LETËR E HAPUR

DREJTUAR IMZOT ANGELO MASSAFRA

Me rastin e 23 marsit, në ditën e 60 vjetorit të lindjes së Shkëlqesisë suaj, më lejoni Imzot Angelo që në emër tim dhe të miqve dhe dashamirëve tuaj si: Ndrek Mëhilli, Dr. Tonin Frani, Pal Prendi, Rita Lacaj, Katrinë Nika, Lula Rodoja, Frano e Vitore Kulli, Prof. Tonin Çobani, Keti Gjeluci, Mark Malotaj, Flora Sokoli, Lulë Narkaj, Luigj e Gjok Smalaj, Gjokë Cari, Gjovalin Gjeloshi, Marçel Lacaj, Gjergj Shyti, Gjon e Bruna Marku, Pashko Pervathi, Zef Gjetja, Jak Ndoka, etj., t'ju dërgojmë juve urimet më të përzemërta për 60-vjetorin e lindjes Suaj, duke ju uruar njëherit edhe shëndet e jetë sa më të gjatë për të mirën e klerit katolik shqiptar, besimtarëve shkodranë dhe dashamirëve Tuaj kudo që janë.

Ne nuk ju harrojmë kurrë, sepse veprat që patën peshën e dorës Suaj - si rindërtimi i kuvendit të Lezhës, kisha e Shën Gjergjit (Lezhë), kisha e Shën Ndout në malin e Troshanit, rindërtimi i Ipeshkvisë së Lezhës - mbeten të pavdekshme.

Edhe në mars-prill të vitit 1997 në Lezhë, si në të gjithë Shqipërinë, mbretëronte anarkia, bandat e armatosura të dhëna pas plaçkitjeve më të shfrenuara. Ishte për t'u çmendur nga të shtënat e tmerrshme - për fat që ishin drejtuar lart dhe jo kundër njerëzve - të cilat dëgjoheshin natë e ditë. Edhe nëpër duart e fëmijëve ishin pushkët e granadat. Ishit të parët ju Shkëlqesi që me provincialin e fretërve Atë Flavio Cavallinin, me famullitarin e Kallmetit Dom Dodë Gjergjin, sot Ipeshkëv i Kosovës, me famullitarin e Blinishtit Dom Antonio Sharra dhe me Fra Françesk Leknikaj, që mbajtët Kryqin e madh, dolët në shesh duke i bërë thirrje besimtarëve të çdo besimi që të ulnin armët dhe të ishin një popull i bashkuar, i cili në Emër të Zotit lufton kundër armiqve. Po kush janë armiqtë? Ju i thatë turmës së armiqtë janë varfëria, dëshira për t'u pasuruar shpejt edhe pa djersën e ballit, padrejtësia, dhuna, korrupsioni dhe jeta pa Zotin.

Ju e përfunduat me këto fjalë: “Marr guximin t'ua bëj të gjithëve pa përjashtim thirrjen e pranishme në emër të të të gjithë ipeshkëvijve: Ta duam atdheun tonë, të jemi krenarë se jemi shqiptarë, të punojmë së bashku për zhvillimin shpirtëror, njerëzor dhe ekonomik të kombit, të largohemi nga e keqja.

S'mund të rri pa nënvizuar kremtimin e Meshës së Shenjtë që bëtë me datën 18. 03. 1997 tek sheshi para pallatit të kulturës me moton: “Jug e veri, Shqipëria është një” dhe paqja, përparimi dhe pajtimi u ktheftë tek ne. Sheshi është i mbushur plot e përplot me besimtarë edhe të besimeve të tjera. Kam parë se kur u çua Sakramenti, të gjithë ngritnin duart lart duke i kërkuar Jezu Krishtit shpëtim. Duke përfunduar, i lutem Shkëlqesisë Suaj të më lejoni, që në emër të të gjithë dashamirëve t'iu shpreh respektin dhe nderimin tim më të thellë. Zoti ju ruajtë!

Franc Rodoja

  titujt kryesore

webmaster