VIZITA BARITORE NË SHKODËR NË SHKOLLA

Java (24 shkurt – 1 mars) do të vazhdonte me vizita dhe takime me nxënës e studentë të shkollave “Maria Ndihmëtare”, “Jordan Misja”, “Ndoc Mazi”, ku Arqipeshkvi i shoqëruar edhe nga famullitari dhe zv.famullitari u mirëprit dhe uroi nxënës e mësues. Një falenderim të veçantë këtu për të gjitha drejtoritë që na pranuan si dhe Këshillit Baritor të Famullisë së Shën Shtjefnit për organizimin.

Si Ad. Famullitar i këtij Qyteti nuk  mund të mos përmend me ngazëllim takimin e Arqipeshkvit me studentë dhe profesorë në Universitetin “Luigj Gurakuqi” për të cilin falenderoj Dekanin e Fakultetit të Juridikut, Prof. Gaspër Kokaj. Në këtë takim që u zhvillua në Sallën “Pjetër Meshkallë” të Universitetit, Imzot Massafra zhvilloi temën: “Toleranca në komunitet”, e cila ngjalli mjaft interes për auditorin, gjë që u duk qartë në diskutimet e lira që më pas u zhvilluan.

Java në vazhdim do të ishte mjaft interesante për të gjithë, pasi Këshilli Baritor i Famullisë së Shën Shtjefnit kishte vendosur ta shoqëronte Arqipeshkvin në një tur turistik nëpër Qytet: tek Muzeu i Qyteti (tek shtëpia e Vaso Pashës); tek Muzeu i Kalasë ku nuk mund të mungonte një vizitë edhe tek Katedralja e hershme e Qytetit ajo e Shën Shtjefnit që ndodhet brenda në rrethimet e mureve dhe të historisë së shkruar tashmë të Shkodrës; tek shtëpia ku jetoi e Lumja Nënë Tereza në Shkodër; tek Fototeka “Marubi”; në Galerinë e Arteve të Qytetit si dhe për ta mbyllur me një “kafe shkodrane” në shtëpinë relike të të madhit aktorit, Zef Jubani.

Të premten dhe të shtunën, Arqipeshkvi do të takonte të gjithë katekistët dhe motrat që përgatisin fëmijët për marrjen e sakramenteve si dhe do të takonte vetë fëmijët e katekizmit në të gjitha qendrat ku mësojnë. Një falënderim nga Famullia për të gjitha motrat dhe katekistët për qëndrueshmërinë dhe mundin e tyre. Por gjej rast të nxis më shumë prindërit që të na ndihmojnë në këtë përgjegjësi që së bashku duhet ta përmirësojmë më bindshëm. Kjo ishte edhe një porosi e Arqipeshkvit Massafra.

Më dt. 18 mars, Arqipeshkvi vizitoi shkollat “Zemra e Krishtit” dhe “Atë Pjetër Meshkalla” ku tek kjo e fundit u ndal dhe u përgjigj çdo pyetjeje që studentët kishin përgatitur për Të.

Po me dt. 18 mars, në vigjiljen e festës së Shën Jozefit, Arqipeshkvi kremtoi në Katedrale një meshë që iu kushtua Zotit për familjet e sidomos për ato në vështirësi. Në Katedralen e mbushur me besimtarë u lut dhe u dëgjuan porositë e Bariut tonë për një familje të shëndetshme dhe me shumë dashuri. Modeli është ai i Familjes së Shenjtë ku vlera dhe idealet janë shenjtëria e çdo anëtari.

Por edhe e shtuna dt. 21 mars, qe një ditë shumë e ngarkuar me përvoja shpirtërore dhe me reflektime. Në orën 09:30 përjetuam Udhën e Kryqit në Malin Tarabosh të përgatitur nga grupi rinor “Mësues ku Banon” i Famullisë së Shën Shtjefnit. Morën pjesë mbi dy mijë besimtarë nga e gjithë dioqeza edhe pse ishte ftohtë dhe krejt afër nesh kishte rënë borë. Në krye të kësaj përshpirtërie ishte vetë Sh. T. Imzot Angelo Massafra i cili në fund përveç një pretku të shkurtë u dha të pranishmëve bekimin dhe urimin e paqes.

