E kremtja “Zoja e Keshillit te Mire”

Çdo vit më 26 prill e gjithë Shqipëria kremton të kremten e Pajtores së popullit shqiptar që është Zoja e Këshillit të Mirë.

Edhe këtë vit, kjo festë u kremtua me shumë përshpirtëri e solemnitet.

Që kremtimi i saj të ishte sa më dinjitoz nën kujdesin e rektorit të Shenjtërores së Zojës, dom Gjovalin Sukaj, ditën e shtunë, dt. 24 prill, në ora 17:00 u zhvillua procesioni me fuguren e Zojës nga Katedralja e Shkodrës deri tek Shenjtërorja. Procesionin e udhëhoqi dom Gjovalin Sukaj dhe në të morën pjesë shumë meshtarë, rregulltar e rregulltare dhe një numër i madh besimtarësh. Po në mbrëmjen e datës 24 prill, në vigjiljen e Ditës Botërore të Lutjes për Thirrje në Shenjtëroren e Zojës u zhvillua një Vigjilje adhurimi ku u lut për thirrje meshtarake dhe rregulltare. Vigjiljen e udhëhoqi Sh. T. Imzot Angelo Massafra dhe kisha e mbushur plot me besimtarë ishte dëshmia më e mirë se sa populli ynë është i ndjeshëm ndaj dashurisë për thirrje.

Të dielën dt. 25 prill, në orën 20:30 në Shenjtëroren e Zojës u lut rruzarja dhe litanitë e Zojës duke u përgatitur për kremtimin e së kremtes së Pajtores.

Më 26 prill, në të kremten e Zojës së Këshillit të Mirë, ashtu siç është doke, Shenjtërorja ishte e mbushur në çdo cep brenda dhe jashtë. Mesha u kremtua në ora 10:00 nga Sh. T. Imzot Angelo Massafra dhe ishin të pranishëm, Nunci Apostolik, Imzot Rrok Mirdita, Imzot Lucjan Avgustini, Imzot Georg Frendo, at Gazmend Tinaj, si dhe bashkëkremtuan një numër i madh meshtarësh nga të gjitha dioqezat.

Përshpirtëria për Marinë, Nënën e Këshillit të Mirë është shenj e gjallë së Maria nuk është larguar kurrë nga ky vend.

Dom Gjovalin Sukaj    

titujt kryesore

webmaster