Benedikti XVI: ne Fatima

Më datën 11 deri më 14 Maj, Papa Benedikti XVI ka bërë një vizitë në Fatima dhe në kapelën e shfaqjes afër shenjtërores, si zëvendes i Pjetrit i është drejtuar Zojës me lutjen që vijon:

O Nënë e Papërlyer, në këtë vend hiri, të mbledhur prej dashurisë së Birit tënd Jezus, Kryemeshtarit të Amshuar, ne, bij të Birit dhe meshtarë të tij, i kushtohemi Zemrës tënde amënore, për ta përmbushur me besnikëri Vullnetin e Atit.

Jemi të vetëdijshëm se, pa Jezusin, nuk mund të bëjmë asgjë të mirë (krh. Gjn 15,5) dhe se, vetëm nëpër Të, me Të dhe në Të, do të jemi për botën mjete të shëlbimit.

Nuse e Shpirtit Shenjt, na nxjerr dhuratën e paçmueshme të shndërrimit në Krishtin. Për të njëjtën fuqi të Shpirtit që, duke shtrirë mbi Ty hijen e vet, të bëri Nënë të Shëlbuesit, na ndihmo që Krishti, Biri yt,të lindë edhe në ne. Kështu që Kisha të mund të përtërihet prej meshtarëve të shenjtë, të shndërruar prej hirit të Atij që i bën të reja të gjitha gjërat.

Nënë e Mëshirshme, Biri yt Jezus na ka thirrur për t'u bërë si Ai: dritë e botës dhe kripë e tokës (krh. Mt 5,13-14).

Na ndihmo, me ndërmjetësimin tënd të fuqishëm, që të mos e tradhtojmë kurrë këtë thirrje sublime, që të mos u lëshojmë udhë egoizmave tona, joshjeve të botës dhe tundimeve të të Keqit.

Na mbro me dëlirësinë tënde, na ruaj me përvujtërinë tënde dhe na mbështill me dashurinë tënde amënore, që pasqyrohet në shumë shpirtra që ty të janë kushtuar e që janë bërë për ne etër të vërtetë shpirtërorë.

Nënë e Kishës, ne, meshtarët, duam të jemi barinj që nuk kullosin vetveten, por i dhurohen Hyjit për vëllezërit, duke gjetur në këtë gjë lumturinë e tyre. Jo vetëm me fjalë, por me jetë, duam të përsërisim përvujtërisht, ditë pas dite, fjalën tonë “ja ku jam”.

Të udhëhequr prej teje, duam të jemi Apostuj të Mëshirës Hyjnore, të lumtur që të kremtojmë çdo ditë Flinë e Shenjtë të Altarit dhe t'ua japim atyre që na e kërkojnë sakramentin e Pajtimit.

Pajtore dhe Ndërmjetësuese e hirit, ti që je krejt e zhytur në ndërmjetësimin e vetëm të gjithëmbarshëm të Krishtit, kërko prej Hyjit, për ne, një zemër krejtësisht të përtërirë, që ta dojë Hyjin me të gjitha forcat e veta dhe t'i shërbejë njerëzimit sikurse ti ke bërë.

Përsëritja Zotit fjalën tënde efikase: “nuk kanë më verë” (Gjn 2,3), që Ati dhe Biri të derdhin mbi ne,si në një derdhje të re, Shpirtin Shenjt.

Plot me mahnitje e mirënjohje për praninë tënde të vazhdueshme mes nesh, në emër të të gjithë meshtarëve, edhe unë dua të thërras: “Nga e pata fatin të vijë tek unë Nëna e Zotit tim?” (Lk 1,43).

Nëna jonë e përhershme, ti nuk lodhesh duke na “vizituar”, duke na ngushëlluar, duke na mbështetur.

Na eja në ndihmë dhe na liro prej çdo rreziku që na afrohet. Me këtë akt besimi dhe kushtimi, duam të të mirëpresim në mënyrën më të thellë e rrënjësore, për gjithmonë dhe tërësisht, në ekzistencën tonë njerëzore dhe meshtarake.

Prania jonë le ta rilulëzojë shkretëtirën e vetmive tona dhe le ta bëjë të ndriçojë dielli mbi errësirat tona, le të bëjë të kthehet qetësia pas stuhisë, që çdo njeri ta shohë shëlbimin e Zotit, që ka emrin dhe fytyrën e Jezusit, të reflektuar në zemrat tona, përgjithmonë të bashkuara me zemrën tënde!

Amen!

Nga Osservatore Romano

titujt kryesore

webmaster