pjesët e ndryshme të shfaqjes i dhanë një atmosferë edhe më festive dhe të gëzueshme të gjithë të pranishmëve, realizuar këto nga puna e palodhshme e koreografit Altin Golemi.

Në fund të interpretimeve dy prezantuese të klasës së nëntë: Amela Malaj dhe Sidorela Kroni me gëzim të madh ftuan dy nga motrat Apostulle si përfaqësuese aktuale të Institutit, drejtoreshën e shkollës motër Raffaella De Zan dhe motrën provinciale Carmen Lombardi e cila pati ardhur pikërisht për këtë festë.

Më pas përshëndetjen e bëri Inspektori i Drejtorisë Arsimore, Z. Luigj Gjonaj, cili përshkroi pak a shumë ecurinë e kësaj shkolle.

Edhe kryesenatori i Qeverisë së Nxënësve: Xhulio Haxhia, ish-nxënës i shkollës sonë, në emër të gjithë Qeverisë së Nxënësve dha titullin me “Motivacion” si për drejtoreshën ashtu edhe për shkollën. 

Në fund skena u mbyll me duartrokitje, me shkëmbim urimesh e me fjalët e prezantueseve: “Mirupafshim në festa të tjera”.

Motrat Apostulle të Zemrës së Shenjtë të Jezusit

 titujt kryesore

webmaster