SHUGURIM MESHTARAK I ATË ZEF BISHËS S.I.

“Sot është dita që na e dhuroi Zoti! Bashkë me këto fjalë të psalmistit që lutet në gëzimin e tij, është lutur edhe bashkësia famullitare e Shën Nikollit në Vau-Dejës, në festën e shugurimit meshtarak të birit të saj At Zef Bisha, jezuiti i parë shqiptar pas diktaturës. Duke e falënderuar Zotin për këtë dhuratë që i bëhet popullit tonë, bashkësisë së Jezuitëve, dhe mbarë Kishës në Shqipëri, qindra besimtarë mbushën katedralen “E Lumja Nënë Tereza” në Vau-Dejës, më 5 korrik, për të marrë pjesë në kremtimin solemn të udhëhequr nga Ipeshkvi i Sapës, Imzot Lucjan Avgustini. Nderuan me pjesëmarrjen e tyre, Ipeshkvi ndihmës i Shkodrës, Imzot Zef Simoni, përfaqësuesi i Selisë së Shenjtë, momentalisht si i plotfuqishëm pranë Nunciaturës Apotolike në Shqipëri, Imzot Giovanni Gaspari, Provinciali i Shoqërisë së Jezuitëve nga Italia, Atë Françesko Tata, përgjegjësi i Jezuitëve në Shqipëri, Atë Lello Lanzilli, rreth 70 meshtarë nga e gjithë Shqipëria, motra të kongregatave të ndryshme që veprojnë në Shqipëri, përfaqësuesit e pushtetit vendor, si dhe familjarët, miqtë e dashamirësit e Atë Zefit.

Pas leximeve të ditës, Imzot Lucjan Avgustini, shuguruesi i ceremonisë, mbajti homelinë e rastit, ku mes të tjerash vuri theksin mbi figurën e meshtarit.

Pas predikimit, Provinciali, njëkohësisht dhe përgjegjësi i formimit, i pyetur nga Ipeshkvi, dëshmoi përpara të gjithëve për aftësinë e meshtarisë së Atë Zefit e denjësinë e tij për të marrë Urdhrin e Shenjtë.

Kandidati i zgjedhur për urdhrin e presbiteratit, shprehu përpara Ipeshkvit dhe të gjithë të pranishmëve, me vullnet të vendosur për të ushtruar gjatë gjithë jetës së tij shërbimin meshtarak sipas qëllimit të Krishtit e të Kishës.

Pas homelisë u vazhdua me ritet e tjera të shugurimit.

Në zemër të këtij riti, të zgjedhurit iu dha dhurata e Shpirtit Shenjt për shërbimin e meshtarisë (presbiterit). Ipeshkvi, e pas tij të gjithë meshtarët bashkëkremtues, në lutje të heshtur, vendosën duart mbi kryet e të zgjedhurit si shenjë e pranimit në presbiter.

Menjëherë pas këtij momenti, Ipeshkvi shpalli mbi të zgjedhurin të gjunjëzuar përpara tij, lutjen solemne të shugurimit.

Në liturgjinë eukaristike që vazhdoi si zakonisht, i shuguruari ushtroi për herë të parë shërbimin e tij duke bashkëkremtuar me Ipeshkvin e me gjymtyrë të tjera të presbiterit.

Në këtë rit të paharrueshëm, përveç emocioneve të shumta që u ngjallën gjatë shugurimit, në mënyrë të veçantë spikati edhe kori i Katedrales, që me shoqërimin e këngëve të meshës e bëri këtë shugurim edhe më të gëzueshëm.

Por festa e hareja në dioqezën tonë s'mbaroi këtu.

Me fjalët e shkruara në hyrje të kishës Katedrale “E Lumja Nënë Tereza”, “Ti je prift për amshim”, më 13 korrik 2008, në 11. 00, është pritur Atë Zef Bisha në famullinë e Shën Nikollit në Vau-Dejës, famulli në të cilën u lind, u rrit dhe u shugurua. Mes gëzimit dhe emocioneve Atë Zefi ka kremtuar meshën e Parë, në bashkëkremtim me vëllezërit Jezuitë, famullitarin e Katedrales Dom Simon Kullin, dhe në praninë e Ipeshkvit të vendit, Imzot Lucjan Avgustini.

Së bashku me meshtarin e ri, besimtarët kanë lëvduar e falënderuar Zotin për hirin dhe dhuratën që i ka bërë birit të këtij vendi. Pas shumë vitesh kjo famulli i dhuron Krishtit birin e tij për ta ndjekur atë.

Është meshtari i parë që ka hapur derën e thirrjeve, e dhashtë Zoti të jenë punëtorë sa më të shumtë në të korrat e tij.

Atë Zefit, jezuitit të parë shqiptarë pas rënies së diktaturës komuniste, i bëjmë shumë e shumë urime për një meshtari të shenjtë e të mbarë.

Violeta Marashi

titujt kryesore

webmaster