Konferenca Ipeshkvnore e Shqiperise

Komunikatë për shtyp, Tiranë 11.05.2010

Në ditët 4 dhe 5 maj 2010 u mbajt në Tiranë Asambleja e Përgjithshme e Konferencës Ipeshkvnore të Shqipërisë.

Konferenca diskutoi mbi disa çështje me rëndësi të Kishës Universale dhe asaj vendore. Nje vend të veçantë zuri diskutimi mbi çështjen e abuzimeve seksuale me të mitur nga anëtarë të klerit që ka përfshirë Kishën Universale, por dhe për sulmet e padrejtja që kanë përfshirë Atin e Shenjtë Benedikti XVI. U paraqit letra që papa i ka dërguar Kishës që është në Irlandë në lidhje me abuzimet që kanë ndodhur në atë vend.

Ipëshkvinjtë theksuan se me siguri nuk ka kurrfarë arsyetimi për këto sjellje të turpshme e të dënueshme të atyre personave që kanë abuzuar seksualisht, veçanërisht me të mitur. Konferenca Ipeshkvnore e Shqipërisë, sikurse edhe shumë Konferenca të tjera, i dënon abuzimet seksuale që kanë ndodhur në rradhët e klerit.

Ipeshkvinjtë e Shqipërisë, lidhur me problemin në fjalë, angazhohen plotësisht në zbatimin e direktivave nga Vatikani, që tashmë janë bërë publike, në rast shfaqjesh të këtyre fenomeneve.

Gjithashtu është vendosur që ipeshkvinjtë në mbarim të vitit meshtarak t'u drejtojnë një letër meshtarëve në Shqipëri.

KISH më datë 5 maj 2010, duke përjetuar me shqetësim klimën politike që është krijuar në Shqipëri këto ditët e  fundit, iu drejtua me një apel institucioneve dhe politikës në Shqipëri për një zgjidhje sa më të shpejtë të situatës.

Në letër u theksua se, sikurse thotë Papa Benedikti XVI në Enciklikën Deus Caritas est, “(Kisha) nuk dëshiron t'u imponojë atyre që nuk ndajnë besimin e saj, perspektiva dhe mënyra sjelljeje, që i përkasin Kishës. Ajo thjesht dëshiron të japë ndihmesën e vet për pastrimin e arsyes dhe të bëjë të mundur që çka është e drejtë të mund, këtu dhe tani, të pranohet e pastaj edhe të realizohet.”

Në këtë apel Ipeshkëvinjtë u angazhuan që të luten dhe të nxisin besimtarët në mënyrë që të arrihet në një zgjidhje sa më të shpejtë.

Më tutje Konferenca ka diskutuar për disa pika me rëndësi për zhvillimin dhe përparimin sa më të mirë baritor. Pikat për të cilat është diskutuar në vazhdim ishin: Universiteti Katolik në Tiranë; çështja e kthimit dhe kompensimit të pronave të Kishës; ribotimi i Biblës në shqip; Dita Kombëtare e Rinisë që do t'i mbledhë të rinjtë e Shqipërisë në Lushnje me datë 29 maj 2010; përfundimi i Vitit Meshtarak, që në Shqipëri do të mbahet me datën 1 qershor në Lezhë; Viti Jubilar i 100-vjetorit të lindjes së Nënë Terezës; Seminari ndërdioqezan.

Asambleja e ardhshme plenare do të jetë në nëntor 2010. 

 Zyra e Shtypit e KISH

titujt kryesore

webmaster