BEKOHET THEMELI I SHTËPISË SË BAMIRËSISË

Me datën 23 tetor 2008, Vikari Gjeneral i Dioqezës së Sapës Dom Carlo Fantini, bekoi themelin e shtëpisë “Casa di Carita” që do të ndërtohet pranë selisë së kësaj Dioqeze, në Vau-Dejës. Në ceremoninë e bekimit ishte i pranishëm edhe drejtori i Caritas-it dioqezan Sapa, Dom Simon Kulli, i cili theksoi se fillimi i një vepre të tillë ngjall në ne ndjenja mirënjohjeje dhe shprese. Siç thotë psalmi: “Nëse Zoti nuk e ndërton shtëpinë, kot lodhen ata që punojnë”. Edhe ne, tha ai, në njëfarë mënyre bëhemi bashkëpunëtorë të Hyjit, çdo herë që me shpirt shërbimi u dalim para nevojave të të afërmit ose të bashkësisë.

Ideatori për ndërtimin e një qendre të tillë është Shkëlqesia e Tij, Imzot Lucjan Avgustini. Dhe dëshira e madhe për këtë vepër është që të jetë zemra e Dashurisë në Kishën tonë. Po në këtë qendër do të jetë edhe selia e re e Caritas-it Dioqezan, dhe do të jetohet dashuria konkrete ndaj vëllezërve dhe motrave më nevojtarë.

 titujt kryesore

webmaster