Shkëlqesi shumë e Ndritshme,

    Në Audiencën e dhënë 16 marsin e kaluar Anëtarëve të kësaj Kongregate, të mbledhur në Asamble Plenare, Ati i Shenjtë Benedikti XVI “për të ndihmuar tërheqjen e meshtarëve drejt përsosmërisë shpirtërore prej së cilës varet në veçanti efikasiteti i shërbesës së tyre” ka pasur mirësinë të shpallë një “Vit Meshtarak” të veçantë, që do të shkojë nga 19 qershori i ardhshëm, solemniteti i Zemrës së Krishtit, deri në të njëjtën datë të vitit 2010. Në të vërtetë, qëllon 150-vjetori i vdekjes së Shenjtit Famullitar të Arsit, Gjon Maria Vianney, shembulli i vërtetë i Meshtarit në shërbim të grigjës së Krishtit (krh. Fjalimi i Atit të Shenjtë).

Viti Meshtarak përfaqëson kështu një rast të rëndësishëm për ta vështruar përsëri dhe gjithnjë me një mahnitje mirënjohëse veprën e Zotit i cili, “atë natë që po tradhtohej” (1 Kor 11,23), ka dashur të themelojë Meshtarinë shërbestare, duke e lidhur atë në mënyrë të pandarë me Eukaristinë, kulmin dhe burimin e jetës për gjithë Kishën. Kështu, do të jetë një Vit në të cilin do të rizbulohet bukuria dhe rëndësia e Meshtarisë dhe e secilit të shuguruar, duke e sensibilizuar për këtë gjithë popullin e shenjtë të Hyjit: të kushtuarit dhe të kushtuarat, familjet e krishtera, ata që vuajnë dhe, sidomos, të rinjtë të cilët janë aq të ndjeshëm ndaj idealeve të mëdha, të jetuara me një hov të përnjëmendtë dhe me një besnikëri të vazhdueshme.

Në këtë drejtim shkon edhe titulli i zgjedhur mirë prej Atit të Shenjtë për këtë Vit: “Besnikëria e Krishtit, besnikëria e Meshtarit”, për të treguar parësinë absolute të hirit, “Ne duam sepse Ai na deshi më parë” (1 Gjn 4,19) dhe, në të njëjtën kohë, edhe bashkimin e domosdoshëm e të përzemërt të lirisë që do, duke mos harruar se emri i dashurisë në kohë është “besnikëri!”.

Sikurse Shkëlqesia juaj do të mund të vërejë, bëhet fjalë për një rast të rëndësishëm thellimi teologjiko-shpirtëror dhe misioni baritor, të frytshëm para së gjithash për vetë Meshtarët, të thirrur për të përtërirë vetëdijen e identitetit të tyre dhe, si rrjedhojë, për të përforcuar tërheqjen misionare që buron prej brendësisë hyjnore, prej “të qëndruarit” me Zotin. Frytshmëri baritore që përhapet në çdo mjedis e person të Kishës, me një vëmendje të veçantë ndaj nxitjes së domosdoshme e parësore të thirrjeve në shërbesën meshtarake.

Viti Meshtarak do të përurohet për Solemnitetin e ardhshëm të Zemrës së Krishtit në Bazilikën Papnore të Shën Pjetrit në Vatikan, me kremtimin e Mbrëmësores të udhëhequr prej Atit të Shenjtë. Për këtë rast do të sillet prej Arsit relikja e zemrës së Sh. Gjon Maria Vianney-t, zemër që ka rrahur në harmoni me Zemrën hyjnore të Bariut të Mirë. Do të ishte domethënëse që të programohej një kremtim analog në çdo Katedrale apo Shenjtërore apo kishë domethënëse për krahinat e veçanta kishtare, me Meshtarët dhe besimtarët që do të duan të bashkohen në lutje.

Gjatë Vitit, herë pas here, nëpërmjet mjeteve të zakonshme të komunikimit dhe, sidomos, nëpërmjet Sitit Internet të kësaj Kongregate (www.clerus.org) do të komunikohen ngjarjet dhe do të jepen mbështetjet e nevojshme për tubime, tërheqje shpitërore, momente lutjeje, kuvende dhe çdo nismë tjetër që krijimtaria e drejtë baritore do të dojë të programojë.

Bëhet fjalë për një ngjarje jo spektakolare, por që do të donim të jetohej sidomos si përtëritje e brendshme në rizbulimin e gëzueshëm të identitetit tonë, të vëllazërisë së presbiteriumit tonë, të marrëdhënies sakramentale me Ipeshkvin tonë. Kështu, nismat duhen marrë sidomos në secilën krahinë kishtare dhe në Institutet e përkatësisë.

Në këtë kuptim do të jetë e përshtatshme që Vitit Meshtarak t'i jepet dukshmëria e duhur nëpërmjet mas mediave, sidomos katolike, duke u kujdesur që t'i jepet gjithmonë një interpretim i saktë dhe jo i pjesshëm.

Përveç presbiterëve, secilit Meshtar dhe Famullive, do të jetë mirë të përfshihen edhe vendet e formimit meshtarak, Shoqatat dhe Lëvizjet, kaq të pasura me prani rinore, Shkollat katolike, të çdo rendi dhe shkalle, Manastiret, Institutet e Jetës së Kushtuar dhe të gjitha realitetet përnjëmend kishtare që, sipas gjendjes së tyre dhe karizmës së tyre, mund t'i japin një ndihmesë të vlefshme Vitit Meshtarak. Viti do të mbyllet me një Ditë Botërore për Meshtarët, që do ta ketë kulmin e vet në Romë për Solemnitetin e Zemrës së Krishtit të vitit 2010, me Atin e Shenjtë.

Në fjalimin e lartpërmendur, Ati i Shenjtë ka kujtuar se: “Shihet se është i ngutshëm edhe rifitimi i asaj vetëdijeje që i nxit meshtarët të jenë të pranishëm, të identifikueshëm e të njohur qoftë për gjykimin e fesë, qoftë për virtytet personale, qoftë edhe për veshjen, në mjediset e kulturës e të bamirësisë, që gjithmonë janë në qendrën e misionit të Kishës”. Në këtë kuptim dëshirohet që të bëhet kujdes për “praninë” e Meshtarëve në çdo fushë të misionit të Kishës, edhe duke u dalë përpara atyre që, megjithëse të pagëzuar, nuk janë ungjillëzuar ende mjaft.

Me sigurinë se Shkëlqesia juaj nuk do të lërë pa vënë në jetë, në një shpirt të përzemërt vëllazërie kolegjiale, çdo nismë të përshtatshme për të ndihmuar kremtimin më të motivuar e të frytshëm të Vitit Meshtarak, përfitoj prej rastit të përtërij ndjenjat e nderimit të thellë dhe të deklarohem Shkëlqesisë suaj shumë të Ndritur shumë i devotshëm në Zotin

Cláudio Card Hummes Prefekt

 titujt kryesore

webmaster