RADIO MARIA SHQIPTARE FESTON 5-VJETORIN

Data 19 korrik e këtij viti shënon 5 vjetorin e hapjes së Radio Marisë në Shqipëri.

Radio Maria e parë në botë u hap në Itali në vitin 1983, vit nga ku lindi dhe u zhvillua një mjet shumë efikas për përhapjen e Fjalës së Hyjit. Pastaj, në vitin 1998 u formua familja botërore e Radio Marisë - shtrirë në më shumë se 50 shtete të ndryshme - pjesë e së cilës është që prej pesë vitesh edhe Radio Maria shqiptare, duke filluar që me datën 19 korrik 2003. Fillimisht ajo filloi transmetimet e veta vetëm nga qyteti i Shkodrës, por prej dy vitesh edhe nga Tirana.

Për të festuar 5 vjetorin e hapjes së kësaj radioje, në katedralen e Shkodrës u kremtua Mesha e Shenjtë, ku, si rrallë herë morën pjesë shumë besimtarë, pjesa dërmuese e të cilëve vinin nga fshatrat. Kremtimin e kryesoi Imzot Hilë Kabashi, Ipeshkëv i Administraturës së Jugut, në bashkëkremtim me pesë meshtarë të tjerë.

Në homelinë e tij prelati foli gjerësisht për rëndësinë e dëgjimit të fjalës së Hyjit dhe këtu del në pah edhe rëndësia e kësaj radioje, e cila secilën ditë e fillon dhe e mbyll me fjalën e Tij.

Vetë pjesëmarrja e një numri kaq të madh besimtarësh flet për vlerësimin që ata i bëjnë programeve të kësaj radioje, valët e së cilës shtrihen pothuajse në të gjithë Shqipërinë dhe, nëpërmjet internetit, në të gjithë botën.

Para përfundimit të Meshës përshëndeti edhe z. Tomë Preku, koordinator i Radio Marisë në Shqipëri, si edhe Dom Prekë Lazraj, drejtori i programacionit.

Më pas për të pranishmit u shtrua edhe një koktej.

Lec Zadeja

titujt kryesore

webmaster