Ndertimi i Kryqit ne Sheldi

Pjesë e fjalimit të Dom Dritan Ndocit, ditën e bekimit të kryqit: “E falënderojmë Zotin që e bëri të mundur ndërtimin e këtij Kryqi. Ndërtimi i tij ishte një ide që lindi në një mënyrë shumë të thjeshtë. Një grup besimtarësh nga famullia jonë, kur u kthyen nga një pelegrinazh që kishin bërë në Medjugorje, patën dëshirën që edhe në famullinë tonë të ndërtonin një kryq të ngjashëm me kryqin e madh që gjendet atje. Ideja në fillim u duk si e parealizueshme nga shumëkush, por pastaj filloi t'u dukej jo vetëm e mundshme, por edhe shumë e bukur. U desh që të caktohej vendi. U mendua kodra Majë-Shtog. Falënderojmë Tonin Deden – kryeplakun e fshatin – dhe Pjetër Gjonin që ia kanë dhuruar Kishës terrenin e nevojshëm për këtë ndërtim. Ideja u pëlqye dhe u mbështet edhe nga famullitari Dom Huani, dhe meshtarët e tjerë që ndërkohë shërbinin këtu, Dom Rafaeli dhe Dom Françesku. Kështu, pasi morën edhe pëlqimin e Monsinjor Angelo Massafrës, u fillua ndërtimi i tij.

Të bën vërtet përshtypje të madhe mbështetja ekonomike që të gjithë besimtarët e Sheldisë – por edhe më gjerë – kanë bërë për ndërtimin e këtij kryqi rreth 10 metra të lartë.

Sot u përfunduan punimet për ndërtimin e Kryqit, por në fakt mungon akoma diçka tjetër: kanë mbetur veçse në fillim punimet për ndërtimin e “Udhës së Kryqit” që të çon nga qela deri tek kryqi dhe që e kemi quajtur “Në gjurmët e martirëve”. Kjo sepse një pjesë e këtij segmenti është përshkuar nga Dom Lazer Shantoja, Dom Ndre Zadeja dhe Dom Dedë Maçaj, që në Sheldi kanë qenë famullitarë e që sot presim të shpallen martirë të fesë. Do të dalë një vepër e vetme, e plotë dhe, jam i bindur shumë e bukur dhe e dobishme si për famullinë tonë, ashtu edhe për shumë besimtarë të famullive të tjera.

Për ta përmbyllur gjithë këtë, dëshiroj të theksoj dy detaje që ngjajnë si koincidencë, por që besoj se është e mundur të shihen edhe si vepër e Provanisë së Zotit. Në një libër të tijin të titulluar “Sheldija” zoti Prek Ejlli shkruan: “Për ndërtimin e Kishës në Sheldi, gojëdhana thotë se një pjesë e banorëve (rreth vitit 1720) kërkonin me e ndërtue kishën në Majë-Shtog. Kurse një pjesë tjetër e donin kishën pranë rrugës në hyrje të fshatit... Mbas pleqnimit u vendos që kisha të ndërtohej pranë rrugës ku gjindet edhe sot”. Pra, vendi ku sot është ndërtuar kryqi, ishte menduar si i përshtatshëm për vend kulti. Tani u realizua. Ky ishte detaji i parë.

Detaji i dytë ka lidhje me shumë vite më vonë. Dikush prej besimtarëve po më tregonte një ditë se Hallës Kushë, murgeshës së dashur prej të gjithë besimtarëve të këtyre zona, një herë i kishte thënë Dom Ndre Zadeja se kishte dëshirë të ndërtonte një “Udhë Kryqi” që shkonte nga qela deri tek Kisha. E i kishte thënë se, nëse ai nuk do të arrinte ta realizonte, një gja të tillë t'ia thoshte meshtarëve që do të vinin pas tij. Erdhi komunizmi e dëshira të tilla u banë të parealizueshme. Sot doli në dritë ëndrra e Dom Ndre Zadejës. Kjo ëndërr nuk është realizuar krjet ashtu siç e kishte Dom Ndreja. Ne nuk e kemi çuar deri tek Kisha, por tek Kryqi në kodrën Majë-Shtog. Por ndoshta Zoti e kishte menduar që të pritej edhe pak deri sa kjo “Udhë Kryqi” të njomej edhe nga gjaku i tij dhe i meshtarëve të tjerë, e atëherë do të merrte formën e saj të plotë. Mendoj se këto dy detaje mund t'i shohim si vepër e provanisë së Zotit dhe  falënderojmë që na bëri pjesëtarë të këtij plani.

Prandaj, sa herë që ta shohim këtë kryq dhe të përshkojmë këtë Udhë Kryqi, le të nxitemi edhe më fort në kryerjen e vullnesës së Zotit”.

Dom Dritan Ndoci

titujt kryesore

webmaster