SHTEGTIMI DIOQEZAN NË KATEDRALEN E SHËN PALIT TIRANË

Me rastin e Vitit Jubilar të Apostullit të popujve Shën Palit, me datën 28 shkurt Dioqeza e Sapës organizoi shtegtimin dioqezan në Katedralen e Shën Palit në Tiranë. Thirrjes së Ipeshkëvit për të marrë pjesë në këtë shtegtim u janë përgjigjur pothuajse të gjitha famullitë e kësaj dioqeze. Duke qenë se kjo kishë Katedrale me dekret të Selisë së Shenjtë është shpallur kishë jubilare, qëllimi i këtij shtegtimi ishte që besimtarët të mund ta fitonin ndjesën e plotë nëpërmjet kryerjes së kushteve që kërkohen për fitimin e ndjesës ,siç ishte shtegtimi, rrëfimi, pjesëmarrja në meshë, kungimi dhe lutjet e parapara. Mbi 600 besimtarë mbushën Katedralen e Shën Palit në kryeqytetin shqiptar, ku morën pjesë në kremtimin eukaristik të udhëhequr nga Ipeshkvi i Sapës, Imzot Lucjan Avgustini  në bashkëkremtim me 10 meshtarë të tjerë të kësaj dioqeze.

Në fillim Ipeshkvi iu drejtua të gjithë të pranishmëve që të meditojmë dhe të mësojmë së bashku mbi Shën Palin, mbi figurën e jashtëzakonshme pothuajse  të paimitueshme, nxitëse dhe shembull i përkushtimit të plotë ndaj Zotit dhe kishës. Ndërsa gjatë homelisë ai u ndal më së shumti në porosinë që na jep Shën Pali, i cili që në momentin kur takohet me Krishtin shndërrohet nga përndjekës i Jezusit në nxënësin më besnik të tij. Kthimi është fryt i takimit personal me Krishtin tha ai. Krishti i ngjallur duket si dritë verbuese dhe i flet Saulit, ia shndërron mendimin dhe jetën e tij.

Mbi figurën e Shën Palit është ndalur më gjatë edhe Dom Mark Shtjefni gjatë ligjëratës së mbajtur me rastin e këtij shtegtimi.Gjithashtu, një moment falenderimi ka shprehur edhe i zoti i shtëpisë, Arqipeshkëvi i Tiranë-Durrës, Imzot Rrok Mirdita, i cili falenderoi të gjithë besimtarët shtegtarë, të cilët dëshmuan më së miri fenë dhe besimin në Krishtin, qendrën e jetës sonë.

Violeta Marashi

 titujt kryesore

webmaster