MBYLLJA E VITIT TË SHËN PALIT

Me datën 27 qershor 2009 u kremtua në Tiranë Mesha që mbyll për ne këtë kohë jubilare që Papa Benedikti XVI e pati hapur për mbarë Kishën qysh në 28 qershorin e vitit të kaluar, duke ia kushtuar këtë vit apostullit të madh të popujve, Shën Palit.

Mesha solemne u kremtua në Katedralen e Tiranës e cila është edhe Kishë ku këtë vit mund të merrej ndjesa e plotë, duke qenë se është e ushtuar pikërisht Shën Palit.

Kremtimi u kryesuar nga Arqipeshkëvi i Arkidioqezës Tiranë-Durrës, Sh. T. Imzot Rrok Mirdita, dhe pati bashkëkremtimin Nuncit Apostolik Sh. T. Imzot Ramiro Moliner Inglés, si edhe të gjithë ipeshkvijve të tjerë të Shqipërisë, të shumë meshtarëve,  rregulltarëve, si edhe të shumë besimtarëve të ardhur nga e gjithë Shqipëria.

Katedralja ishte e mbushur plot dhe ishte bukur të shihje aty besimtarë që kishin ardhur pasi  kishin bërë rrugë të gjatë – veçanërisht të shumtë ishin besimtarët e ardhur nga dioqeza e Shkodrës – për të marrë pjesë në falënderimin e përbashkët që po i bëhej Hyjit që na ka dhuruar Shën Palin dhe tani edhe këtë vit hiri në nder të tij.

Edhe Imzot Mirdita theksoi pikërisht këto ndjenja falënderimi ndaj Hyjit, i cili na ka dhuruar një apostull kaq të zellshëm për Ungjillin e Krishtit. Duke na nxitur që ta imitojmë këtë zell të shenjtë, Arqipeshkvi na ftoi të mos kemi frikë ta shpallim edhe ne me zell Ungjillin e Jezu Krishtit, Birit të Hyjit të bërë njeri, dhe të mos druhemi përballë vuajtje dhe persekutimeve. Ato janë të pashmangshme për nxënësit e Krishtit, dhe mund të jenë mjeti më i privilegjuar për përhapjen e Ungjillit.

Gjatë paraqitjes së dhuratave ishte organizuar diçka shumë e bukur: secila dioqezë duhej të paraqiste një dhuratë simbolike para altarit të Hyjit. Shkodra solli lule të freskëta dhe shumë ngjyrëshe.

Pas përfundimit të Meshës së Shenjtë Imzot Mirdita bekoi edhe një trupore të Shën Palit, e cila në mënyrë solemne u vendos në një kënd të katedrales.

Ky kremtim ishte edhe një dëshmi e bukur e të qenit Kishë Katolike, domethënë e përgjithshme, duke qenë se mblidhte besimtarë të ardhur nga zona të ndryshme të Shqipërisë, të cilët ishin aty së bashku me barinjtë që Hyji i ka vënë në përkujdesjen e tyre, e që nëpërmjet të cilëve ai na bashkon në një trup të vetëm me mbarë pjesën tjetër të Kishës Katolike në të gjithë botën, me në krye Papën tonë të dashur Benediktin XVI.

Dom Dritan Ndoci

 titujt kryesore

webmaster