Udhetimi per ne Kroaci rrefime rreth sherbetoreve te Hyjit

Në pragun e mbylljes së procesit rreth Shërbëtorëve të Hyjit, Kryeipeshkvi i Shkodër - Pult, Imzot Angelo Massafra i shoqëruar nga Fra. Vincenzo Focà dhe Dom Nikë Ukgjini, nga data 27-30, prill të këtij viti, qëndruan në Kroaci, për të kërkuar dhe ca dëshmi shtesë. Ndalimi i parë i tyre, gjatë udhëtimit për në Zagreb, ishte qyteza e vogël Vodice në afërsi të Shibenikut, ku takuan dëshmitarin e parë, meshtarin e vyer të Administraturës Apostolike të Prizrenit  Dom Ivica Çolak.  Ai foli rreth famës që gëzon tek populli i Zymbit, Gjakovës, dhe Novoselës, Atë Luigj Paliq. Njëherësh shprehu bindjen se shërbëtori i Hyjit Atë Paliqi është martir i gjallë i Kishës Katolike. Me pas, Komisioni në fjalë, vazhdoi rrugën me makinë për në Zagreb, duke arritur atje në orët e vona të mbrëmjes, për t'u sistemuar në Misioni Katolik Shqiptar të mirëpritur nga misionari Dom Agim Qerkini.  Të nesërmen (dt. 28) Imzot Massafra dhe Fra. Vincenzo të shoqëruar nga misionari ynë atje, takuan kushërinjtë e Atë Paliqit z. Tomo Paliqi dhe z. Drago Paliqi nga të cilët morën dëshmi të vyera për shërbëtorin e Hyjit.

Qëndrimin e tyre në Zagreb, Imzot Massafra dhe përcjellësit tij e shfrytëzuan për të bërë dhe ca vizita rasti, si: takimi në Konferencën Ipeshkvnore të Kroacisë, vizita Provincialatit të fretërve Minorë në Zagreb etj.

Pas përfundimit të detyrimeve të caktuara, përgjatë rrugës në kthim për në Shqipëri, grupi  në fjalë bëri vizita rastit në Seminarin e Lartë të fretërve Minorë në Split dhe njëherësh vizitoi pallatin e Perandorit Dioklecian të shek. IV. Më pas, duke vazhduar rrugën përgjatë autostradës, ndalesa e tyre e radhës qe Dubrovniku. Aty vizituan qytetin magjik të Raguzës (Dubrovnikun),  duke parë nga afër objektet me vlera të rralla si: Katedralen e të “Ngjiturit të Zojës së Bekuar në Qiell”, kishën e “Shën Vlashit”, kishën françeskane të të “Ngjiturit të Krishtit në Qiell”,  pallatet e qytetit etj. Vizita e cila la mbresa të veçanta në këtë qytet, ishte ajo në Kuvendin e fretërve Minorë të “Shën Françeskut” dhe bibliotekës së tyre, e cila është më e njohura në Kroaci, themeluar në vitin 1310. Sa për të kujtuar, kjo bibliotekë sot përmban më tepër se rreth 70. 000 ekzemplarë libra, 20.000 dokumente dhe shumë pergamenë të shek. X dhe XI etj.

Duke pasur parasysh se veprimtaria e Imzot Pjetër Bogdanit lidhet ngushtë më këtë qytet dhe bibliotekën në fjalë, dom Nika shfrytëzoi rastin për të bërë filmime të caktuara në kuadër të realizimit të filmit të tij dokumentar për Imzot Bogdanin. Gjatë qëndrimit të tyre në Dubrovnik, mysafirët qenë të mirëpritur nga ndihmës mbikëqyrësi i këtij Kuvendi, Atë Prel Gjurashaj. Në orët e mbrëmjes të datës 30, Imzot Massafra së bashku me shoqëruesit u kthyen për në Shkodër.                       

Dom Nikë Ukgjini

titujt kryesore

webmaster