150 vjetori i Seminarit Nderdioqezan Shqiptar

Kjo është dita që na e dhuroi Zoti:

Kjo është dita që na e dhuroi Zoti:

të galdojmë e të gëzojmë në të! Aleluja!                                                           (Ps 118,24)

Ditë me të vërtetë të paharrueshme, datat 16 e 17 prill 2010, në të cilat kemi kremtuar 150 vjetorin e themelimit të Seminarit Papnor Shqiptar. Duke përshkuar historinë e tij të gjatë prej një shekulli e gjysmë në dy degë, përpara regjimit komunist dhe, 47 vjet më pas, me emrin e ri “Mater Boni Consilii”, kemi zbuluar fillin e artë të veprimit të Hyjit për Kishën në këtë tokë. Ndryshimet socio-politike të këtyre 150 vjetëve kanë vënë në provë të vështirë më shumë se një herë institucionin e Seminarit Shqiptar, por për një plan të mistershëm të Hyjit dhe për një vullnesë të caktuar njerëzore, ai gjithmonë ka gjetur një gjallëri të re për të vazhduar misionin e vet formativ.

Për këtë arsye kremtimi i këtij përvjetori ka qenë rast që ne të marrim nga e kaluara një hov të ri drejt të ardhmes dhe të forcojmë shpresën që të mund ta paraqesim vizionin katolik si tharm bashkësie dhe si vend shkëmbimi e dialogu me vëllezërit tanë Ortodoksë e afërsie me Myslimanët.

Tre kanë qenë momentet më domethënëse të kremtimit.

- Pasditen e datës 16 prill, studentët e Institutit Filozofiko-Teologjik kanë paraqitur një dramë, me titull “Kush do të na ndajë prej dashurisë së Krishtit” (Rom 8,35), për të vënë në pah ndikimin e fortë të formimit të Seminarit në kulturën shqiptare dhe se si nga vitet që kanë bërë së bashku në Seminar disa meshtarë kanë gjetur forcën për t'u bërë ballë provave më të vështira në kohën e përndjekjeve komuniste.

- Momenti i dytë ka qenë mëngjesi i datës 17 maj, ku, në prani të Kardinalit Prefekt i Kongregatës për Edukimin Katolik, Kard. Zenon Grocholewski, të Nuncit Apostolik të Tiranës, të Ipeshkvijve të Konferencës Ipeshkvnore Shqiptare dhe të Delegacionit të Akademisë Teologjike Ortodokse të Durrësit, pas përshëndetjes së Rektorit që ka lexuar edhe një mesazh të Atit Gjeneral të Shoqërisë së Jezusit, është paraqitur një historik i shkurtër mbi seminarin Papnor në Shqipëri të ndjekur nga paraqitja e librit të Dom Marcus Peters, “Përballjet e Historisë në Shqipëri 1919-1996”, që me këtë rast është botuar në gjuhën shqipe.

Në hyrje të Seminarit ishte përgatitur një ekspozitë me foto dhe dokumente, që ilustronin jetën dhe momentet domethënëse të jetës së Seminarit në dy fazat e historisë së tij, para dhe pas komunizmit.

- Momenti i tretë kremtues është zhvilluar në Katedralen e Shkodrës në Meshën Pontifikale të udhëhequr nga Shkëlqesia e Tij Kardinal Grocholewski. Kanë bashkëkremtuar Shkëlqesia e Tij Nunci Apostolik, të gjithë Ipeshkvijtë e Konferencës Ipeshkvnore Shqiptare dhe shumë meshtarë dioqezanë e rregulltarë që vinin nga e gjithë Shqipëria. Homelia e Kardinalit, në sintoni me leximet e ditës, ka theksuar rëndësinë e Eukaristisë në jetën e meshtarit dhe në ecjen formative të seminaristëve dhe ka ftuar si Ipeshkvijtë, ashtu edhe besimtarët që ta ndiejnë si të tyret jetën dhe frytshmërinë e Seminarit.

Në fund të kremtimit eukaristik, Kardinali i ka dorëzuar Atë Rektorit një pergamenë me Bekimin apostolik, me autografin e Atit të Shenjtë Benedikti XVI, për Seminarin. Duke vazhduar veprën formative sot, në fillim të Mijëvjeçarit të Tretë, ndiejmë shumë përgjegjësi për t'i qëndruar besnikë një tradite, si edhe për të qenë të aftë për atë përditësim të nevojshëm, që kohët e reja gjithmonë e kërkojnë.

U jemi shumë mirënjohës të gjithë atyre që kanë ndërhyrë – dhe kanë qenë shumë dhe shumë më shumë seç ishte parashikuar – dhe të gjithë atyre që na kanë ndihmuar në realizimin e kësaj ngjarjeje. Mund të themi se në Shkodër gjithçka është vënë në dispozicionin tonë, nga Katedralja deri te Teatri. Një faleminderit të përzemërt korit që e ka pasuruar Eukaristinë. Një falënderimit edhe për të gjithë bashkëpunëtorët e dramës: regjisorin, aktorët, figurantët dhe teknikët, për vënien në skenë të së cilës 50 vjet janë angazhuar për rreth 2 muaj.

Shumë e rëndësishme dhe domethënëse ka qenë prania dhe pjesëmarrja e krejt Konferencës Ipeshkvnore dhe u jemi me të vërtetë mirënjohës për mesazhin e urimit që i kanë dërguar Seminarit me këtë rast.

Falënderojmë Shkëlqesinë e Tij Nuncin Imzot Ramiro Moliner Ingles, i cili ka ndërmjetësuar për ardhjen e Kardinalit Prefekt të Kongragatës për Edukimin Katolik, Kard. Zenon Grocholewski, dhe e ka shoqëruar për gjatë gjithë kohës së qëndrimit të tij në tokën shqiptare.

Atë Armando Ceccarelli s.j.

titujt kryesore

webmaster