KUSHTOHET KISHA E SHËN ELISË NË BERDICË

Më 19 Korrik 2008 u bë Shugurimi i kishës së Shën Elisë profet në Berdicë. Nuk e di se si mund të përshkruhet gëzimi i mijëra besimtarëve të këtij fshati të cilët morën pjesë në shugurimin e kishës së tyre të re.

Në orën 10 filloi kremtimi i Meshës së Shenjtë udhëhequr nga Shkëlqesia e Tij Imzot Angelo Massafra, Arqipeshkëv i dioqezës Shkodër - Pult, në praninë e Shkëlqesisë së Tij Imzot Stanislav Hočevar, Arqipeshkëv i Beogradit, Imzot Zef Gashi Arqipeshkëv i Tivarit dhe don Paskuale Martino, Provincial Salezian.

Nderuan me pjesëmarrjen e tyre edhe Autoritetet civile si, Zonja Jozefina Topalli, kryetare e Kuvendit Popullor dhe Deputete e zonës, z. Qamil Zhurreta, kryetar i komunës së Berdicës, z. Antonio Gisolfi, kryetar i komunës së “Rignano Garganico”, provincë në Itali si dhe prania e shumë besimtarëve që e mbushën plot e përplot këtë kishë të mrekullueshme.

Në predikimin e tij Imzot Massafra foli më tepër për rëndësinë e Kishës shpirtërore sesa atë materiale. Pas predikimit u vazhdua me ritet e kushtimit të Kishës e sigurisht që momentet më prekëse ishin ato të këndimit të litanive të shenjtërve, të lutjes së kushtimit, të lyerjes me vaj të altarit si dhe të dymbëdhjetë kryqeve, të vendosura në shtyllat e kishës.

Në përfundim të Meshës, Famullitari i kësaj famullie, Dom Michele Gentile, përshëndeti të pranishmit si dhe i falënderoi përzemërsisht të gjithë ata persona të cilët kontribuan fizikisht dhe materialisht për ndërtimin e kësaj kishe. Pas Meshës u shtrua një koktej për të gjithë besimtarët si dhe dreka për të ftuarit.

Gjergj Dushkja

titujt kryesore

webmaster