Pasditen e të shtunës, në Sallën Koliqi, Famullia e Shën Shtjefnit kishte organizuar takimin me Njerëzit e Kulturës së Qytetit ku Arqipeshkvi pas përshëndetjes së Dom Gjovalin Sukës mbajti temën: “Kultura, forcë e vërtetë dialoguese në shërbim ...”. E gjitha ngjalli shumë interësë për të gjithë, gjë që u vu re edhe nga orët që kalonin e takimi vazhdonte me pyetje dhe falenderime për Arqipeshkvit. Por nuk munguan as shprehjet e ndonjë mungese nga të pranishmit, ku për mungesat faji i mbetet natyrshëm Famullisë. Një vizitë e veçatë dhe shumë miqësore ishte ajo e organizuar nga Famullia e Shën Shtjefnit në Kishën Ortodokse të Qytetit ditën e premte dt. 27 mars ku Arqipeshkvi, Imzot Massafra, takoi të Nderuarin Atë Aleksandër Petani dhe Atë Nikolla Petani. Ky takim qe një bashkëndarje e dashurisë së krishterë dhe një nxitje që këto dy kisha motra të punojnë më shumë dhe më të bashkuara në qëllimin e përbashkët që është Mretëria e Zotit Krisht. Edhe në këtë viztë Arqipeshkvin e shoqëruan Dom Gjovalin Sukaj dhe Dom Gjovalin Simoni. Me datën 31 mars 2009, në Kinema Millenium, Famullia e Shën Shtjefnit oragnizoi takimin me profesorë e mësues që veprojnë në qytetin tonë. Takimi donte të jepte mesazhin se si duhet të angazhohemi më shumë dhe më mirë në detyrën e shenjtë të edukimit dhe të formimit të brezave të rinj. Prandaj pas fjalës së Arqipeshkvit për të pranishmit u shfaq filmi “Koristët” ku nënvizohej mesazhi se edukimi është një çëshje zemre.

Gjatë kësaj Vizite Baritore, Arqipeshkvi Massafra, ka vizituar të gjitha kishat e qytetit, duke filluar nga Katedralja me dt. 8 shkurt, tek Kisha e Zojës Rruzare më dt. 15 shkurt, tek Kisha e Shën Kollit me dt. 1 mars, tek Kisha Shën Françeskut në Gjuhadol me dt. 8 mars, tek Kisha Dom Bosko me dt. 15 mars, tek Qendra Baritore “Mbretëresha e Paqes” tek ish fusha e druve me dt. 16 mars, tek Qëndra Baritore “Bariu i Mirë” në Fermentim me dt. 22 mars, dhe tek Qendra Baritore në Dobraç me dt. 29 mars. Në të gjitha këto vizita Arqipeshkvi ka takuar grupet rinore dhe baritore që janë në këto qendra dhe është njohur nga afër me dinamikën e aktiviteteve dhe punën që bëjnë meshtarët dhe motrat si dhe me angazhimin e laikëve.

Gjithashtu, edhe këtë vit Arqipeshkvia Metroplitane Shkodër-Pult ka organizuar gjatë kohës së Krehmeve në Sallën Kardinali Mikel Koliqi, takimet e formimit duke u nisur nga tema “Dinjiteti Njerëzor”. Gjatë takimeve realatorët shpalosën rëndësinë e jashtëzakonshme që ka kuptimi i drejtë e kësaj vlere përbërëse e personit njerëzor dhe kjo u bë duke e studiuar dinamizmin e njeriut në aspekte të ndryshme.

Por Vizita Baritore ka edhe një aspekt tjetër të veçantë, pasi Bariu takon personalisht të gjitha bashkësitë rregulltare të pranishme në territorin e Famullisë. Dhe prania e Ipeshkvit dhe porositë e tij janë një nxitje për çdo bashkësi që të bashkërendojnë forcat dhe karizmat për t'i shërbyer Zotit dhe njerëzve më shumë e më mirë.

Dhe meqënesë me fundin e Vizitës Baritore afrohej përjetimi i Javës së Madhe pra i mundimeve të Krishtit, u mendua që të kjo Vizitë të mbyllej me kremtimin e Udhës së Kryqit ditën e premte mbasdite dt. 3 prill. Udha e Kryqit veç përkujtimeve të mundimeve të Krishtit do të na bënte t'i kujtonim edhe martirët e fesë së Krishtit në Tokën tonë pasi gjaku i tyre do të ishte fara e mirë e fesë tek ne. Udha e Kryqit filloi tek Katedralja dhe përshkoi rrugët ku janë disa nga kishat e qytetit për të mbaruar tek Varrezat katolike ku u pushkatuan me dhjetra meshtarë e laikë vetëm pse ishin besnikë të Krishtit.

Duke përfunduar, dua taë falenderoj Zotin për këtë hir të Vizitës Baritore të Sh. T. Imzot Angelo Massafra. Prania e Ipeshkvit na gëzon dhe na bën të përjetojmë edhe më shumë bashkësinë e krishterë. Porositë dhe nxitjet e tija që të jemi të krishterë që jetojnë me meshën dhe Fjalën e Zotit, që t'i qëndrojmë larg mëkatit dhe shkandullit, që të angazhohemi më shumë në transmetimin e vlerave të krishtera në shoqëri janë ajo pjesë e punës që ne meshtarët, rregulltarët e rregulltaret, Këshillet baritore dhe të gjitha organizmat e famullisve të Qytetit do të kemi përzemër.

Një falenderim të veçantë edhe Arqipeshkvit për faktin se pa përtesë shkoi në çdo cep të angazhimit që Kisha në Shkodër është duke çuar përpara. Njëheri dua të falenderoj meshtarët dhe Këshillat Baritore dhe të gjithë organizmat kishtare si dhe laikë të veçantë që kontribuan në mbarëvajtjen e Vizitës Baritore.

Dom Gjovalin Sukaj

   titujt kryesore

webmaster